UHEZEKIYELI 32 - IsiNdebele 2012 Translation

Ingoma yesililo ngoFaro

¹ Ngomnyaka wetjhumi nambili lokha inyanga yetjhumi nambili inelanga linye, ilizwi lakaSomnini lafika kimi lathi:

² “Ndodana yomuntu, khalela ingoma yesililo ngoFaro ikosi yeGibhide, uthi kuye, “ ‘Ube njengebhubezana hlangana nezizwe, iye, unjengengwenya emanzini amanengi. Uthumbuke ngaphakathi kwemilambakho, udunge amanzi ngeenyawo zakho, wasilaphaza imilanjana yamanzi amanengi.

³ “ ‘Nje-ke, nakhu okutjhiwo nguSomnini uSomandla: “ ‘Ngizokweneka inedami ngaphezu kwakho, ngokusekelwa mkhambathi wezizwe ezinengi; wona uzakurhurhulela ngaphandle ngesirhurhulanede sami.

⁴ Ngizokuphosela phasi, ngikujikijele emmangweni, bengenze neenyoni zomkayi zihlale phezu kwakho, ngisuthise zoke iimbandana zephasi ngawe.

⁵ Ngizokweneka inyamakho eentabeni, ngizalise imirhoba ngeemphethu zakho.

⁶ Ngizokwenya inarha ngamanzi wesidumbu avinyilika eengazini zakho bekube seentabeni; imilanjana izakuzala okuncinca kuwe.

⁷ “ ‘Lokha nangikucimako ngizokugubuzesa amazulu, ngenze iinkwekwezi zawo zibe mnyama; ngisibekele ilanga ngamafu nenyanga ingasadarhi.

⁸ Yoke imikhanyo yezulwini ngizoyenza mnyama ngehla kwakho, ngibeke ubumnyama phezu kwenarhakho.’ “Kutjho uSomnini uSomandla.

⁹ “ ‘Ngizokukhubekisa iinhliziyo zabanengi lokha nangiletha ukubhujiswa kwakho hlangana nezizwe, eenarheni ongazaziko.

¹⁰ “ ‘Iye, ngizokwenza bonyana abantu abanengi bamangale ngawe. Iinhluthu zamakhosabo zizokubophana ngevalo ngenca yakho lokha nangisikaza isabulami phambi kwawo. Ngelanga lokuwa kwakho omunye nomunye uzakuthuthumelela ipilwakhe ngeenkhathi zoke.’

¹¹ Mbala, nakhu okutjhiwo nguSomnini uSomandla: “ ‘Isabula yekosi yeBhabheli iyeza phezu kwakho.

¹² Ngizokuwisa isiqubuthu sakho ngeensabula zeengorho, zoke okuzizizwe ezinelunya ngokudluleleko. Zizakuphelisa ukuziphakamisa kweGibhide nesiqubuthu sakhona soke sirhayilwe.

¹³ Ngizokubhubhisa yoke ifuywayo emagegana namanzi amanengi. Angeze asadungwa linyawo lomuntu namkha ziinqatha zefuyo.

¹⁴ Nje-ke ngizakwenza amanzi weGibhide atsenge begodu ngenze nemilanjana yakhona igeleze njengamafutha.’ “Kutjho uSomnini uSomandla.

¹⁵ “ ‘Lokha nangenza iGibhide ibe libhudu, inarha nayemukwe koke okukiyo nalokha ngiphobola boke abahlali bayo, bazakwazi bonyana nginguSomnini.’ ”

¹⁶ “Leso-ke sililo; amadodakazi wezizwe kufuze asikhalele; akasikhalele ngeGibhide nangesiqubuthu sayo soke. Iye, akasikhalele.” Kutjho uSomnini uSomandla.

¹⁷ Ngomnyaka wetjhumi nambili lokha inyanga yokuthoma inamalanga alitjhumi nahlanu, ilizwi lakaSomnini lafika kimi lathi:

¹⁸ “Ndodana yomuntu, rhahlawula ngesiqubuthu seGibhide. Wena namadodakazi wezizwe ezinamandla sehliseleni elizweni labangaphasi, kilabo abehlele emgodini wokufa.

