UHEZEKIYELI 25 - IsiNdebele 2012 Translation

Isiphorofido ngo-Amoni nangoMowabi

¹ Ilizwi lakaSomnini lafika kimi lathi:

² “Ndodana yomuntu, qalisa ubuso bakho ngebantwini bakwa-Amoni bese uphorofida ngokujamelana nabo.

³ Iye, khuluma kuma-Amoni uthi akalalele ilizwi lakaSomnini uSomandla, ‘Nakhu okutjhiwo nguSomnini uSomandla: Njengombana wena Amoni uthe “Arha!” ngendawami ecwengileko lokha nayisilaphazwako, nenarheni yakwa-Israyeli lokha nayitjhabalaliswako, nendlini yakwaJuda lokha nayithunjwako,

⁴ qala, sele ngizokunikela ebantwini bangepumalanga njengelifa. Bona bazakuhloma amatendabo angeenrhodlweni hlangana nawe, iye, bazenzele amahlalo phakathi kwakho. Bazakudla iinthelo zakho basele nebisi lakho.’

⁵ “Ngizakwenza iRabha idlelo lamakamela namadorobho wama-Amoni iindawo zokuphumula kwemihlambi. Nje-ke nizakwazi bonyana nginguSomnini.”

⁶ Mbala, nakhu okutjhiwo nguSomnini uSomandla: “Njengombana uwahle izandla wagida ngeenyawo zakho bewazinikela ebumenemeneni bewathakasa ngokwenzeke enarheni yakwa-Israyeli,

⁷ ngalokho qala, ngelule isandla sami ngokujamelana nawe, Amoni: Ngizokunikela njengepango ezizweni. Ngizokuthanyela hlangana nezizwe bengikubhubhise emazweni; iye, ngizokurhayila. Nje-ke, uzakwazi bonyana nginguSomnini.”

⁸ Nakhu okutjhiwo nguSomnini uSomandla: “Njengombana uMowabi noSeyiri bathi, ‘Yelelani, indlu yakwaJuda ifana nazo zoke ezinye izizwe’,

⁹ ngalokho qalani, sele ngizokudalula ihlangothi leentaba zakwaMowabi ukuze lingasabi namadorobho, iye, ukusukela emadorobheni asemkhawulweni ukuya eBhethe-Jetjhimothi, eBhali-Mewoni neKhiriyatayimu okuyingcenye ehle yenarha.

¹⁰ Ngizokunikela nama-Amoni ebantwini bangepumalanga njengelifa ukuze angasakhumbuleki hlangana nezizwe

¹¹ begodu ngizokwehlisela iingwebo phezu koMowabi. Nje-ke bazakwazi bonyana nginguSomnini.”

Isiphorofido ngo-Edomu

¹² Nakhu okutjhiwo nguSomnini uSomandla: “Njengombana u-Edomu azibuyiselele ngesibuyiselelo phezu kwendlu yakwaJuda bewaba nesazela esikhulu, iye, njengombana azibuyiselele emaJudeni,

¹³ ngalokho nakhu okutjhiwo nguSomnini uSomandla, ‘Ngizokwelula isandla sami ngokujamelana ne-Edomu, ngiphelise kiyo umuntu nefuyo. Ngizoyenza amarubhi kusukela eTemani ukuya ngitjho neDedani. Bazokuwa ngesabula.

¹⁴ Ukuzibuyiselela kwami phezu kwaka-Edomu ngizokubeka ezandleni zabantu bami, ama-Israyeli. Wona azokwenza e-Edomu ngokuya ngetukuthelwami nangelaka lami. Yeke ama-Edomu azazizwela ukuzibuyiselela kwami.’ ” Kutjho uSomnini uSomandla.

Isiphorofido ngamaFilista

¹⁵ Nakhu okutjhiwo nguSomnini uSomandla: “Njengombana amaFilista azibuyiselele, iye, njengombana azibuyiselele ngokuzinikela ebumenemeneni ukuze arhayile ngebanga lobutha obungapheliko,

¹⁶ ngalokho nakhu okutjhiwo nguSomnini uSomandla, ‘Qalani, sele ngizokwelula isandla sami ngokujamelana namaFilista: Ngizokuphelisa amaKerethi bengibhubhise imisalela eseligwini lelwandle.

¹⁷ Ngizokwehlisela izenzo ezikulu zokuzibuyiselela phezu kwabo ngeembetho zelaka lami. Yeke bazakwazi bonyana nginguSomnini lokha nangehlisela ukuzibuyiselela kwami phezu kwabo.’ ”