UHEZEKIYELI 36 - IsiNdebele 2012 Translation

Isiphorofido mayelana neentaba zakwa-Israyeli

^1-2 Nakhu okutjhiwo nguSomnini uSomandla: “Wena ndodana yomuntu, phorofida mayelana neentaba zakwa-Israyeli. Iye, yitjho eentabeni zakwa-Israyeli bonyana zilalele ilizwi lakaSomnini elithi, ‘Mayelana nani ntaba zakwa-Israyeli, isitha sathi: Arha! Begodu sathi: Imibundu yekadeni seyibe lilifa lethu!’

³ “Nje-ke, wena ndodana yomuntu phorofida bonyana uSomnini uSomandla uthi, ‘Isitha sinenze umonakalo nina ntaba zakwa-Israyeli begodu sinilumalume mahlangothi woke ukuze nibe lilifa lemisalela yezizwe; iye, nibe yihlebo namahlebezi wabantu.

⁴ Ngebangelo, nina ntaba zakwa-Israyeli, yizwani ilizwi lakaSomnini uSomandla owakhuluma neentaba nemibundu, imilanjana nemirhoba, amarubhi, iindawo ezethusako namadorobho atjhiyiweko, asele aphenduke ipango nesiphoqo kumisalela yezizwe mazombe.

⁵ Iye, yizwani ilizwi lakaSomnini uSomandla elithi: Mbala ngikhulume ngesikhwele sami esivuthako ngokujamelana nemisalela yezizwe nangokujamelana ne-Edomu yoke eyahlosa ngehliziyo enamileko nangokunyaza bonyana inarhami ibe lilifa layo begodu izithathele idlelo layo njengepango.’

⁶ “Nje-ke, ndodana yomuntu, phorofida mayelana nenarha yakwa-Israyeli, ukhulume eentabeni nemibundwini, emilanjaneni nemirhobeni uthi, ‘Nakhu okutjhiwo nguSomnini uSomandla: Qalani, esikhweleni nelakeni lami ngikhulumile. Ngebanga lokobana nina nithwele ihlazo lezizwe;

⁷ ngalokho mina Somnini Somandla ngisuse isandla sami ukuqinisekisa bonyana kwamambala izizwe ezinizombelezileko ngizo ezizokuthwala ihlazo.’

⁸ “Kodwana nina ntaba zakwa-Israyeli, nizakutlhurha iingala zenu benihlome iinthelo zenu ebantwini bami u-Israyeli ngombana masinyana bazakuba sekhaya.

⁹ Nje-ke qalani, ngiyaninaka, ngizakuphendukela kini, nizakulinywa benitjalwe.

¹⁰ Phezu kwenu, ntaba zakwa-Israyeli, ngizakwandisa abantu, okutjho indlu yoke yakwa-Israyeli, iye, ngonina. Amadorobho azakuhlalwa namarubhi avuselelwe.

¹¹ Ngizakwandisa phezu kwenu abantu nefuyo. Iye, abantu nefuyo kuzakunotha kwande begodu ngizanenza nihlaleke njengekuthomeni, nginenzele okuhle okudluleleko kunaphambilini. Nje-ke nizakwazi bonyana nginguSomnini.

¹² Iye, ngizakwenza abantu bakhambakhambe phezu kwenu, okutjho abantu bami u-Israyeli. Bazanithumba nina ntaba zakwa-Israyeli, nibe lilifa labo. Anizukwenza abantwana babo bafe.”

¹³ Nakhu okutjhiwo nguSomnini uSomandla: “Mbala, abantu bathi, ‘Wena ntaba yakwa-Israyeli uyindawo erhiribidela abantu begodu ube yindawo eyenza isizwe sakho singabi nabantwana.’

¹⁴ Nje-ke, angeze usarhiribidela abantu namkha wenze isizwe sakho bona singabi nabantwana.” Kutjho uSomnini uSomandla.

¹⁵ “Angeze ngisakuvumela wena narha bona uzwe isiphoqo sezizwe, angekhe usathwala ihlazo labantu bewubangele abantu bakho ukuwa.” Kutjho uSomnini uSomandla.

¹⁶ Ilizwi lakaSomnini lafika kimi lathi:

¹⁷ “Ndodana yomuntu, lokha indlu ka-Israyeli nayisahlala enarhenayo, bayisilaphaza inarha ngemikhubayo nangezenzo zayo. Ukuziphatha kwayo phambi kwami bekunjengomfazi osilapheleko esikhathini sakhe.

¹⁸ Yeke ngathululela ilaka lami phezu kwabo ngebanga leengazi abazithulula enarheni nangebanga lamanyala okubosingazimu abasilaphaza ngawo inarha.

