UHEZEKIYELI 48 - IsiNdebele 2012 Translation

¹ “Naka amabizo weenkoro: “Emkhawulweni wangetlhagwini ikoro yakwaDani izakuba nesabelo sinye. Umkhawulwaso uzakukhamba ngendlela yeRhetiloni unqombe eLebo-Rhamathi neRhatseri-Enani emkhawulweni weDamaseku ngetlhagwini, hlanu kweRhamathi. Kuzakuba mkhawulo wakhona ukusuka ngepumalanga yenarha ukuya ngetjingalanga yayo.

² U-Atjhera uzakuba nesabelo sinye; sizakuba hlanu komkhawulo wakwaDani ukusukela ngepumalanga ukuya ngetjingalanga yenarha.

³ UNafitali uzakuba nesabelo sinye; sizakuba hlanu komkhawulo wakwa-Atjhera ukusukela ngepumalanga ukuya ngetjingalanga yenarha.

⁴ UManase uzakuba nesabelo sinye; sizakuba hlanu komkhawulo wakwaNafitali ukusukela ngepumalanga ukuya ngetjingalanga yenarha.

⁵ U-Efrayimu uzakuba nesabelo sinye; sizakuba hlanu komkhawulo wakwaManase ukusukela ngepumalanga ukuya ngetjingalanga yenarha.

⁶ URubeni uzakuba nesabelo sinye; sizakuba hlanu komkhawulo wakwa-Efrayimu ukusukela ngepumalanga ukuya ngetjingalanga yenarha.

⁷ UJuda uzakuba nesabelo sinye; sizakuba hlanu komkhawulo wakwaRubeni ukusukela ngepumalanga ukuya ngetjingalanga yenarha.

⁸ “Hlanu komkhawulo wakwaJuda ukusukela ngepumalanga ukuya ngetjingalanga yenarha kuzakuba sisabelo enizasinikela njengesipho esikhethekileko. Sizakuba makhilomitha alitjhumi nambili nesiquntu ububanzi bese ubude baso ukusukela ngepumalanga ukuya ngetjingalanga silingane nesinye sezabelo zekoro. Ngaphakathi kwaso kuzakuba nomakhiwo ocwengileko.

⁹ Isabelo esikhethekileko enizasinikela uSomnini sizakuba makhilomitha alitjhumi nambili nesiquntu ubude namakhilomitha alitjhumi ububanzi.

¹⁰ “Soke isipho esikhethekileko sizakuba ngeseenqhema ezilandelako: “Ingcenye yabaphristi “Ngetlhagwini nangesewula izakuba makhilomitha alitjhumi nambili nesiquntu ubude namakhilomitha amahlanu ububanzi. Ngaphakathi kwayo kuzakuba nomakhiwo ocwengileko kaSomnini.

¹¹ Lokhu kuzakuba ngokwabaphristi abahlukaniselweko nabaziinzukulwana zakaTsadokhi, labo abalonda umsebenzi womakhiwami ocwengileko begodu angazange baphambuke njengamanye amaLevi lokha ama-Israyeli nagade angihlubukile.

¹² Kuzakuba sisipho esicwengileko kibo esithethwe esiphiweni esikhethekileko senarha. Sizakuba ngesicwenge khulu hlanu komkhawulo wamaLevi.

¹³ “Ingcenye yamaLevi “Ukulinganisana nomkhawulo wabaphristi izakuba makhilomitha alitjhumi nambili nesiquntu ubude namakhilomitha amahlanu ububanzi. Boke ubude beengcenye zabaphristi nezamaLevi buzakuba makhilomitha alitjhumi nambili nesiquntu namakhilomitha alitjhumi ububanzi.

¹⁴ Akukameli bathengise namkha benane ngazo. Ziyingcenye ekhetheke khulu enarheni ngombana zicwengile kuSomnini.

¹⁵ Indawo eseleko emakhilomitha amabili nesiquntu ububanzi namakhilomitha alitjhumi nambili nesiquntu ubude, izakuba ngesetjenziselwa okujayelekileko, ibe ngeyedorobho okutjho amadlelo nokwakha iinkumba. Idorobho lizakuba sekabenayo.

¹⁶ Isilinganiso sendawo yedorobho sizakuba makhilomitha amabili nesiqunjwana mahlangothi woke.

¹⁷ Amadlelo wedorobho azakuba mamitha alikhulu namatjhumi amabili nahlanu mahlangothi woke wedorobho.

