UHEZEKIYELI 8 - IsiNdebele 2012 Translation

Iinyenyiso ethempelini

¹ Kwathi ngomnyaka wesithandathu lokha inyanga yesithandathu inamalanga amahlanu, ngisazihlalele emzinami nabaphathi bakwaJuda baphambi kwami, isandla sakaSomnini uSomandla sehlela phezu kwami khonapho.

² Nje-ke ngaqala, ngabona isibumbeko esinomfanekiso womuntu. Ukusuka emfanekisweni wamadinaso ukwehla besimlilo, kuthi ngehla kwamadinaso kube njengomfanekiso odarhileko, iye, njengophazima sasimbi.

³ Selula okungathi sisandla, sangibamba ngesihluthu sami ehloko; ummoya wangiphakamisela hlangana nezulu nephasi, wangiletha emibonweni kaZimu eJerusalema, ebungenweni besango lesirhodlo sangaphakathi esiqale ngetlhagwini lapha bekujame khona isithombe esibanga isikhwele sijame khona.

⁴ Iphazimulo kaZimu ka-Israyeli beyilapho, njengombono engawubona ngemrhobeni.

⁵ UZimu wathi kimi: “Ndodana yomuntu, phakamisela amehlwakho nca ngetlhangwini.” Nje-ke ngaqala nca ngetlhagwinapho: Qala, ngetlhagwini lesango le-aldari ngabona isithombe esibanga isikhwele ebungenweni.

⁶ Wathi kimi: “Ndodana yomuntu, uyayibona into abayenzako na? Indlu yakwa-Israyeli yenza iinkghabhudlho ezikulu lapha. Ngalokho ingidedisela kude nendawami ecwengileko. Nokho usazokubona iinkghabhudlho ezikulu.”

⁷ Wangiletha ebungenweni besirhodlo; lapho ngaqala ngabona bona kunentunja ebodeni.

⁸ Nje-ke wathi kimi: “Ndodana yomuntu, yemba ibodeli uliphundluse.” Kuthe lokha nangiphundlusa iboda, kwaba khona ubungeno.

⁹ Wathi kimi: “Ngena, ubone iinkghabhudlho ezimbi abazenza lapha.”

¹⁰ Nje-ke ngangena ngaqala, ngabona ebodeni mazombe bekufanekiswe woke umhlobo weemphili ezikhakhabako, iinlwana ezikghabhudlhako nawo woke amanyala okubosingazimu bama-Israyeli.

¹¹ Phambi kwezintwezo bekujame abaphathi abamatjhumi alikhomba bendlu yakwa-Israyeli, noJazaniyahu umsa kaTjhafani ajame hlangana nabo. Omunye nomunye aphethe idengela, kukupeza isikhatha sephunga letjhwalo.

¹² Nje-ke wathi kimi: “Ndodana yomuntu, ubonile bona abaphathi bendlu yakwa-Israyeli benzani ebumnyameni na? Iye, omunye nomunye endumbenakhe yemifanekiso ngombana bathi, ‘USomnini akasiboni, iye, uSomnini uyitjhiyile inarha.’ ”

¹³ Wathi kimi: “Godu usazokubona ngaphezu kwalezi ezinye iinkghabhudlho ezikulu abazenzako.”

¹⁴ Nje-ke wangiletha ebungenweni besango langetlhagwini lethempeli lakaSomnini. Abafazi bebahlezi lapho balilela uTamuzi.

¹⁵ Wangibuza wathi: “Ndodana yomuntu, ukubonile lokho na? Usazokubona iinkghabhudlho ezikulu ukudlula lezi.”

¹⁶ Wase ungiletha ngesirhodlweni esingaphakathi sethempeli lakaSomnini. Lapho-ke ebungenweni bethempeli lakaSomnini, phakathi kwamathuri ne-aldari, bekunamadoda amatjhumi amabili namahlanu, imihlanabo ifulathele ithempeli lakaSomnini, ubuso babo buqale ngepumalanga; bakhothamela ilanga ngepumalangapho.

¹⁷ Nje-ke wathi kimi: “Ndodana yomuntu, ukubonile lokhu na? Ingabe kuyinto elula endlini yakwaJuda ukwenza izinto ezikghabhudlhakwezi lapha na? Kufuze bazalise inarha ngenturhu bangitlhorholoje ukuya phambili na? Qala-ke, babeka amahlumela wesidiribe eempumulweni zabo!

¹⁸ Ngalokho, nami ngizokuphendula ngelaka. Amehlwami angeze ababalela begodu angeze ngaba nezwelo. Nanyana bangapongoloza ngesililo esikhulu phambi kwami, angekhe ngibalalele.”