UHEZEKIYELI 3 - IsiNdebele 2012 Translation

¹ Godu ilizwi lathi kimi: “Ndodana yomuntu, yidla lokho okuphambi kwakho; yidla umsongo lo bese uyakhamba uyokukhuluma endlini ka-Israyeli.”

² Nje-ke ngavula umlomami uSomnini wangidlisa umsongo.

³ Wathi kimi: “Ndodana yomuntu, yidla umsongo engikunikela wona lo ugcwalise isisu sakho ngawo.” Yeke ngawudla, ngawizwa ngemlonyenami unandipha njengeliju leenyosi.

⁴ Wathi kimi: “Ndodana yomuntu, khamba uye endlini yakwa-Israyeli ufese ukhulume kiyo amezwami.

⁵ Awuthunyelwa ebantwini abanekulumo elikhuni nelimi elingazwakaliko, kodwana endlini ka-Israyeli.

⁶ Akusibo abantu abanengi nesizwe esinekulumo elikhuni nelimi elingazwakaliko, namezwabo ongeze wawezwisisa. Mbala, nakube ngikuthumele kibo, bona bazakuzwisisa.

⁷ Kodwana indlu yakwa-Israyeli angekhe yakulalela ngebanga lokobana ayikazimiseli ukungilalela. Ngalokho, yoke indlu yakwa-Israyeli ineempandla eziqinileko neenhliziyo ezilikhuni.

⁸ Qala-ke, ngenze ubuso bakho baqina njengobuso babo nepandlakho yaqina njengeempandla zabo.

⁹ Ipandlakho ngiyenze yaba njengedayimani, iye, iqine ukudlula ilitje lomlilo. Ungabesabi namkha umangale ngokuqala kwabo ngombana vele bayindlu ehlubukako.”

¹⁰ Godu wathi kimi: “Ndodana yomuntu, woke amezwi engizawakhuluma kuwe, amukele ngehliziyo uwalalele ngendlebe.

¹¹ Nje-ke khamba uye kubathunjwa ufese uthi, ‘Nakhu okutjhiwo nguSomnini uSomandla’; yitjho njalo nanyana bayalalela namkha bayakhunyalala.”

¹² Ummoya wangiguga, ngezwa ngemva kwami umdumo wokuraramba okukhulu lokha nakuphakama iphazimulo kaSomnini endawenayo.

¹³ Bekulitjhada lokuthintana kweempiko zeemphili kanye nomdumo wamavili asemaqadi kwazo; iye, bekumdumo wokuraramba okukhulu.

¹⁴ Ummoya wangiguga wangithwala wangisusa lapho. Ngakhamba ngimunyu ekufuthekeni kommoyami. Isandla sakaSomnini saba nzima phezu kwami.

¹⁵ Ngeza eTele-Abibi, ebathunjweni ebegade bahlala ngemlanjeni iKebari. Ngahlala lapho phakathi kwabo; ngangimangele amalanga alikhomba.

UHezekiyeli ubekwa njengomlindi

¹⁶ Ekupheleni kwamalanga alikhomba, ilizwi lakaSomnini lafika kimi lathi:

¹⁷ “Ndodana yomuntu, ngikubeka bona ube mlindi wendlu yakwa-Israyeli. Ngesikhathi soke lokha nawuzwa ilizwi emlonyenami, ngiyelelisela yona.

¹⁸ Lokha nangithi esikhohlakalini, ‘Uzakufa nokufa’ bese wena ungasiyelelisi, iye, ungakhulumi naso kobana usiyelelise ngobukhohlakali baso ukuze usindise ipilwaso, isikhohlakaleso sizakufa ngebanga lecala laso; kodwana iingazi zaso ngizazibiza esandleni sakho.

¹⁹ Kodwana wena nakube uyelelisa isikhohlakali bese singaphenduki ebukhohlakalini baso, sona sizakufa ngebanga lecala laso, wena-ke uzabe usindise ipilwakho.

²⁰ Godu nakube olungileko ujika ekulungeni kwakhe enze okumbi bese ngibeka isiliyo phambi kwakhe, yena uzakufa. Ngebanga lokobana ungakhange umyelelise, mbala uzakufa ngenca yezono zakhe nezenzo zokulunga azenzileko angeze zisakhunjulwa; kodwana iingazi zakhe ngizazibiza esandleni sakho.

²¹ Nokho, nakube wena umyelelisile olungileko kobana angoni bese yena akoni, mbala uzakuphila ngombana uthethe isiyeleliso. Wena uzabe usindise ipilwakho.”

USomnini uzibonakalisa kuHezekiyeli godu

²² Lokha nabe ngihlezi ebathunjweni isandla sakaSomnini besiphezu kwami, nje-ke wathi kimi: “Sikima, uphume uye ngemrhobeni, ngizakukhuluma nawe lapho.”

²³ Nje-ke ngasikima ngaya ngemrhobeni. Qala, naso iphazimulo kaSomnini ijame njengaleyo engayibona ngemlanjeni iKebari. Yeke ngawa ngobuso phasi.

²⁴ Ummoya wangena kimi wangisikimisa ngajama. Wakhuluma nami wathi: “Khamba uyozivalela ngendlinakho.

²⁵ Nje-ke, wena ndodana yomuntu, uzakubekwa iintambo, iye, uzakubotjhwa ngazo ukuze ungakghoni ukutjhaphuluka kizo.

²⁶ Ngizakwenza ilimu lakho linamathele kurhwalabhakho, ube simumu uhluleke ukukhalima abantu bakwa-Israyeli ngombana bayindlu ehlubukako.

²⁷ Kodwana nangikhuluma nawe ngizakuvula umlomakho bese uthi kibo, ‘Nakhu okutjhiwo nguSomnini uSomandla’. Akuthi loyo ozwako, ezwe; kuthi loyo ongafuni ukwuzwa, ahlale angezwa ngombana bayindlu ehlubukako.”