¹⁸ Indawo yedorobho eseleko elinganisene nendawo ecwengileko izakuba makhilomitha amahlanu ukuya ngepumalanga namakhilomitha amahlanu ukuya ngetjingalanga. Umkhiqizwayo uzakondla abasebenza ngedorobheni.

¹⁹ Abasebenza ngedorobheni abavela kizo zoke iinkoro zakwa-Israyeli bazakulima indawo leyo.

²⁰ Soke isipho esikhethekileko sizakufaka hlangana iingcenye ezicwengileko nesabelo sedorobho. Sizakulingana mahlangothi woke, sibe makhilomitha alitjhumi nambili nesiquntu.

²¹ “Okusele ngapha nangapha eengcenyeni ezicwengileko nesabelweni sedorobho kuzakuba ngokwekosana. Ukusuka emkhawulweni omakhilomitha alitjhumi nambili nesiquntu wangepumalanga wesipho esikhethekileko ukuya emkhawulweni wenarha ngepumalanga nokusuka emkhawulweni wangetjingalanga wesipho esikhethekileko ukuya emkhawulweni wenarha ngetjingalanga kuzakuba sisabelo sekosana. Zombili iindawezo zilinganisene nezabelo zeenkoro. Isipho esicwengileko esinomakhiwo ocwengileko ngaphakathi kwaso

²² nesabelo samaLevi kanye nendawo yedorobho, koke kusekabeni yeendawo zekosana. Iindawo zekosana zizakuba hlangana nomkhawulo wakwaJuda nowakwaBhenjamini.

²³ “Mayelana neenkoro ezinye: “UBhenjamini uzakuba nesabelo sinye; sizakusuka ngepumalanga yenarha ukuya ngetjingalanga yayo.

²⁴ USimeyoni uzakuba nesabelo sinye; sizakuba hlanu komkhawulo wakwaBhenjamini ukusukela ngepumalanga ukuya ngetjingalanga yenarha.

²⁵ U-Isakhari uzakuba nesabelo sinye; sizakuba hlanu komkhawulo wakwaSimeyoni ukusukela ngepumalanga ukuya ngetjingalanga yenarha.

²⁶ UZebuloni uzakuba nesabelo sinye; sizakuba hlanu komkhawulo wakwa-Isakari ukusukela ngepumalanga ukuya ngetjingalanga yenarha.

²⁷ UGadi uzakuba nesabelo sinye; sizakuba hlanu komkhawulo wakwaZebuloni ukusukela ngepumalanga ukuya ngetjingalanga yenarha.

²⁸ “Umkhawulo wangesewula yakwaGadi uzakuthoma eTamari ukuya emanzini weMeriba-Khadetjhi, udlule umlanjana weGibhide ukuya elwandle eliKhulu.

²⁹ Leyo yinarha enizayaba njengelifa leenkoro zakwa-Israyeli ngokuphosa ifumbe. Lokho-ke kuzakuba zizabelo zabo.” Kutjho uSomnini uSomandla.

Amasango wedorobho

³⁰ “Lokhu kuzakuba buphumo bedorobho: “Emthangaleni wedorobho ongetlhagwini nomakhilomitha amabili nesiquntu ubude,

³¹ kuzakuba namasango amathathu athiyelelwe ngeenkoro zakwa-Israyeli; isango linye lakaRubeni, linye lakaJuda nalinye lakaLevi.

³² Emthangaleni wedorobho ongepumalanga nomakhilomitha amabili nesiquntu ubude, kuzakuba namasango amathathu okutjho isango linye lakaJosefa, linye lakaBhenjamini nalinye lakaDani.

³³ Emthangaleni wedorobho ongesewula nomakhilomitha amabili nesiquntu ubude, kuzakuba namasango amathathu okutjho isango linye lakaSimeyoni, linye laka-Isakari nalinye lakaZebuloni.

³⁴ Emthangaleni wedorobho ongetjingalanga nomakhilomitha amabili nesiquntu ubude, kuzakuba namasango amathathu okutjho isango linye lakaGadi, linye laka-Atjheri nalinye lakaNafitali.

³⁵ “Ibanga mahlangothi woke wedorobho lizakuba makhilomitha alithoba. “Ibizo ledorobho ukusukela ngesikhatheso lizakubizwa ngokuthi: USomnini ulapho.”