UHEZEKIYELI 7 - IsiNdebele 2012 Translation

Ihlekelele elindelweko

¹ Ilizwi lakaSomnini lafika kimi lathi:

² “Wena ndodana yomuntu, nakhu okutjhiwo nguSomnini uSomandla enarheni yakwa-Israyeli, “ ‘Kusiphetho! Mbala isiphetho sifikile emajikeni amane wenarha.

³ Manje isiphetho siphezu kwakho, wena narha! Ngizakuthulula ilaka lami phezu kwakho, ngikugwebe ukuya ngeendlela zakho, ngibeke zoke iinkghabhudlho zakho phezu kwakho.

⁴ Amehlwami angeze akubabalela namkha ngibe nezwelo. Ngizokubetha ngeentonga zakho iye, iinkghabhudlho zakho zizakuba phakathi kwakho. Nje-ke nizakwazi bonyana nginguSomnini.’

⁵ “Nakhu okutjhiwo nguSomnini uSomandla, “ ‘Qala-ke, ihlekelele phezu kwehlekelele, naso isiza!

⁶ Isiphetho sifikile! Iye, isiphetho sifikile! Sivukile ngokujamelana nawe narha! Qala sifikile!

⁷ Ukuwa kufikile kuwe wena sakhamuzi senarha! Isikhathi sifikile, ilanga litjhidele, kulitjhada lepi eentabeni, ingasi lokuhlokoma!

⁸ Nje-ke masinyana, ngizokuthululela itukuthelwami phezu kwakho narha, ngivuthele ilaka lami phezu kwakho. Ngizakugweba ngokufanele iindlela zakho, ngibeke zoke iinkghabhudlho zakho phezu kwakho.

⁹ Amehlwami angeze ababalela begodu angeze ngaba nezwelo. Ngizokubetha ngeentonga zakho, iye, iinkghabhudlho zakho zizakuba phakathi kwakho. Nje-ke nizakwazi bonyana nginguSomnini obethako.’

¹⁰ Qala, nanto ilanga! Qala lifikile! Ukuwa kwakho kuyeza. Intonga seyihlumile, ukuzikhakhazisa sekukhahlele.

¹¹ Inturhu ngeyentonga yobumbi. Akakho noyedwa ozakusala, iye, ngitjho umnotho nobunjinga babo; akunabugugu phakathi kwabo!

¹² Isikhathi sifikile, ilanga liyatjhidela; umthengi akangathabi nomthengisi angalili, ngombana ilaka liphezu komnotho woke wenarha.

¹³ “Mbala, abathengisi angeze babuyele kokuthengisiweko ngitjho nanyana basaphila ngombana umbono ophathelene nomnotho woke wenarha angekhe wabuyiswa. Ngebanga lecala labo, akakho noyedwa ozakulonda ipilwakhe.

¹⁴ “ ‘Bavuthele ipalapala, balungisa koke ukuya epini kodwana akakho oya epinapho ngombana ilaka lami liphezu komnotho woke wenarha.

¹⁵ Isabula ingaphandle ngaphakathi kunezifo nendlala. Loyo osemasimini ufa ngesabula; osedorobheni ubhujiswa zizifo nendlala.

¹⁶ Nakube abanye babo bayaphunyurha basinde, bazakuba seentabeni njengamazuba wemirhoba: Boke njalo bazakulila, omunye nomunye ngecala lakhe.

¹⁷ Zoke izandla zizakuba buthakathaka, amadolo woke angenwe mamanzi.

¹⁸ Bazakwembatha iinzilo, ukwesaba kubagubuzese. Amahloni azakuba phezu kwabo boke ubuso, nobuphandla phezu kwazo zoke iinhloko zabo.

¹⁹ Bazakuphosa isiliva labo endledlaneni, igolide labo lithathwe njengomtjhubelo. “ ‘Isiliva negolide labo angeze labasindisa ngelanga lelaka lakaSomnini. Angekhe banelisa imiphimbabo namkha bagcwalise izisu zabo ngalo ngombana icala labo lisikhubekiso.

²⁰ Bazikhakhazise ngobuphaziphazi begolide nesiliva, benze ngalo iinthombe ezisikghabhudlho, iye izinto ezisinyenyiso; ngalokho ngilenza libe mtjhubelo kibo.

²¹ “ ‘Ngizalinikela ezandleni zabezizwe njengepango, kwabakhohlakeleko bephasi libe sihlangulo; bona-ke bazalisilaphaza.

²² Ngizokufulathelisa ubuso bami, ukuze abagongodi basilaphaze indawami eligugu; iye, abadlelezeli bazayingena bebayisilaphaze.

²³ Lungisa amakhamandela, ngombana inarha igcwele icala leengazi, idorobho lizele inturhu.

²⁴ Ngizokungenisa abakhohlakele khulu bezizwe, badle izindlu zabo. Ngizokuphelisa ukuzazi kwabanamandla, neendawo zabo zisilaphazwe.

²⁵ Lokha nakufika isikhathi sokubotjhwa bazakufuna ukuthula kodwana angekhe kwabakhona.

²⁶ Kuzakuba yihlekelele phezu kwehlekelele, amarhemurhemu alandelwe marhemurhemu; bazasoloko bafuna umbono emphorofidini; ifundiso iphele emphristini neenluleko zabadala.

²⁷ Ikosi izakulila, ikosana yembathwe kukhungatheka, izandla zabantu elizweni zibe nedumbe ngevalo. Ngizabaphatha ngokuya ngeendlela zabo; ngibagwebe ukuya ngokwemikhubabo. Bazakwazi bonyana nginguSomnini.’ ”