UHEZEKIYELI 47 - IsiNdebele 2012 Translation

Umlambo osuka ethempelini

¹ Umuntu loyo wangibuyisela ebungenweni bethempeli. Qala, amanzi avinyilika ngaphasi kombunjwana wethempeli, agelezela ngepumalanga njengombana ithempeli beliqale ngepumalanga. Amanzi gade ehlela phasi avela ngesewula yethempeli, ngesewula ye-aldari.

² Wangikhuphela ngaphandle komthangala ozombeleze ithempeli loke ngesango langetlhagwini. Wangikhambisa magegana nomthangala, wangisa esangweni eliqale ngepumalanga. Qala, amanzi gade agobhoza ngehlangothini elingesewula lesango.

³ Umuntu loyo nalokhu asiya ngepumalanga aphethe isilinganiso, walinganisa amamitha amakhulu amahlanu, wangeyamisa emanzini afika engogoriyaneni.

⁴ Walinganisa kwaba ngamanye amamitha amakhulu amahlanu, wangeyamisa emanzini ebegade afika edolweni. Walinganisa amanye amamitha amakhulu amahlanu, wangeyamisa emanzini ebegade angifika edinini.

⁵ Walinganisa amanye amamitha amakhulu amahlanu, kodwana kilelihlandla bekumlambo ebengingeze ngaweyama ngombana amanzi besele akhuphukile begodu atjhinga alingene ukududa kiwo, kumlambo ongeze weyanywa mumuntu.

⁶ Wangibuza wathi: “Ndodana yomuntu, ubonile na?” Nje-ke wangibuyisela emuva ngesebe lomlambo.

⁷ Kwathi ngisakhamba njalo, Qala, bekunemithi eminengi ngapha nangapha komlambo.

⁸ Wathi kimi: “Amanzi la agelezela ngesifundeni sangepumalanga bese ehlela ngemrhobeni weJordani lapha afese angene khona elwandle. Lokha nawuthululela ngelwandle, amanzi walapho aba matjha.

⁹ Nanyana kukuphi lapha amanzi agelezela khona, kuzakuba neemphili eziphithizelako. Kuzakuba nejuma leenhlambi ngombana amanzi la agelezela lapho bese enza amanzi wetswayi abe matjha. Iye, nanyana kukuphi lapha umlambo ugelezela khona, koke okulapho kuzakuphila.

¹⁰ Abathiyiinhlambi bazakujama magegana neligu lelwandle eliFilileko ukusuka e-Eni-Gedi ukuya e-Eni-Egilayimu kuzakuba neendawo zokomisa iinrhurhulanede. Iinhlambi zizakuba ngemihlobohlobo njengeenhlambi zelwandle eliKhulu.

¹¹ Kodwana amachibi neenzibi angeze zibe zitjha, zizakuhlala zinetswayi.

¹² Imithi yemihlobohlobo yeenthelo izakumila ngapha nangapha kwesebe lomlambo. Amakarayo angeze atjhwaba neenthelo zakhona angeze zaphela. Inyanga nenyanga izakuhloma ngombana amanzi wendawo ecwengileko agelezela kiyo. Iinthelo zayo zizakuba ngezokudla bese amakarayo abe yintatha.”

Imikhawulo yenarha

¹³ Nakhu okutjhiwo nguSomnini uSomandla: “Nasi imikhawulo enizakuhlukanisa ngayo inarha yelifa hlangana neenkoro ezilitjhumi nambili zakwa-Israyeli, uJosefa abe nezabelo ezimbili.

¹⁴ Nizazihlukanisela ngokulinganako. Ngafunga ngokuphakamisa isandla bonyana ngizakunikela aboyihlo inarha le; izakuba lilifa lenu.

¹⁵ “Imikhawulo yenarha izakuba bunjesi: “Ngehlangothini langetlhagwini uzakusuka elwandle eliKhulu ukhambe ngendlela yeRhetiloni ukuya eTsadadi,

¹⁶ eRhamathi, eBherotha neSibrayimu ephakathi kweendawo zeDamaseku neRhamathi, ukuyokufika eRhateri-Hatikoni emkhawulweni weRhawurana.

¹⁷ Ngendlela leyo umkhawulo uzakusuka elwandle uye eRhatseri-Enani magegana nomkhawulo weDamaseku, ngetlhagwini yomkhawula kube yindawo yeRhamathi. Lowo-ke kuzakuba mkhawulo wangetlhagwini.

¹⁸ “Ngehlangothini langepumalanga umkhawulo uzakukhamba hlangana neRhawurana neDamaseku magegana neJordani hlangana neGiliyadi nenarha yakwa-Israyeli ukuya elwandle langepumalanga ukuyokufika eTamari. Lowo-ke kuzakuba mkhawulo wangepumalanga.

¹⁹ “Ngehlangothini langesewula uzakukhamba ukusuka eTamari ukuya emanzini weMeriba-Khadetjhi, ugege nomlanjana weGibhide ukuya elwandle eliKhulu. Lowo-ke kuzakuba mkhawulo wangesewula.

²⁰ “Ngehlangothini langetjingalanga, ilwandle eliKhulu lizakuba mkhawulo bekube malungana neLebo-Rhamathi. Lowo kuzakuba mkhawulo wangetjingalanga.

Ukuhlukaniswa kwenarha

²¹ “Nizakuhlukaniselana inarha le ngokuya ngeenkoro zakwa-Israyeli.

²² Nizayaba ngokuphosa ifumbe njengelifa lenu kanye nemiqhamuka esele inzinze phakathi kwenu beyaba nabantwana. Nizayithatha njengabantu bendabuko hlangana nama-Israyeli. Izakwabelwa ilifa kanye nani hlangana neenkoro zakwa-Israyeli.

²³ Nanyana umqhamuka unganzinza hlangana nayiphi ikoro, nizawunikela ilifa lawo khonapho.” Kutjho uSomnini uSomandla.