¹⁹ Ngalokho ngabasabalalisa hlangana nezizwe, nje-ke bahlakazwa eenarheni. Ngabagweba ngokuya ngemikhubabo nangezenzo zabo.

²⁰ Lokha nabafika ezizweni ebebahlakazelwe kizo, basilaphaza ibizo lami elicwengileko ngombana abantu bathi kibo, ‘Laba babantu bakaSomnini, kodwana nanyana kunjalo, bekufanele baphume enarhenakhe.’

²¹ Kodwana ngikhathazekile ngebizo lami elicwengileko elasilaphazwa yindlu yakwa-Israyeli hlangana nezizwe eyafika kizo.

²² Ngalokho khuluma endlini yakwa-Israyeli uthi, ‘Nakhu okutjhiwo nguSomnini uSomandla: Akusingebanga lakho, wena ndlu yakwa-Israyeli, kobana ngithathe igadango, kodwana kungenca yebizo lami elicwengileko enalisilaphaza hlangana nezizwe enafika kizo.

²³ Nje-ke ngizokuveza ukucwengeka kwebizo lami elikhulu nelisilaphazweko hlangana nezizwe, iye, lelo enilihlambalaze phakathi kwazo. Kulapho-ke, lapha izizwe zizakwazi khona bonyana nginguSomnini, lokha nangizibonakalisa ngani phambi kwazo bona mina ngecwengile.’ ” Kutjho uSomnini uSomandla.

²⁴ “Ngizonisusa ezizweni, nginibuthe kiwo woke amazwe, nginibuyise enarhani yekhenu.

²⁵ Ngizonifafaza ngamanzi acwebileko bese nihlambuluka kikho koke ukusilaphala; iye, nakiwo woke amanyala okubosingazimu, nginihlambulule.

²⁶ Ngizanidalela ihliziyo etja, ngifake ummoya omutjha ngaphakathi kwenu. Ngizakukhupha ngaphakathi kwenu ihliziyo yelitje, nginiphe ihliziyo ethambileko.

²⁷ Ngizakufaka ngaphakathi kwenu uMoyami, nginenze nikhambe eemisweni zami nokobana nilonde imithethwami beniyenze.

²⁸ Nizakuhlala enarheni engayinikela abayihlomkhulu, nibe babantu bami, nami ngibe nguZimenu.

²⁹ Ngizanihlenga kikho koke ukusilaphala kwenu, ngiyale amabele abe khona ngiwenze abe linala nendlala ngingasayehliseli kini.

³⁰ Ngizakwenza iinthelo zemithi nesivuno sesimu bona sihlome khulu ukuze ningasezwa godu ihlazo lokuphodlheka ngendlala hlangana nezizwe.

³¹ Nje-ke nizakukhumbula iindlela zenu zokonakala nezenzo zenu ezimbi. Nizazinyenya ngebanga lezono zenu nezenzo zenu ezikghabhudlhako.

³² Akwazeke kuhle kini bonyana akusingebanga lenu kobana ngithathe igadango! Kodwana zigobeni, nizisole ngenca yeendlela zenu, nina ndlu ka-Israyeli.” Kutjho uSomnini uSomandla.

³³ “Nakhu okutjhiwo nguSomnini uSomandla, ‘Ngelanga enginihlambulula ngalo ecaleni lenu ngizakwenza amadorobho kobana ahlaleke; iye, amarubhi azakuvuselelwa

³⁴ nenarha ebesele itjhiyiwe izakulinywa esikhundleni sokobana ibe libhudu emehlweni wabo boke abadlula ngendlela.

³⁵ Abantu bazakuthi inarha ebesele itjhiyiwe, seyiphenduke yafana nesivande se-Edeni. Amadorobho ebegade asele amarubhi nalawo ebegade adiliziwe njenganje sele anemithangala begodu ayahlaleka.’

³⁶ Nje-ke, izizwe mazombe eziseleko zizakwazi bonyana mina Somnini ngiyakhile imizi egade ibhuruziwe, ngatjala lapha bekungasenalitho khona. Iye, mina Somnini ngikhulumile begodu ngizokwenza lokho.”

³⁷ Nakhu okutjhiwo nguSomnini uSomandla: “Godu ngizakuvumela indlu yakwa-Israyeli ingibawe bonyana ngiyenzele lokhu: Ukwandisa abantu bayo njengomhlambi.

³⁸ Iye, babe njengomhlambi wemihlabelo yeJerusalema ngesikhathi seminyanya. Ngokunjalo amadorobho egade asele atjhiyiwe, azakugcwala imihlambi yabantu. Nje-ke bazakwazi bonyana nginguSomnini.”