UHEZEKIYELI 39 - IsiNdebele 2012 Translation

¹ “Wena ndodana yomuntu, phorofida ngokujamelana noGogi, umtjele bonyana nakhu okutjhiwo nguSomnini nguSomandla, ‘Qala, ngijamelene nawe, wena Gogi, kosana ekulu yeMetjheki neTubhali.

² Ngizokuphendula ngikurhole, ngikwenyuse emajukujukwini wetlhagwini, ngikuse eentabeni zakwa-Israyeli.

³ Nje-ke ngizokumadlha umsebakho ngesinceleni sakho, ngenze nemisubela yakho ikhithike esidleni sakho.

⁴ Uzokuwela phezu kweentaba zakwa-Israyeli, wena nawo woke amabuthwakho kanye nezizwe ezikanye nawe. Ngizokunikelela bona ube kukudla kwemihlobohlobo yeenyoni ezidla inyama begodu ube kukudla kweembandana zommango.

⁵ Uzakuwela emmangweni ngombana ngikhulumile.’ Kutjho uSomnini uSomandla.

⁶ Ngizokuthumela umlilo phezu kweMagogi naphezu kwalabo abahlezi baphepha eenarheni eziseligwini. Yeke bazakwazi bonyana nginguSomnini.

⁷ “Ngizokwenza bona ibizo lami elicwengileko lazeke hlangana nabantu bami u-Israyeli begodu angekhe ngisavumela bona ibizo lami elicwengileko lirhubutjhwe Nezizwe zizakwazi bonyana nginguSomnini oCwengileko phakathi kwama-Israyeli.

⁸ Qala, lokho kuyeza begodu kuzokwenzeka! Leli, ngilo ilanga engikhulume ngalo.” Kutjho uSomnini uSomandla.

⁹ “Abahlali bamadorobho wakwa-Israyeli bazokuphuma bayokwenza umlilo ngeenkhali ukuze bazitjhise, okutjho amakhande neenhlangu, imisebe nemisubela, iimbhuku nemikonto, iye, bazokwenza umlilo wezintwezo iminyaka elikhomba.

¹⁰ Angekhe kusadingeka bonyana bayokuthwala iinkuni emmangweni namkha batheze ehlathini ngombana bazozenzela umlilo ngeenkhali. Bazokuphanga labo ababaphangileko bebahlangule labo ababahlangulileko.” Kutjho uSomnini uSomandla.

¹¹ “Mhlokho ngizokunikela iGogi indawo yokuthuna kwa-Israyeli, emrhobeni weenkhambi ngepumalanga yelwandle. Indawo leyo izokuvimba iinkhambi ngombana iGogi nomkhambathakhe bazokuthunwa lapho. Izokubizwa bonyana mrhoba wesiqubuthu seGogi.

¹² Indlu yakwa-Israyeli izobathuna iinyanga ezilikhomba zoke ukuze ihlambulule inarha.

¹³ Boke abantu enarheni bazobathuna, lokho kubalethele idumo ngelanga engizokubonisa ngalo iphazimulwami.” Kutjho uSomnini uSomandla.

¹⁴ “Bazozikhethela abantu abazokuhlala njalo bakhambakhamba enarheni kobana bathune labo abaseleko ehlabathini ukuze bayihlambulule. Ekupheleni kweenyanga ezilikhomba bazokuphenyisisa:

¹⁵ Lokha abakhambakhamba enarheni nababona amathambo womunthu, bazokubeka isibekiso kiwo ukuze abathunako bawathune ngemrhobeni wesiqubuthu seGogi.

¹⁶ Ngendlela enjalo bazakuhlambulula inarha.” (Godu kuzakuba ngitjho nedorobho okuthiwa siQubuthu.)

¹⁷ “Nje-ke wena ndodana yomuntu, uSomnini uSomandla ukuyala bona ukhulume eenyonini ezimihlobohlobo neembandaneni zoke zommango uthi, ‘Buthelelanani nize, hlanganani mahlangothi woke emgidini womhlatjelo enginilungiselela wona. Kuzakuba mhlatjelo omkhulu phezu kweentaba zakwa-Israyeli. Iye, nizokudla inyama nisele neengazi.

¹⁸ Nizokudla inyama yeengorho nisele iingazi zeenkhulu zephasi, kube ngathi nidla amaqama, iimvana, iimpongo, iinkunzi nakho koke okunonisiweko kweBhatjhani.

¹⁹ Nizokudla amanoni benisuthe, nisele iingazi benibe burhenge emhlatjelwenami enginilungiselela wona lowo.

²⁰ Esithebeni sami nizokudla benisuthe inyama yeenjomani nabakhweli bazo, iingorho nemihlobohlobo yamajoni.’ Kutjho uSomnini uSomandla.

²¹ “Ngizokubonakalisa iphazimulwami hlangana nezizwe; zoke izizwe zizakubona isigwebo sami engisikhuphileko nesandla sami engisibeke phezu kwazo.

²² Kusukela mhlokho ukuya phambili, indlu yakwa-Israyeli izakwazi bonyana nginguSomnini uZimayo.

²³ Nezizwe zizakwazi bonyana indlu yakwa-Israyeli yaya ekuthunjweni ngebanga lecala layo ngombana akhange yethembeke kimi. Nje-ke ngabufihla ubuso bami ebantwini bakwa-Israyeli ukuze ngibanikelele esandleni samanababo ngalokho boke bawe ngesabula.

²⁴ Ngabaphatha njengokusilaphala kwabo nangeemphambeko zabo, ngabufihla ubuso bami kibo.

²⁵ “Ngalokho nakhu okutjhiwo nguSomnini uSomandla, ‘Kwanje khona, ngizokutjhugulula ubujamo bakaJakopo, ngibe nesirhawu kiyo yoke indlu ka-Israyeli; ngibe nesikhwele ngebizo lami elicwengileko.

²⁶ Bazalikhohlwa ihlazo labo nakho koke ukungathembeki kwabo kimi, lokha nabebazihlalele enarhenabo baphephile begodu kungekho ozabethusa.

²⁷ Ngizazibonakalisa ngabo ngingocwengileko phambi kwezizwe ezinengi lokha nangibabuyisa ezizweni, ngibabuthelele kobana basuke eenarheni zezitha zabo.

²⁸ Nje-ke bazakwazi bonyana nginguSomnini uZimabo ngombana ngabathumela ekuthunjweni hlangana nezizwe begodu ngabuye ngababuthelela kobana babuyele enarheni ekungeyabo. Angeze ngisatjhiya noyedwa wabo hlangana nezizwe.

²⁹ Angeze ngisabufihla ubuso bami kibo ngombana ngizokuthululela uMoyami phezu kwendlu yakwa-Israyeli.’ ” Kutjho uSomnini uSomandla.