UHEZEKIYELI 2 - IsiNdebele 2012 Translation

Umbono womtlolo

¹ Ilizwi lathi kimi: “Ndodana yomuntu, sikima ujame ngeenyawo zakho, mina ngizokukhuluma nawe.”

² Kuthe lokha nalikhuluma nami ummoya wangena kimi wangenza ngajama ngeenyawo. Nje-ke ngalizwa likhuluma nami.

³ Lathi: “Ndodana yomuntu, ngikuthuma kuma-Israyeli, isizwe esihlubukako nesele singihlubukile. Wona naboyisemkhulu baphambukile kimi bekube kunamhlanje.

⁴ Basizukulwana esinentanyana nesinekani, nokho ngikuthumela kiwo. Nje-ke ufese uthi kiwo, ‘Nakhu okutjhiwo nguSomnini uSomandla.’

⁵ Ngitjho nanyana ayalalela namkha ayakhunyalala ngombana vele ayindlu ehlubukako, azakwazi nokho bonyana bekukhona umphorofidi phakathi kwawo.

⁶ Nje-ke wena ndodana yomuntu, ungawesabi ama-Israyeli begodu namezwawo ungawesabi. Ngitjho nanyana uzombelezwe mahlabahlaba nameva, iye, uphila phakathi kwabofezela, amezwawo ungawesabi begodu ungethuswa mamehlwawo wokuhlubuka ngombana vele ayindlu ehlubukako.

⁷ Wena uzakukhuluma amezwami kibo ngitjho nanyana bayezwa namkha bayakhunyalala ngombana bayindlu ehlubukako.

⁸ Kodwana wena ndodana yomuntu, yizwa lokho engikutjho kuwe; unganghanghabali njengendlu ehlubukako le. Khamisa, udle lokho engikunikela khona.”

⁹ Nje-ke ngaqala, ngabona isandla esilulelwe kimi, ngaphakathi kwaso kunomsongo otloliweko.

¹⁰ Sawendlala phambi kwami. Wona bewutlowe ngaphambili nangemuva; utlolwe amezwi wesililo, wokuquma nokububula.