UHEZEKIYELI 24 - IsiNdebele 2012 Translation

IJerusalema liyimbiza esemlilweni

¹ Emnyakeni wethoba, lokha inyanga yetjhumi inamalanga alitjhumi, ilizwi lakaSomnini lafika kimi lathi:

² “Ndodana yomuntu, tlola phasi ibizo lelangeli, iye, lona leli. Ikosi yeBhabheli ivimbezele iJerusalema ngalo lona ilangeli.

³ Khuluma umfanekiso endlini ehlubukako uthi, ‘Nakhu okutjhiwo nguSomnini uSomandla: “ ‘Beka imbiza eziko, iye, ibeke bewuyithele amanzi.

⁴ Faka ngaphakathi kwayo izitho zenyama, iye, zoke izitho ezihle okutjho umlenze nomkhono bewuyizalise ngamathambo amahle,

⁵ kube yinyama ekhethekileko yomhlambi. Baselela imbiza leyo ngeenkuni; ayikghabakghabe kuhle, kuphekwe namathambo kiyo.’

⁶ “Ngalokho nakhu okutjhiwo nguSomnini uSomandla, “ ‘Maye kilo idorobho leengazi! Liyimbiza enecwecwe necwecwe layo lisakghamathele kiyo! Khupha kiyo isiqa sinye ngasinye: Ifumbe angeze yaphoswa mayelana nedorobho

⁷ ngombana iingazi zalo zingaphakathi kwalo. Lizithulule phezu kwedwala lakodwala; akhange lizithululele ehlabathini kobana zisibekelwe lithuli lehlabathi.

⁸ Ukuze ngivuke ngelaka bengizibuyiselele, ngaliselela iingazi elizithululileko phezu kwedwala lakodwala lapha zingeze zasibekelwa khona.’ ”

⁹ “Yeke, nakhu okutjhiwo nguSomnini uSomandla, “ ‘Maye kilo idorobho leengazi! Ngithi nami ngizokukghubelela iinkuni.

¹⁰ Nasele iinkuni zimkghubo, tika umlilo. Nasele inyama ivuthiwe, thulula umhluzi bewulise amathambo akghakghathe.

¹¹ Lisa imbiza enganamanzi emalahleni avuthako beyitjhise, nekoporwayo itjhe, ukuze amanyela wayo ancithike necwecwe layo liqothuke.

¹² Idorobheli liyakhathaza: Icwecwe lalo elikghamatheleko alisuki, nje-ke icwecwelo alitjhiswe ngomlilo.

¹³ “ ‘Njengombana ukusilaphala kwakho Jerusalema bekungekwameswe, ngalokho kufuze ngikuhlwengise. Kodwana ukusilaphala kwakho azange kuhlwengiswe. Angeze usahlwenga godu kufikela lapha ngizanelisa khona ngelaka lami phezu kwakho.

¹⁴ Mina Somnini ngikhulumile. Kuyeza lokho, iye, ngizokwenza. Angeze ngakulisa, angeze ngakubabalela bengirhawuke. Bakugwebe ngokweendlela nezenzo zakho.’ ” Kutjho uSomnini uSomandla.

UHezekiyeli akamzileli umkakhe

¹⁵ Godu ilizwi lakaSomnini lafika kimi lathi:

¹⁶ “Ndodana yomuntu, qala, sele ngizokususa kuwe igugu lamehlwakho ngesidumo. Nanyana kunjalo, angeze uzile, ukhihle isililo namkha ugeleze iinyembezi.

¹⁷ Quma sidu. Ungamzileli ohlongakeleko: Bopha umbhode wakho ehloko, ufake amapatlagwanakho eenyaweni. Ungasithi isibhena sakho sangehla begodu ungadli ukudla okulethelwa babantu.”

¹⁸ Nje-ke ngakhuluma nabantu ekuseni, kwathi ntambama umkami wahlongakala. Ngelanga elilandelako ngenza njengombana ngiyaliwe.

¹⁹ Abantu bangibuza bathi: “Angeze usitjele bonyana okwenzakokhu kutjho ukuthini kithi na?”

²⁰ Nje-ke ngathi kibo: “Ilizwi lakaSomnini lifike kimi lathi,

²¹ ‘Tjela indlu yakwa-Israyeli bonyana nakhu okutjhiwo nguSomnini uSomandla: Qalani, sele ngizokusilaphaza indawami ecwengileko, iye, ubuphephelo enizikhakhazisa ngabo, igugu lamehlwenu nokulangazelela komphefumulwenu. Amadodana namadodakazenu enawatjhiya eJerusalema azokubulawa ngesabula.

²² Nje-ke nani kufuze nenze njengombana ngenzile. Ningasithi isibhena senu esingehla namkha nidle ukudla enikulethelwa babantu.

²³ Imibhode yenu izakuba phezu kweenhloko zenu namapatlagwanenu abe seenyaweni. Ningazili begodu ningakhihli isililo, kodwana dabukani ngamacalenu bese nizibubule omunye komunye.

²⁴ Leyo kuyindlela uHezekiyeli azakuba liphawu ngayo kini. Ngokuya ngakho koke akwenzileko nani nizakwenza njalo. Nasele lokho kufikile, nizakwazi bonyana nginguSomnini uSomandla.’

²⁵ “Nje-ke wena ndodana yomuntu, mhlana ngisusa kibo ubuphephelo babo, ithabo ledumo labo, igugu lamehlwabo nokulangazelela komphefumulwabo, ngitjho namadodana namadodakazabo;

²⁶ iye, khona mhlokho, ophunyurhileko uzakwiza kuwe azokubikela indaba leyo.

²⁷ Mhlokho umlomakho uzakuvuleka nakufika ophunyurhileko, uzabese uyakhuluma ungasabi simumu. Uzakuba liphawu kibo; ngalokho bazakwazi bonyana nginguSomnini.”