UHEZEKIYELI 19 - IsiNdebele 2012 Translation

Isililo ngeenkhulu zakwa-Israyeli

¹ Nje-ke wena ndodana yomuntu, khihla isililo ngeenkhulu zakwa-Israyeli,

² uthi: “Maye bekalibhubezikazi elingangani hlangana namabhubezi! Bekalala hlangana namabhubezana, ondle amawundlu.

³ Wakhulisa elinye lamawundlwakhe, nje-ke laba libhubezana. Lafunda ukubamba inyamazana, larhiribidela umuntu.

⁴ Izizwe zezwa ngalo, nje-ke labanjwa emgodinazo. Zalirholela ngeenkghopholo enarheni yeGibhide.

⁵ “Lokha unyoko nabona bonyana uphambaniselwe, nokobana ithemba lakhe liphelile, wathatha elinye lamawundlwakhe walenza laba libhubezana.

⁶ Laba libhubezana lokha nalikhambakhamba hlangana namabhubezi amanye. Lafunda ukubamba inyamazana, larhiribidela umuntu.

⁷ Lakhwabitha hlangana neengodlo latlhifirija nemizana yakhona. Inarha yatjhiywa bahlali bayo ngebanga lokubhodla kwalo.

⁸ Nje-ke, izizwe zalivukela, ziphuma mahlangothi woke weemfunda; zaneka inede lazo phezu kwalo, labanjwa ngaphakathi komgodazo.

⁹ Zalinghamela intamo ngesimbi, zalifaka iinkghopholo epumulweni; zaliletha ekosini yeBhabheli. Zalifaka ngesikhungweni, ukuze ukubhodla kwalo kungasazwakala phezu kweentaba zakwa-Israyeli.

¹⁰ “Unyoko bekanjengomuthi wesidiribe esidiribeni, ohlonywe lapha kunamanzi khona bewuhlome khulu, uthwele amagatja ngebanga lamanzi aneleko.

¹¹ Bewuneziqu eziqinileko ezaba ziintonga zababusi, isitlhori sawo besivelele hlangana namanye amagatja bewubonakala ngokuphakama kwawo nangamakarawo amanengi.

¹² Kodwana umuthi lowo wasitjhulwa ngelaka, wafuthelwa phasi ehlabathini. Ummoya wepumalanga wawutjhwabisa besele utlhutlhurwe iinthelo zawo; amagatjawo aqinileko abuna, aqothulwa mlilo.

¹³ Okwanjesi uhlonywe erhalawumbeni, enarheni eligagadu neyomileko.

¹⁴ Kwaphuma umlilo esiqwini samahlumelawo, waqothula iinthelo zakhona, ukuze kungasasali nasinye isiqu esiqinileko, esilungele ukuba yintonga yombusi. “Lesi sililo begodu sasetjenzwa njengesililo.”