UHEZEKIYELI 26 - IsiNdebele 2012 Translation

Isiphorofido ngeTirosi

¹ Emnyakeni wetjhumi nanye elangeni lokuthoma lenyanga, ilizwi lakaSomnini lafika kimi lathi:

² “Ndodana yomuntu, njengombana iTirosi likhulume mayelana neJerusalema lathi, “ ‘Arha! Lidilikile iJerusalema okulisango labantu. Ipahlalo izakulethwa kimi, ngizakuzuza ngombana limarubhi!’

³ “ngalokho nakhu okutjhiwo nguSomnini uSomandla, “Qala, ngijamelene nawe, wena Tirosi, ngizokuvusa izizwe ezinengi ezijamelene nawe, njengelwandle nalivusa amagagasalo.

⁴ Zona zizokubhuruza imithangala yeTirosi, zephule nemibhotjhongwalo. Ihlabathalo ngizoyithanyela, ngilenze libe lidwala lakodwala.

⁵ Lizakuba yindawo yokomisa iinrhurhulanede ngaphakathi kwelwandle. “Iye, ngikhulumile mina.” Kutjho uSomnini uSomandla. “ITirosi lizakuba yipango ezizweni.

⁶ Imizana esenarhenalo, izakurhayilwa ngesabula. Nje-ke bazakwazi bonyana nginguSomnini.”

⁷ Mbala, nakhu okutjhiwo nguSomnini uSomandla: “Qala ngizokuletha eTirosi uNebukadiretsari ikosi yeBhabheli osuka ngetlhagwini, oyikosi yamanye amakhosi, afike neenjomani, iinkarana zepi nabakhweli bazo kanye nesiqubuthu esikhulu samajoni.

⁸ “Yena uzakurhayila ngesabula imizana esenarhenakho, wena Tirosi. Uzakwakha umbhotjhongo wepi ojamelene nawe, akhe iinqabo eziqhube emthangalenakho, ajamelane nawe angaphasi kwephahla leenhlangu.

⁹ Uzakusahlela imithangalakho ngekoloyana enomgqala aphohloze iinthala zabalindi ngemigqalakhe.

¹⁰ Ngebanga lomhlambi weenjomani zakhe uzakuvalwa lithuli. Ngebanga letjhada lamavili weenkarana zepi nabakhweli bazo imithangalakho izakudengezela lokha nangena emasangwenakho njengabantu abangena edorobheni elifohloziweko.

¹¹ Ngeenqatha zeenjomani zakhe, uzakonakalisa zoke iindledlana zakho Tirosi. Uzakubulala ibutho lakho ngesabula, iinsika zakho eziqinileko ziwele phasi.

¹² Bazakuphanga umnothwakho bebahlangule irhwebo lakho. Bazakudiliza imithangalakho bebaphohloze izindlu zakho ezihle. Amatjakho, iingodo nequqwako bazakuphosela emanzini.

¹³ Ngizakuthulisa umvumo weengoma zakho nomkenenezo wamaharibhanakho angekhe usezwakala.

¹⁴ Ngizakwenza ube lidwala lakodwala: Uzakuba yindawo yokomisela iinrhurhulanede. Angekhe usavuseleleka godu ngombana mina Somnini ngikhulumile.” Kutjho uSomnini uSomandla.

¹⁵ Nakhu okutjhiwo nguSomnini uSomandla kilo iTirosi: “Kghani iinarha ezimagegana nelwandle azizukuthuthumela ngomdumo wokuwa kwakho na? Iye, lokha abalinyaziweko nababongolelako nalokha nakubulawa ngesihluku ngaphakathi kwakho na?

¹⁶ Nje-ke woke amakhosana welwandle azakwehlika eenhlalweni zawo zobukhosi, abeke phasi amanakawo abe ahlubule nezambatho zawo ezimibalabala. Azakwembatha ngokuthuthumela; ahlale phasi ehlabathini aqhaqhazele ngesikhathi soke abe ababaze ngawe.

¹⁷ Azakurhahlawula isililo ngawe abe athi kuwe: “Maye ukurhayilwa kwakho, wena onabahlali abasuka emalwandle, wena olidorobho elidumileko, onamandla phezu kwelwandle, wena nabahlali bakho, iye, abahlali bakho abalethe ivalo ebantwini boke!

¹⁸ Kodwana kwanje iinarha ezimagegana nelwandle ziyathuthumela ngesikhathi sokuwa kwakho; iye, iinhlengele zikakamele ngokunyamalala kwakho.”

¹⁹ Nakhu okutjhiwo nguSomnini uSomandla: “Lokha nangikwenza idorobho lomonakalo, elinjengamadorobho anganazakhamuzi nalokha nangikugubuzesa ngamanzi ekuzikeni, iye amanzi amanengi akusibekele,

²⁰ nje-ke ngizakwehlisela kilabo abehlele emgodini wokufa, iye, ebantwini bakade. Ngizokwenza uhlale elizweni labangaphasi njengamarubhi wekadeni, iye, uzakuhlala nalabo abehlele emgodini wokufa ukuze ungasaba khona namkha ujame enarheni yabaphilako.

²¹ Ngizokwenza into ethusako begodu angekhe ubuye ube khona. Nanyana sewufunwa, angekhe nini nanini usafunyanwa godu.” Kutjho uSomnini uSomandla.