UHEZEKIYELI 30 - IsiNdebele 2012 Translation

Ingoma yesililo ngeGibhide

¹ Ilizwi lakaSomnini lafika kimi lathi:

² “Ndodana yomuntu, phorofida, ukhulume bonyana nakhu okutjhiwo nguSomnini uSomandla, “ ‘Lilani nithi: Maye mhlokho!

³ Mbala, ilanga litjhidele, iye, ilanga lakaSomnini litjhidele, kuzokuba lilanga lamafu anzima, kube sikhathi sesizi ezizweni:

⁴ Isabula izokungena eGibhide! Kuzokuba nokuthuthumela eKutjhe, lokha nakuwa abalinyaziweko eGibhide, iye, lokha nakuthathwa umnothwayo nalokha iinsekelo zayo nazidilizwako.

⁵ IKutjhe, iPuthi, iLudi, boke abantu abayicubevange iLibhiya nabantu benarha enesivumelwano nayo bazakuwa ngesabula kanye neGibhide.’

⁶ “Nakhu okutjhiwo nguSomnini, “ ‘Abasekela iGibhide bazokuwa, namandlayo wokuzikhakhazisa azokuphela. Ukusuka eMigidoli ukufika eSiyene bazakuwa ngesabula ngaphakathi kwayo.’ Kutjho uSomnini uSomandla.

⁷ ‘IGibhide izakuba libhudu phakathi kweenarha ezimarubhi namadorobhayo azakuba hlangana namadorobho adilizweko.

⁸ Bazakwazi bonyana nginguSomnini lokha nangithungelela umlilo eGibhide, nalokha nakwephulwa boke abasizi bayo.’

⁹ “Mhlokho kuzakuphuma iinthunywa kimi ngemikhumbi kobana ziyokwethusela amaKutjhe asazigedlile. Isizi lizawehlela ngelanga leGibhide. Mbala, ilangelo liyeza.

¹⁰ “Nakhu okutjhiwo nguSomnini uSomandla, “ ‘Ngizokuphelisa ukuphuphuma kweGibhide ngesandla sakaNebukadinetsari ikosi yeBhabheli.

¹¹ Yena nebutho lakhe, ekuzizizwe ezinelunya ngokudluleleko, bazakulethwa bonyana babhubhise inarha. Bazakurhwatjha iinsabula zabo ngokujamelana neGibhide, bazalise inarha ngabalinyaziweko.

¹² Ngizokomisa imisele yeNayili, ngithengise inarha ezandleni zeenkhohlakali; iye, ngezandla zemiqhamuka ngizokubhubhisa inarha nakho koke okukiyo. Mina Somnini ngikhulumile.’

¹³ “Nakhu okutjhiwo nguSomnini uSomandla, “ ‘Ngizokubhubhisa amanyala okubosingazimu bengiphelise abozinyana eMemfisi. Nje-ke, angeze kusabakhona ikosana enarheni yeGibhide; iye, ngizokusabalalisa ukwesaba enarheni yeGibhide.

¹⁴ Ngizokwenza iPatrosi ibe libhudu, ngithungelele umlilo eTsowani bengehlisele iingwebo eThebe.

¹⁵ Ngizokuthululela ilaka lami phezu kweSini, okusiphephelo seGibhide, ngiphelisa ukuphuphuma kweThebe.

¹⁶ Ngizokuthungelela umlilo eGibhide; iSini libe sebuhlungwini obukhulu. IThebe lizakufohlwa, iMemfisi lizakuhlalela evalweni.

¹⁷ Amasokana we-Aweni newePhi-Besethi azakuwa ngesabula nemizalo ithunjwe.

¹⁸ ETarhipanirhesi imini izakuba bumnyama lokha nangephula iinkeyi zeGibhide; amandla weGibhide wokuzikhakhazisa azakuphelela lapho. Idorbhelo lizakwembeswa mamafu nemizanalo isiwe ekuthunjweni.

¹⁹ Iye, ngizokwehlisela iingwebo eGibhide; ngalokho bazakwazi bonyana nginguSomnini.’ ”

²⁰ Ngomnyaka wetjhumi nanye lokha inyanga yokuthoma inamalanga alikhomba, ilizwi lakaSomnini lafika kimi lathi:

²¹ “Ndodana yomuntu, ingalo kaFaro ikosi yeGibhide ngiyephulile. Nje-ke qala-ke, ayikabi ukubotjhwa kobana iphole namkha isekelwe ngokuyibopha ngeqolo ukuze iqine bonyana ikwazi ukubamba isabula.

²² Ngalokho nakhu okutjhiwo nguSomnini uSomandla, ‘Qala, ngijamelene noFaro ikosi yeGibhide. Nje-ke ngizozephula zomibili iingalo zakhe, yona leyo eqinileko naleyo eyephukileko; ngenze isabula iziwele esandleni sakhe.

²³ Ngizokuhlakazela amaGibhide hlangana nezizwe ngiwasabalalisele eenarheni.

²⁴ Ngizokuqinisa iingalo zekosi yeBhabheli, ngibeke isabulami esandleni sayo. Kodwana iingalo zakaFaro zona ngizozephula, abe aqume ukuquma komuntu olinyaziweko phambi kwekosi yeBhabheli.

²⁵ Ngizokuqinisa iingalo zekosi yeBhabheli, kodwana zakaFaro zona zizokuhlepha. Bazakwazi bonyana nginguSomnini lokha nangibeka isabulami esandleni sekosi yeBhabheli; izayelula enarheni yeGibhide.

²⁶ Ngizokuhlakazela amaGibhide hlangana nezizwe ngiwasabalalisele eenarheni. Ngalokho azakwazi bonyana nginguSomnini.’ ”