UHEZEKIYELI 21 - IsiNdebele 2012 Translation

Isabula kaZimu irhwatjhiwe

¹ Ilizwi lakaSomnini lafika kimi lathi:

² “Ndodana yomuntu, qalisa ubuso bakho ngeJeruselema utjhumayele ngeendawo ezicwengileko. Phorofida ngenarha yakwa-Israyeli,

³ uthi kiyo, ‘Nakhu okutjhiwo nguSomnini: Qala, ngijamelene nawe, ngizokurhwatjha isabulami esilandeni sayo, ngirhayile kuwe abalungileko nabakhohlakeleko.

⁴ Njengombana ngizokususa kini abalungileko nabakhohlakeleko, ngalokho isabulami izakurhwatjhwa esilandeni sayo ngokujamelana nabantu boke ukusuka esewula ukuya etlhagwini.

⁵ Abantu boke bazakwazi bonyana mina Somnini ngirhwatjhe isabulami esilandeni sayo begodu angeze isabuyela emuva.’

⁶ Ngalokho bubula wena ndodana yomuntu, bubula phambi kwabo ngesililo esimunyu njengomuntu otshinyeke idini.

⁷ Kuzakuthi lokha bathi kuwe, ‘Kubayini ububula?’ uzakuthi, ‘Kungebanga lombiko. Iye, lokha nawuzako, zoke iinhliziyo zizakudana, izandla zoke zizakuba buthakathaka, woke ummoya utsirimezeke namadolo woke angenwe mamanzi. Yelelani, kuyeza lokho begodu kuzakuzaliseka.’ Kutjho uSomnini uSomandla.”

⁸ Godu ilizwi lakaSomnini lafika kimi lathi:

⁹ “Ndodana yomuntu, phorofida bona nakhu okutjhiwo nguSomandla, “iye, yewuthi, ‘Isabula, isabula, iloliwe begodu ilolongiwe.

¹⁰ Ilolelwe ukubulala, ilolongiwe kobana ibenye njengombani! Nina nithatjiswa yikulumo ethi: Intonga yendodanami! Kodwana isabula inyaza yoke imihlobo yesigodo.

¹¹ Nje-ke, isabula yakhutjhwa kobana ilolongwe ukuze iphatheke; iye, iloliwe beyalolongwa kobana inikelwe esandleni sombulali.’

¹² “Rhahlawula, ulile ndodana yomuntu, ngombana isabula ijamelene nabantu bami; iye, ijamelene nawo woke amakhosana wakwa-Israyeli. Anikelelwa esabuleni kanye nabantu bami; ngalokho thwala imikhono ehloko.

¹³ “Abantu bathi, “ ‘Kodwana kukhona ilitje elizizinyiweko! Alo, kwenzekani nakube isabula inyaza intonga na?’ USomnini uSomandla uthi, ‘Ilitje elizizinyiweko angeze laba khona!’

¹⁴ Ngalokho ndodana yomuntu, phorofida! Wahla izandla ukuze isabula yehle kathathu. Kuyisabula yalabo ekufuze babulawe, isabula yokubulala ikulwazo. Iye, okwabo yisabula engenelelako

¹⁵ ukuze iinhliziyo ziphele amandla nabanengi bakhutjhwe. Kiwo woke amasangwabo ngibeke isabula ebulalako. Maye, kuyisabula ebenyezela njengombani, ilolongelwe ukubulala.

¹⁶ Hlaba ngesidleni uhlahlele ngesinceleni, koke lapha itlobakho ithunyelwa khona!

¹⁷ Nami ngizakuwahla izandla, ngizanelise ngelaka lami; mina Somnini ngikhulumile.”

IJerusalema izakusahlelwa

¹⁸ Ilizwi lakaSomnini lafika kimi lathi:

¹⁹ “Wena ndodana yomuntu, thala iindlela ezimbili zokuza kwesabula yekosi yeBhabheli. Zombili iindlelezo kufuze zisuke enarheni yinye. Godu jamisa isibekiso, iye, sijamise ekuthomeni kwenye nenye indlela eya ngedorobheni:

²⁰ Thala indlela yesabula eya eRabha lama-Amoni, enye iye kwaJuda ngeJerusalema elizombelezwe ngomthangala.

²¹ Mbala, ikosi yeBhabheli yajama ekwahlukaneni kweendlela, iye, ekuthomeni kweendlela ezimbili kobana iphengule: Iphosa imisubela, ibuze indlela emihlalandlinini, ilawule nangokuhlola isibindi somhlabelo.

²² Ngesidleni sayo bekunefumbe yeJerusalema yokubeka imigqala yokwephula umthangala, ukuvula imilomo ngomkhosi nokuphakamisa ilizwi ngokurhuwelela; iye, kunefumbe yokubeka imigqala yokwephula umthangala ukujamelana namasango, ukwakha iinqabo eziqhube emthangaleni nokwakha umbhotjhongo wepi.

²³ Ebantwini beJerusalema kuzakubonakala njengokuthukula okumamanga; kodwana ngoba bafunge ngesifungo, uNebukadinetsari uzakukhumbula icala labo ukuze bathunjwe.

²⁴ “Ngalokho nakhu okutjhiwo nguSomnini uSomandla, ‘Njengombana nenze bonyana icala lenu lazeke ngokuhlubuka kwenu okusemtarini, nembula izono zenu ngazo zoke izenzo zenu; iye ngombana nenze kwazeka lokho, nizakuthunjwa.

²⁵ Nje-ke wena kosana esilapheleko nekhohlakeleko yakwa-Israyeli, ilanga lakho sele lifikile, iye, isikhathi sesibetho samaphelelo.

²⁶ Nakhu okutjhiwo nguSomnini uSomandla: Yethula ingwani, ususe nesihlohlo; izinto engeze zisaba sebujameni egade zikibo. Phakamisa okuphasi bese wehlisa okuphakamileko.

²⁷ Iqubi leququ! Iqubi leququ! Iye, ngizokwenza idorobheli iqubi leququ! Lokho angeze kwenzeka kungakafiki onelungelo; yena-ke ngizamnikela lona.’ ”

Isabula kaSomnini ijamelana nama-Amoni

²⁸ “Nje-ke wena ndodana yomuntu, phorofida uthi, ‘Nakhu okutjhiwo nguSomnini uSomandla mayelana nama-Amoni nesiphoqo sawo: “ ‘Isabula, isabula irhwatjhiwe kobana ibhubhise, ilolongelwe kobana ibambelele beyibenyezele njengombani.

²⁹ Nanyana kunombono wamanga ngawe sabula, iye, nokuthukula kwekohliso ngawe, uzakubekwa eentanyeni zeenkhohlakali ezisilapheleko; ilanga lazo sele lifikile, iye, isikhathi sesibetho samaphelelo.

Ibutho lakaNebukadinetsari lizakubhujiswa

³⁰ Buyisela isabula ngesilandeni sayo. Wena siphanda sesabula, ngizokugwebela lapha wadalwa khona enarheni owadabuka kiyo.

³¹ Ngizokuthululela ilaka lami phezu kwakho, iye, ngivuthele phezu kwakho umlilo wobukhali bami. Ngizokunikela ezandleni zeendlova okubabantu abanelwazi ekubhubhiseni.

³² Uzakuba kukudla komlilo, iingazi zakho zizakuphalakela enarheni, angekhe ubuye ukhunjulwe; ngombana mina Somnini ngikhulumile.’ ”