¹⁹ “Yewuthi kiyo iGibhide, ‘Wena udlula bani ngobuhle na? Yehlela phasi, ulaliswa nabarhedeni.’

²⁰ “Abantu beGibhide bazakuwela phakathi kwababulewe ngesabula; iye, iGibhide yanikelwa esabuleni. Dosani iGibhide nesiqubuthu sayo soke!

²¹ Ngaphakathi kwendawo yabafileko amakhosana anesibindi azakukhuluma ngoFaro nabasizi bakhe athi: Nabo behlile, ngalokho abarhedeni ababulewe ngesabula balele.

²² “I-Asiriya ilapho nomkhambathayo woke, imikghadi yeendumbu zawo izombeleze ikosi yakhona, iye, boke ababuleweko bebawa ngesabula.

²³ Imikghadi yeendumbu zama-Asiriya emgodini wokufa ibekelwe emuva; umkhambathi we-Asiriya uzombeleze umkghadi wesidumbu sekosi. Boke labo bebabulewe bebawa ngesabula, okutjho labo okwathi nabasaphilako baletha ivalo elizweni labaphilako.

²⁴ “I-Elamu nayo ilapho nesiqubuthu sayo soke esizombeleze umkghadi wesidumbu sekosi, okutjho boke ababuleweko bebawa behlela phasi babarhedeni elizweni labangaphasi. Iye, labo okwathi nabasaphilako, baletha ivalo elizweni labaphilako; nje-ke bathwele ihlazo kanye nalabo ebehlele emgodini wokufa.

²⁵ I-Elamu bayilungisele umkghadi weendumbu kanye nesiqubuthu sayo soke hlangana nababuleweko. Mazombe nekosi kunemikghadi yeendumbu zama-Elamu. Boke njalo babulawa ngesabula babarhedeni. Njengombana nabasaphilako baletha ivalo elizweni labaphilako, bathwele ihlazo labo kanye nalabo ebehlele emgodini wokufa. Iye, ikosi nayo ibekwe hlangana nababuleweko.

²⁶ “IMetjheki-Tubhali ikhona lapho nesiqubuthu sayo soke. Mazombe nekosi kunemikghadi yeendumbu zamaMetjheki-Tubhali. Boke njalo babulawa ngesabula babarhedeni ngombana nabasaphilako baletha ivalo elizweni labaphilako.

²⁷ Labo phakathi kwabarhedeni abawileko, abakalali neengorho ezehlela endaweni yabafileko neenkhali zazo zepi: Abantu basamelisa iingorho iinsabula zazo, kuthi iinhlangu zibe phezu kweendumbu zazo. Kuba njalo nanyana zabanga ivalo elizweni labaphilako.

²⁸ “Nje-ke, wena Faro uzokwephulwa bese ulaliswa hlangana nabarhedeni, iye, labo ababulewe ngesabula.

²⁹ “I-Edomu nayo izakuba lapho, okutjho amakhosayo namakhosanayo woke okuzakuthi nangaphezu kobungorho bawo alaliswe nababulewe ngesabula. Iye, wona azakulala nabarhedeni nalabo abehlele emgodini wokufa.

³⁰ “Iinduna zetlhagwini nazo zizakuba lapho. Iye, zoke kanye nawo woke amaTsidoni okungilabo abazakwehlela phasi nababuleweko ngehlazo nangaphezu kwevalo abaliletha ngebanga lamandlabo. Nje-ke bazakulala babarhedeni kanye nalabo ababulewe ngesabula, bathwale ihlazo labo kanye nalabo abehlele emgodini wokufa.

³¹ “Labo-ke uFaro uzababona abe atjhiriyeke mayelana nesiqubuthu sakhe soke. Iye, yena namajonakhe woke bazakubulawa ngesabula.” Kutjho uSomnini uSomandla.

³² “Nanyana uFaro ngimvumele kobana alethe ivalo elizweni labaphilako, yena nesiqubuthu sakhe bazakulaliswa hlangana nabarhedeni kanye nalabo ababulewe ngesabula.” Kutjho uSomnini uSomandla.