UHEZEKIYELI 27 - IsiNdebele 2012 Translation

Isililo ngeTirosi

¹ Ilizwi lakaSomnini lafika kimi lathi:

² “Nje-ke wena ndodana yomuntu, khalela ingoma yesililo ngeTirosi.

³ Yithi kilo iTirosi elisemangenweni welwandle elibarhwebi hlangana nezizwe neenhlengele ezinengi, ‘Nakhu okutjhiwo nguSomnini uSomandla: “ ‘Wena Tirosi uzitjele bona nakunguwe uphelele ngobuhle.

⁴ Imikhawulwakho isehliziyweni yamalwandle. Abakhi bakho benze ubuhle bakho baphelela:

⁵ Bakwenzele zoke iingodo zemithi yemisayipurusi yeSeniri; bathathe umuthi womsedari eLibhanoni kobana bazokwenzela isika.

⁶ Ngemithi yama-owuku yeBhatjhani bakwenzele amaphini wokuthayisa. Indawo lapha kukhanjwa khona phezu komthayamanzi, bayenze ngemithi yomsayipurusi ephuma eenhlengeleni zamaKithi ehlotjiswe ngamazinyo wendlovu.

⁷ Ilineni lemibalabala lasuka eGibhide laba yiseyilakho, esiboniso sephawu; isisitho sakho esimthunzi ohlaza komkayi nobubende bewuphuma eenhlengeleni ze-Elitjha.

⁸ Abahlali beTsidoni ne-Arivadi bekubagwedli bakho; iinhlakaniphi zakho, Tirosi, bezingaphakathi kwakho, zona bezibatjhayisi bakho.

⁹ Abaphathi neenhlakani zeGebali bezingaphakathi kwakho, zivala iintunja. “ ‘Zoke iinthayamanzi zelwandle nabathayi bazo bebaphakathi kwakho bonyana barhwebe ngepahlakho.

¹⁰ Abantu bePheresiya, iLudi nePhuthi bebaphakathi kwebutho lakho njengamajonakho. Baphanyeka iinhlangu neenkupuru ngaphakathi kwakho, dorobho; bona bakulethela ubuphaziphazi.

¹¹ Amadoda we-Arivadi neRheleki bekaphezu komthangalakho mazombe; amaGamadi asemibhotjhongwenakho. Aphanyeka iinlanda zawo emithangaleni mazombe; aphelelisa ubuhle bakho.

¹² “ ‘Abantu beTharatjhitjhi barhwebelana nawe ngebanga lomnothwakho omkhulu: Ngepahlakho benana isiliva, isimbi, isinjana nomthofi.

¹³ Abantu beJavani, iTubali neMetjheki bebarhweba nawe. Bananiselana nawe ngabantu nangezitja zekoporo ngepahlakho.

¹⁴ Abavela eBhethe-Togarima bananiselana iinjomani, iinjomani zepi neemeyila ngepahlakho.

¹⁵ Amadoda weDedani arhwebisana nawe. Iinarha ezinengi eziseligwini lelwandle zaba ziindawo zakho zokuthengisela. Akulethela amazinyo wendlovu neengodo zakasinjana njengomthelwakho.

¹⁶ Abantu be-Aramu barhwebelana nawe ngebanga lobunengi bomkhiqizwakho. Bakunanisela ipahlakho ngesimaragidu, ngelineni elicolekileko lemibalabala nelibubende, ngekorali nangamarubi.

¹⁷ Inarha yakwaJuda neyakwa-Israyeli zirwebisana nawe. Zinanisela irhwebo lakho ikoroyi yeMinithi, iflowuru esefiweko, iliju, amafutha we-oliva nebhalisamu.

¹⁸ Abantu beDamaseku barhwebisana nawe ngebanga lobunengi bomkhiqizwakho, iye ngebanga lomnothwakho omkhulu: iwayini leRhelibhoni newulu emhlophe.

¹⁹ IVedana neJavana zikunanisela ipahlakho ngezinto ezibuya e-Uzali. Isimbi ethambileko, igcolo lomuthi wekhasiya nebhule bekuhlangana nerhwebo lakho.

²⁰ IDedani yona yarhwebisana nawe ngamatjhila weenhlalo zeenjomani.

²¹ I-Arabu namakhosana woke weKedari aba barhwebisani bakho. Arhwebelana nawe ngeemvana, ngamaqama nangeembuzi.

²² Abarhwebi beTjheba nebeRayema barhwebisana nawe. Bona-ke bananiselana nawe ipahlakho ngemihlobohlobo yoke yeenungo ezikhethekileko, nangawo woke amatje aligugu negolide.

²³ IRharana, iKane, i-Edeni, abarhwebi beTjheba nabantu be-Atjhuri neKilimadi barhwebisana nawe.

²⁴ Ekurhwebisaneni kwakho nabo barhwebisana nawe ngezambatho zakanokutjho, ngamanaka ahlaza komkayi nanemibalabala, ngeengubo ezinemibala emibili nangeentambo ezilukwe zaqina.

²⁵ Imikhumbi yokurhweba ikuthwalela ipahla yerhwebo lakho. “ ‘Nje-ke, wena mkhumbi Tirosi wagcwaliswa bewadiselwa ngaphakathi kwamalwandle.

²⁶ Abagwedli bakho bakuthatha bakusa emanzini amanengi. Ummoya wepumalanga wakuqobela ehliziyweni yamalwandle.

²⁷ Umnothwakho, ipahlakho, irhwebo lakho, abagwedli, abathayi nabathayisi bakho, abavala iintunja zakho nabarhweba ngepahlakho, woke amajonakho angaphakathi kwakho nomkhambathi woke ongaphakathi kwakho kunyelela ehliziyweni yamalwandle ngelanga lokuphahlaka kwakho.

²⁸ Ngokurhuwelela kwabathayi bakho amadlambi aphakamileko ayathuthumela.

²⁹ Boke ababambe amaphini wokugwedla batjhiya iinthayamanzi zabo, iye, boke abathayisi elwandle bajama eligwini.

³⁰ Barhuwelela ngawe, barhahlawule isililo esimunyu. Bazithela ngethuli lehlabathi ehloko bebazibhudabhude emlotheni.

³¹ Baguda ihloko ngebanga lakho, bembathe izambatho zesililo. Balila ngawe ngomphefumulo olisizi nangesililo esimunyu.

³² Nabasemahlungwini ngawe, balila bathi: Ngubani owakhe wathuliswa njengeTirosi ngaphakathi kwelwandle na?

³³ Lokha ipahlakho isakhiqizwa elwandle, wanelisa abantu abanengi; ngomnothwakho omkhulu nepahlakho, wanothisa amakhosi wephasi.

³⁴ Njenganje, uphahlazwe ngebanga lamalwandle ekuzikeni kwamanzi. Ipahlakho nomkhambathakho woke kucwile kanye nawe.

³⁵ Boke abahlala magegana nelwandle bayakhuza ngawe; iinhluthu zamakhosabo ziyabophana ngevalo nobuso bawo bunyamile;

³⁶ abarhwebi phakathi kwezizwe bayababaza ngawe. Sewuphenduke isethuso begodu angekhe usabakhona.’ ”