UHEZEKIYELI 44 - IsiNdebele 2012 Translation

Ikosana, amaLevi, abaphristi

¹ USomnini wangibuyisela esangweni langaphandle lomakho ocwengileko, eliqale ngepumalanga, kodwana lalivaliwe.

² Wathi kimi: “Isangweli kumele lihlale livaliwe. Akukameli livulwe; akunamuntu omele angene ngalo. Lizakuhlala livaliwe ngombana uSomnini, uZimu wakwa-Israyeli ungene ngalo.

³ Yikosana yodwa engahlala ngaphakathi kobungeno kobana igome phambi kwakaSomnini. Izakungena ngendlela yesirhodlwana sesango beyiphume ngayo indlela leyo.”

⁴ Wangisa esangweni langetlhagwini ngaphambi kwethempeli. Ngathi ngisaqalile, iphazimulo kaSomnini yagcwala ithempeli lakhe. Nje-ke ngawa phasi ngobuso.

⁵ USomnini wathi kimi: “Ndodana yomuntu, yelela kuhle, uzibonele ngamehlwakho, uzizwele ngeendlebe zakho ngakho koke engikutjela khona mayelana nazo zoke iimiso eziphathelene nethempeli lakaSomnini nayo yoke imithethwalo. Yelela ubungeno bethempeli ngokuqala ofanele angene nofanele akhutjhwe emasangweni womakho ocwengileko.

⁶ Yithi endlini ehlubukileko yakwa-Israyeli, ‘Nakhu okutjhiwo nguSomnini: Sekwanele ngeenkghabhudlho zakho zoke wena ndlu ka-Israyeli!

⁷ Ngokuvumela imiqhamuka engakasoki enyameni ngitjho neenhliziyweni kobana ingene emakhiwenami ocwengileko nokobana isilaphaze ithempeli lami lokha naniletha iminekelo yomhlwehlwe neengazi, nephula isivumelwano sami ngaphezu kwazo zoke iinkghabhudlho zenu.

⁸ Godu azange niyelele izinto zami ezicwengileko, kodwana nabeka imiqhamuka esikhundleni senu kobana kube ngiyo eyelela ukulotjhwa kwami emakhiwenami ocwengileko.’

⁹ Nakhu okutjhiwo nguSomnini uSomandla, ‘Akunamqhamuka ongakasoki ehliziyweni ngitjho nenyameni ozakungena emakhiwenami ocwengileko, iye, ngitjho nomqhamuka ohlala phakathi kwama-Israyeli.

¹⁰ Kodwana nakumaLevi akhambela kude nami lokha ama-Israyeli naphambukako abe angihlubuka adlhemadlhema ngemva kwamanyalabo okubosingazimu, kumele athwale icala lawo:

¹¹ Kumele abe ziinceku emakhiwenami ocwengileko. Azakuba bogosa emasangweni wethempeli, abe asebenze ethempelini. Wona kumele ahlabele abantu imihlabelo yokutjhiswa neyetjhebiswano, abe alungele ukwenzela abantu imisebenzi.

¹² Ngebanga lokobana asebenzela abantu phambi kwamanyalabo okubosingazimu bese abanga isikhubekiso secala endlini ka-Israyeli, ngalokho-ke ngaphakamisa isandla sami ngokujamelana nawo ukuze athwale icala lawo.’ Kutjho uSomnini uSomandla.

¹³ Angatjhideli kimi kobana abe baphristi bami namkha atjhidele ezintweni zami zoke ezicwengileko namkha eminikelweni ecwenge khulu. Azakuthwala ihlazo lezenzo zawo nomphumela weenkghabhudlho zawo azenzileko.

¹⁴ Ngizawabeka kobana eluse ukulotjha ethempelini mayelana nayo yoke imisebenzi okumele wenziwe kilo.

¹⁵ “ ‘Kodwana abaphristi abamaLevi nabaziinzukulwana zakaTsadokhi abalonda umsebenzi womakhiwami ocwengileko lokha ama-Israyeli nagade angihlubukile, bona bazakutjhidela kimi kobana bangilotjhe bebajame ebukhoneni bami nokobana banikele ngemihlabelo yomhlwehlwe neengazi.’ Kutjho uSomnini uSomandla.

¹⁶ ‘Ngibo bodwa abazakungena ngemakhiwenami ocwengileko, iye, ngibo bodwa abazakutjhidela eduze netafulami kobana bangilotjhe bebayelele nemisebenzami.

¹⁷ “ ‘Lokha nabangena emasangweni wesirhodlo sangaphakathi, kumele beze bembethe izambatho zelineni, bangembathi nakancani isambatho soboya lokha nabalotjha emasangweni wesirhodlo sangaphakathi ngethempelini.

¹⁸ Kumele bathwale imibhode yelineni eenhloko bese bembathe iindzeredzere zelineni emadinini. Bangazibophi ngalitho elizabajulukisa.

¹⁹ Lokha nabaphuma ngesirhodlweni sangaphandle baya ebantwini, kumele bahlubule izambatho ebebalotjha ngazo, bazitjhiye ngemalawini acwengileko. Kumele bembathe izambatho ezinye ukuze bangacwengisi abantu ngokubathinta ngezambatho zawo.

²⁰ “ ‘Bangagudi iinhloko, namkha baliselele iinhluthu zibe zide, kodwana kumele bahlale baziphungulile.

²¹ Akunamphristi ozakusela iwayini lokha nangena ngesirhodlweni sangaphakathi.

²² Akukameli bathathe abahlolokazi namkha amabuya; kumele bathathe kwaphela amatlawu wakwa-Israyeli namkha bathathe abahlolokazi babaphristi.

²³ Kumele bafundise abantu bami umahluko phakathi kokucwengileko nokujayelekileko kanye nokuhlukanisa phakathi kokuhlanzekileko nokusilapheleko.

²⁴ “ ‘Nakunemibango, abaphristi bona kumele babe bagwebi bese bagweba ngokuya ngeengwebo zami. Kumele balonde imithetho neemiso zami mayelana nayo yoke iminyanya ejanyisiweko bese bacwengisa amaSabatha wami.

²⁵ Umphristi angazisilaphazi ngokutjhidela esidunjini, ngaphandle kwanange ohlongakeleko kunguyise, unina, indodana, indodakazi, umfo namkha udadwabo ongakendi. Lapho-ke angazisilaphaza ngaso.

²⁶ Ngemva kobana sele ahlanjululiwe, uzakulinda amalanga alikhomba.

²⁷ Ngelanga aya ngalo ngesirhodlweni sangaphakathi somakhiwo ocwengileko kobana ayokulotjha, kuzakumele azinikelele umhlabelo wehlambululo.’ Kutjho uSomnini uSomandla.

²⁸ “Abakameli ukuba nelifa ngombana mina ngililifa labo. Ningabanikeli isabelo kwa-Israyeli ngombana mina ngisisabelo sabo.

²⁹ Bona bazakudla iminikelo yeenthoro, imihlabelo yehlambululo neyehlawulo. Koke okuzilelwa ngakho uSomnini kuzakuba ngekwabo.

³⁰ “Okukhethekileko kwayo yoke imikhiqizo yokuthoma yazo zoke izinto nazo zoke iimbiko zenu kuzakuba ngokwabaphristi. Kumele nibanikele ihlamenu yokuthoma ukuze isibusiso sibe phezu kwemindenenu.

³¹ Abaphristi abakameli ukugudla nanyana yini ezifeleko namkha edatjulwe ziimbandana, kungaba yinyoni namkha isilwana.”