UHEZEKIYELI 28 - IsiNdebele 2012 Translation

Isiphorofido ngekosi yeTirosi

¹ Ilizwi lakaSomnini lafika kimi lathi:

² “Ndodana yomuntu, yewukhulume embusini weTirosi bonyana nakhu okutjhiwo nguSomnini uSomandla, “ ‘Nanyana umumuntu nje ungasiso isidalwa sezulu, ulinganise umkhumbulwakho nowesidalwa sezulu. Umkhumbulwakho uyazikhakhazisa, uzitjela uthi: Ngisidalwa sezulu, ngihlezi esihlalweni sobukhosi babozinyana, ehliziyweni yamalwandle.

³ Wena udlumbana bona uhlakaniphe ukudlula uDanyela! Koke okufihlakeleko akusinzima kuwe!

⁴ Ngokuhlakanipha nelemuko lakho uzizuzele ubunjinga bakho, wazibuthelelela igolide nesiliva endlinakho yamagugu!

⁵ Ngokuhlakanipha kwakho okudluleleko, iye, ngekghono lakho lokurhweba wengezelele umnothwakho! Mbala, umkhumbulwakho uyazikhakhazisa ngebanga lomnothwakho.’

⁶ “Ngalokho nakhu okutjhiwo nguSomnini uSomandla: “ ‘Njengombana ulinganise umkhumbulwakho nowesidalwa sezulu

⁷ ngalokho ngizokulethela imiqhamuka, kobana ijamelane nawe; iye, izizwe ezinelunya ngokudluleleko. Zona zizokurhwatjha isabula iphambane nobuhle obukuzuzele ukuhlakanipha, zisilaphaze iphazimulwakho.

⁸ Zizokwehlisela endaweni yabafileko, ufe ukufa kolinyaziweko ehliziyweni yamalwandle.

⁹ Uzalokhu uphikelela bona usidalwa sezulu, lokha nawuqalene nababulali na? Kuzakukhanya bona umumuntu awusiso isidalwa sezulu, lokha nawusezandleni zabakulimazako!

¹⁰ Ezandleni zemiqhamuka uzakufa ukufa kwabarhedeni. Mbala, ngikhulumile mina.’ Kutjho uSomnini uSomandla.”

¹¹ Ilizwi lakaSomnini lafika kimi lathi:

¹² “Ndodana yomuntu, khalela ingoma yesililo ngekosi yeTirosi, ngamezwi atjhwiwe nguSomnini uSomandla nasithi, “ ‘Wena bewusibonelo sokupheleliswa, uzele ukuhlakanipha uphelele ngobuhle.

¹³ Bewuse-Edeni, isivande sakaZimu, uhlobe ngelinye nelinye ilitje eliligugu: irubi, ithopazi nedayimani, ibherili, i-oniksi nejasipere, isafaya, isimaragidu ne-emeraldi. Ukuhloba kwakho bekungekwegolide, okuzizinto ezalungiswa mhlana udalwako.

¹⁴ Bewulikerubhi elivikelako elineempiko ezivulekileko. Ngakubeka entabeni ekhethekileko yabozinyana. Bewuhlangana namatje womlilo, ukhambakhamba lapho.

¹⁵ Eendleleni zakho bewungasolisi, kusukela ilanga owadalwa ngalo, bekwaba kulapha ubumbi bufunyaneka khona kuwe.

¹⁶ Ngebanga lerhwebo lakho elandileko, wagcwaliswa ngenturhu bewona. Nje-ke, ngakusilaphaza, ngakususa entabeni yabozinyana, iye, hlangana namatje womlilo; ngakubhubhisa wena kerubhi elivikelako.

¹⁷ Umkhumbulwakho wazikhakhazisa ngobuhle bakho. Wonakalisa ubuhlakani bakho ngenca yephazimulwakho. Ngalokho ngakuphosela phasi, ngakuneka phambi kwamakhosi kobana akhe akubone.

¹⁸ Ngobunengi bamacalakho, ngokungathembeki ekurhwebeni kwakho usilaphaze iindawo zakho ezikhethekileko. Nje-ke ngaqubula umlilo ngaphakathi kwakho, wakuqothule. Ngakuphendula umlotha ehlabathini phambi kwabo boke ebegade bakuqalile.

¹⁹ Boke abakwaziko ezizweni bakakamala ngawe; sewuphenduke isethuso begodu angekhe usabakhona.’ ”

Isiphorofido ngeTsidoni

²⁰ Ilizwi lakaSomnini lafika kimi lathi:

²¹ “Ndodana yomuntu, qalisa ubuso bakho ngeTsidoni bese uphorofida ngokujamelana nalo,

²² uthi, ‘Nakhu okutjhiwo nguSomnini uSomandla: “ ‘Qala, ngijamelene nawe Tsidoni; ngizozidumisa phakathi kwakho.’ Iye, bazakwazi bonyana nginguSomnini, lokha nangehlisela iingwebo phakathi kwalo nalokha nangibonakalisa ukucwenga kwami kilo.

²³ Ngizokuthumela isifo kilo, iingazi zigeleze eendledlaneni zalo. Abalinyaziweko bazakuwa ngaphakathi kwalo ngebanga lesabula ejamelene nalo nca zoke. Nje-ke bazakwazi bonyana nginguSomnini.

²⁴ “Indlu ka-Israyeli angeze isafunyana umunga ozayihlaba neliva lokuyilimaza kwabayizombelezileko, iye, labo abayidelelako. Bazakwazi bonyana nginguSomnini uSomandla.”

²⁵ Nakhu okutjhiwo nguSomnini uSomandla: “Lokha nangibuthelela bendlu ka-Israyeli hlangana nabantu abasabalele kibo nalokha nangibonakalisa ukucwenga kwami kibo phambi kwezizwe, bazakuhlala enarhenabo engayinikela incekwami uJakopo.

²⁶ Bazakuhlala kiyo bavikelekile, bakhe izindlu bebatjale neemvande zesidiribe. Iye, bazakuhlala bavikelekile lokha nangehlisela iingwebo phakathi kwabo boke ababadelelako nca zoke. Nje-ke bazakwazi bonyana nginguSomnini uZimu ka-Israyeli.”