UHEZEKIYELI 22 - IsiNdebele 2012 Translation

Izono zeJerusalema

¹ Ilizwi lakaSomnini lafika kimi lathi:

² “Wena ndodana yomuntu uzakugweba na? Ingabe uzakugweba idorobho leengazi? Nje-ke memezela kilo zoke iinkghabhudlho zalo,

³ uthi, ‘Nakhu okutjhiwo nguSomnini uSomandla edorobheni elithulula iingazi ngaphakathi kwalo ukuze isikhathi salo sifike, lenze amanyala okubosingazimu kobana lizisilaphaze:

⁴ Ngeengazi ozithululileko, sewunecala begodu ngamanyala owenzileko wasilaphazeka. Nje-ke utjhideze amangakho wokubhujiswa, iye, sewufike esikhathini sokuphela kwamalangakho. Ngalokho ngikwenze ihlamba ezizweni nesiphoqo kiwo woke amazwe.

⁵ Abaseduze nalabo abakude nawe, bazakuphoqa wena owaziwa ngokusilaphala nozele ukuphithizela.

⁶ “ ‘Qala-ke, enye nenye ikosana yakwa-Israyeli ekuwe, iphumele ukuthulula iingazi ngendlela engakghona ngayo.

⁷ Abobaba nabomma bayanyazwa ngaphakathi kwakho. Isikhonzi naso siyagandelelwa ngaphakathi kwakho. Iintandani nabahlolokazi baphathwa ngobudlova ngaphakathi kwakho.

⁸ Udelele okucwengileko kwami, wasilaphaza namaSabatha wami.

⁹ Ngaphakathi kwakho kuneenrhwirirhwiri ezithulula iingazi; kunabadlela phezu kweentaba, kanye nabaziphatha ngameswe.

¹⁰ Ngaphakathi kwakho abantu bembula ubuze baboyise; iye, ngaphakathi kwakho bahlukumeza besifazana abangakabi ukuhlwenga eenkhathini zabo.

¹¹ Umuntu wenza ubuhlola nomfazi wenye indoda; kuthi omunye aziphathe ngameswe nomalukazanakhe bese omunye ahlukumeze udadwabo oyindodakazi kayise ngaphakathi kwakho.

¹² Ngaphakathi kwakho abantu bamukela ukufunjathiswa ukuze bathulule iingazi. Wena uzithathele inzuzo nenzalo bese uzenzela umvuzo ngokugandelela abantu bekhenu. Kodwana mina ungikhohliwe.’ ” Kutjho uSomnini uSomandla.

¹³ “ ‘Nje-ke qala, ngizokuthintitha izandla ngomvuzo wokungathembeki owenzileko neengazi oziphalaze ngaphakathi kwakho.

¹⁴ Uzakuba nesibindi, izandla zakho beziqine emalangeni lokha nangibambana nawe ngawo na? Mina Somnini ngikhulumile begodu ngizokwenza lokho.

¹⁵ Ngizokuhlakazela hlangana nezizwe bengikusabalalisele emazweni, ngiqothule nokusilaphala kwakho ngaphakathi kwakho.

¹⁶ Uzozirhubutjha ngokwakho emehlweni wezizwe. Nje-ke wena Jerusalema uzakwazi bonyana nginguSomnini.’ ”

¹⁷ Ilizwi lakaSomnini lafika kimi lathi:

¹⁸ “Ndodana yomuntu, indlu yakwa-Israyeli sele imanyela kimi. Koke, ngitjho ikoporo, isinjana, isimbi nomthofi sekuphenduke amanyela anombala wesiliva ekehleni yomlilo.

¹⁹ Ngalokho nakhu okutjhiwo nguSomnini uSomandla, ‘Njengombana noke seniphenduke amanyela nje, qalani-ke, ngizonibuthelela ngaphakathi kweJerusalema.

²⁰ Njengomuntu nabuthelelela ekehleni yomlilo isiliva namkha ikoporo, isimbi, umthofi nesinjana ukuze akuvuthelele emlilweni kobana kuncithike; ngendlela enjalo ngizonibuthelela nani ngelaka lami nangetukuthelwami nginiliselele ngaphakathi kwedorobho kobana nginincithikise.

²¹ Ngizonikghubelela, nginivuthele ngomlilo wobukhali bami benincithike ngaphakathi kwalo.

²² Iye, njengombana isiliva lincithika ekehleni, ngendlela enjalo nani nizakuncithika phakathi kwalo. Nje-ke nizakwazi bonyana mina Somnini ngithululele ilaka lami phezu kwenu.’ ”

Izono zakwaJuda

²³ Ilizwi lakaSomnini lafika kimi lathi:

²⁴ “Ndodana yomuntu, yewuthi kiyo inarha, ‘Uyinarha engakahlambuluki nenelwe lizulu ngelanga lokunikelelwa!’

²⁵ Kunobukhwebetjhana hlangana namakhosana enarheni leyo: Afana namabhubezi abhodlako nadabula inyamazana. Wona-ke sele arhiribidele iimpilo zabantu; athethe umnotho nezinto ezimagugu. Iye, amakhosana lawo abange abahlolokazi abanengi ngaphakathi kwayo.

²⁶ Abaphristi bayo bayawona umthethwami begodu basilaphaza ipahlami ecwengileko. Akhange benze umahluko phakathi kokucwengileko nokujayelekileko begodu akhange bafundise umehluko phakathi kokuhlanzekileko nokusilapheleko, badelele namaSabatha wami ukuze ngirhubutjhwe phakathi kwabo.

²⁷ Iinkhulu enarheni zinjengeempisi ezidabula inyamazana; zithulula iingazi bezibhubhise ukuze zizifunyanele inzuzo embi.

²⁸ Abaphorofidi enarheni leyo basitha iinkhulu ngokubona imibono engekho bebathukule ngamanga bathi, ‘Nakhu okutjhiwo nguSomnini uSomandla’, khisibe uSomnini akhange akhulume.

²⁹ Abantu benarha bazileme ngokugandelela nangokudlelezela. Bagandelele abachakileko nabadududu begodu baphatha kumbi iinkhonzi ngokungemthetho.

³⁰ Nje-ke ngafuna phakathi kwabo boke umuntu obekangakha umthangala abe ajame esikhaleni phakathi kwami nenarha ukuze ngingayibhubhisi. Kodwana akhange ngifunyane muntu.

³¹ Ngalokho ngehlisela amanikelela phezu kwabo; ngibaqothule ngomlilo welaka lami; ngibabethe ngeentonga zabo.” Kutjho uSomnini uSomandla.