UHEZEKIYELI 46 - IsiNdebele 2012 Translation

Imihlobohlobo yeemiso

¹ Nakhu okutjhiwo nguSomnini uSomandla: “Isango lesirhodlo sangaphakathi esiqale ngepumalanga kumele livalwe emalangeni asithandathu wokusebenza, kodwana livulwe ngelanga leSabatha nangelanga lokwethwasa kwenyanga.

² Ikosana izakungena ngesirhodlweni sesango langaphandle, ijame eengosenini zalo. Abaphristi bazakwenza umhlabelwayo wokutjhiswa newetjhebiswano. Izakuguqa ihlome ihloko phasi embunjwaneni wesango. Kuthi nasele iphumile isango lingavalwa kufikela bekuhlwe.

³ NgamaSabatha nangeminyanya yokwethwasa kwenyanga, abantu benarha bazakuguqa bahlome iinhloko phasi phambi kwakaSomnini ebungenweni besangwelo.

⁴ Umhlabelo wokutjhiswa olethwa ikosana kuSomnini ngelanga leSabatha uzakuba ziimvana ezithandathu ezimsulwa kanye neqama elimsulwa.

⁵ Umnikelo weenthoro okhambisana neqama uzakuba ngupumpana bese okhambisana neemvana ube mnengi ngendlela engakghona ngayo. Upumpana ngamunye akhambe namalitha amane wamafutha we-oliva.

⁶ Ngelanga lokwethwasa kwenyanga kufuze kube yikunzana, iimvana ezisithandathu kanye neqama, koke kube msulwa.

⁷ Ikosana izakuhlinzeka njengomnikelo weenthoro upumpana munye okhambisana nekunzi, upumpana munye okhambisana neqama bese nakuziimvana zibe zinengi ngendlela engakghona ngayo. Upumpana ngamunye akhambisane namalitha amane wamafutha we-oliva.

⁸ Lokha ikosana nayingenako, izakungena ngesirhodlwana sesango iphume ngendlela leyo.

⁹ “Kuzakuthi abantu benarha leyo nabeza phambi kwakaSomnini kobana baguqe bahlome iinhloko phasi ngeminyanya ejanyisiweko, ongena ngesango langetlhagwini uzakuphuma ngesango langesewula bese kuthi ongene ngesango langesewula aphume ngesango langetlhagwini. Akunamuntu ozakuphuma ngesango angene ngalo, kodwana omunye nomunye uzakunqopha esangweni elifulathele angene ngalo.

¹⁰ Ikosana izakuba phakathi kwabo, ingene nabo nabangenako bese iphuma nabo nabaphumako.

¹¹ “Eminyanyeni okutjho emigidini ejanyisiweko, umnikelo weenthoro uzakuba ngupumpana okhambisana nekunzi, upumpana okhambisana neqama kanye neemvana ezinengi ngendlela angakghona ngayo. Upumpana ngamunye akhambisane namalitha amane wamafutha we-oliva.

¹² Lokha ikosana nayiletha umnikelo wesihle kuSomnini, kungaba mhlabelo wokutjhiswa namkha wetjhebiswano, izakuvulelwa isango eliqale ngepumalanga. Izakuletha umhlabelwayo wokutjhiswa namkha wetjhebiswano njengombana yenza ngelanga leSabatha. Kuthi nasele iphumile isangwelo livalwe.

¹³ “Imihla ngemihla uzakuhlinzeka ngemvana enomnyaka nemsulwa kuSomnini kobana ibe mhlabelo wokutjhiswa, iye, uzakuhlinzeka ngayo njalo ekuseni.

¹⁴ Godu kuzakuthi njalo ekuseni imvana leyo ikhambisane nomnikelo weenthoro onamakhilogremu amathathu weflowuru esefiweko nelitha nesiquntu samafutha we-oliva ukuyithambisa. Ukunikelwa komnikelo weenthoro lo kuSomnini kusimiso sanini nanini.

¹⁵ Yeke kuzakuhlinzekwa njalo ekuseni imvana, umnikelo weenthoro kanye namafutha we-oliva njengomnikelo wokutjhiswa wangemihla.”

¹⁶ Nakhu okutjhiwo nguSomnini uSomandla: “Nakube ikosana ikhupha isipho esabelweni sayo, inikele enye yamadodanayo, lokho kuzakuba sisabelo sendodana leyo, kube lilifa leenzukulwana zayo esabelweni sekosana leyo.

¹⁷ Kodwana nakube ikhupha isipho esabelweni sayo iphe esinye seensebenzi zayo, isisebenzeso singagcina isipho bekube mnyaka wokubuyisela. Ngemva kwalapho sizakubuyela ekhosaneni. Ilifa layo lingelamadodanayo; iye, lingelawo kwaphela.

¹⁸ Ikosana ayingathatheli abantu ilifa labo, ingabaqotjhi epahlenabo. Izakwabela amadodanayo ilifa lawo esabulweni sayo ukuze kungabikhona namunye wabantu bami ozakuhlakazwa elifeni labo.”

Iindawo zokuphekela ethempelini

¹⁹ Wangingenisa ngobungeno obungehlangothini lesango eliya emalawini acwengileko aqale ngetlhagwini, okungewabaphristi. Qala, bekunendawo emaphelelweni wangetjingalanga wawo.

²⁰ Wathi kimi: “Le-ke yindawo lapha abaphristi bazakuphekela khona umhlabelo wehlawulo newehlambululo kanye nomnikelo weenthoro ukuze bangawukhupheli ngesirhodlweni esingaphandle bese ngokwenza njalo bacwengise abantu.”

²¹ Wangikhupha ngesirhodlweni sangaphandle, wangibhodisa namajikaso amane. Qala, kelinye nelinye ijika bekunesirhodlwana.

²² Iindawo zeenrhodlwane ezinezo emajikeni bezilingana: imamitha amatjhumi amabili ubude namamitha alitjhumi nahlanu ububanzi.

²³ Imithangadlana yamatje beyihlukanisa iinrhodlwana ezinezo, inamaziko wokuphekela magegana nayo ngaphakathi.

²⁴ Wathi kimi: “Lawa maphunyana lapha abasebenza ethempelini bazakuphekela khona imihlabelo yetjhebiswano yabantu.”