UHEZEKIYELI 18 - IsiNdebele 2012 Translation

Umuntu owonako uzokufa

¹ Ilizwi lakaSomnini lafika kimi lathi:

² “Vane nitjho ukuthini lokha nanidzubhula isagesi ngenarha yakwa-Israyeli, nisithi, “ ‘Abobaba bagome amadiribe angakavuthwa, nje-ke amazinyo wabantwana ayatjhelela’?

³ “Ngiyafunga ngokuphila kwami, isagesi angeze sisasetjenziswa ngini kwa-Israyeli.” Kutjho uSomnini uSomandla.

⁴ “Qalani, yoke ipilo ingeyami. Ipilo kababa nepilo yomntwana ingeyami. Nje-ke umuntu owonako uzokufa.

⁵ “Nakube umuntu ulungile wenza okulungileko nokufaneleko:

⁶ Angeze adlela eentabeni namkha aphakamisele amehlwakhe emanyaleni okubosingazimu bendlu yakwa-Israyeli. Akasilaphazi umfazi womakhelwana namkha angene emfazini osesikhathini.

⁷ Akagandeleli noyedwa kodwana ubuyisela lokho akuthethe njengesibambiso; akadlelezeli kodwana upha olambileko ukudla kwakhe abuye embathise ohlubule isambatho.

⁸ Nabolekisako akakhuphi inzalo namkha engeze inzalo phezu kwesibolekiso. Ubamba isandla sakhe ebukhohlakalini, wenza iingwebo ezilungileko phakathi komuntu nomuntu.

⁹ Iye, ukhamba ngeemiso zami begodu ulonda imithethwami ukuze enze ukwethembeka. Onjalo ulungile, mbala uzakuphila.” Kutjho uSomnini uSomandla.

¹⁰ “Akhesithi umuntu loyo ubeletha indodana emudlelezeli, ethulula iingazi namkha eyenza enye yezintwezo

¹¹ khisibe uyise azange akhe enze nakhunye kwezintwezo okutjho bona idla eentabeni, isilaphaza umfazi womakhelwana,

¹² igandelela ochakileko nodududu, iyadlelezela, ayibuyiseli isibambiso, iphakamisela amehlwayo emanyaleni okubosingazimu, yenza iinkghabhudlho;

¹³ ibolekisa ngokukhupha inzalo, yengeze inzalo phezu kwesibolekiso. Nitjho bona izakuphila indodana enjalo na? Ngiyala, ayizukuphila! Yenze zoke iinkghabhudlhwezo, nje-ke ayibulawe! Iingazi zayo zizakuba phezu kwayo.

¹⁴ “Kodwana nakube indodana leyo ibeletha indodana ebona zoke izono uyise azenzileko, izakwesaba ingenzi njengoyise:

¹⁵ Ingadleli eentabeni namkha iphakamisele amehlwayo emanyaleni okubosingazimu bendlu yakwa-Israyeli, ingasilaphazi umfazi womakhelwana

¹⁶ ingagandeleli muntu, ingathathi isibambiso emuntwini, ingadlelezeli, kodwana iphe olambileko ukudla kwayo, yembese ohlubule ngesambatho sayo,

¹⁷ isuse isandla sayo ebumbini; ingathathi namkha yengeze inzalo phezu kwesibolekiso, kodwana yona iphethe imithethwami begodu ikhambe ngeemiso zami. Indodana leyo angeze yafa ngebanga lezono zakayise; kwamambala izakuphila.

¹⁸ Kodwana nakunguyise yena, ngebanga lokobana amgandeleli, adlelezele umfowabo bewenza okungakafaneli hlangana nabantu bekhabo, yelelani-ke, uzokufa ngebanga lecala lakhe.

¹⁹ “Nokho nithi, ‘Kubayini indodana ingathwali icala lakayise?’ Lokha indodana yenze okulungileko nokufaneleko, yalonda beyenza zoke iimiso zami, mbala izakuphila.

²⁰ Umuntu owonako uzakufa. Indodana angeze yathwala icala lakayise namkha uyise athwale icala lendodana. Ukulunga kolungileko kuzakuba phezu kwakhe, nobukhohlakali besikhohlakali buzakuba phezu kwaso.

²¹ “Kodwana nangabe isikhohlakali siphenduka kizo zoke izono esizenzileko, silonde zoke iimiso zami, senze okulungileko nokufaneleko, mbala sizakuphila; angeze safa.

²² Akukho nasinye seemphambeko zaso esizenzileko ezizakukhunjulelwa sona. Sele sizakuphila ngebanga lokulunga esikwenzileko.

²³ Ngiyathokoza nokuthokoza ngokufa kwesikhohlakali na? Kanti angithokoziswa kuphenduka endlelenaso ukuze siphile na?” Kutjho uSomnini uSomandla.

²⁴ Kodwana lokha olungileko ajika ekulungeni kwakhe enze ubukhohlakali, iye, enze ngokweenkghabhudlho zoke ezenziwa mumuntu okhohlakeleko, uzakuphila na? Awa, akukho nesisodwa sezenzo zakhe ezilungileko esizakukhunjulwa. Ngebanga lokungathembeki kwakhe nangesono asenzileko, uzakufa.

²⁵ “Kodwana nithi, ‘Indlela kaSomandla ayikalungi.’ Nje-ke, lalelani lapha nina ndlu yakwa-Israyeli: Indlelami ayikalungi na? Ngezenu iindlela ezingakalungi!

²⁶ Nakube olungileko ujika ekulungeni kwakhe enze ubukhohlakali, uzakufa ngalokho. Iye, ngebanga lobukhohlakali bakhe abenzileko, uzakufa.

²⁷ Godu, nakube okhohlakeleko uyaphenduka ebukhohlakalini abenzileko, enze okulungileko nokufaneleko, uzakusindisa ipilwakhe.

²⁸ Ngebanga lokobana abonile waphenduka kizo zoke iimphambeko azenzileko, mbala uzakuphila, angeze afa.

²⁹ Nokho indlu yakwa-Israyeli ithi, ‘Indlela kaSomandla ayikalungi.’ Nina ndlu yakwa-Israyeli, indlelami ayikalungi na? Ngezenu iindlela ezingakalungi!

³⁰ “Ngalokho ngizonigweba nina ndlu yakwa-Israyeli, omunye nomunye ngokweendlela zakhe.” Kutjho uSomnini uSomandla. “Phendukani nifulathele zoke iimphambeko zenu; nakungasinjalo icala lenu lizakuba sikhubekiso senu.

³¹ Dediselani kude nani zoke iimphambeko zenu eniphambuke ngazo, nizifunyanele ihliziyo etja nommoya omutjha! Nizakufelani nina ndlu yakwa-Israyeli na?

³² Mbala, angithokozi ngokufa komuntu. Nje-ke phendukani niphile.” Kutjho uSomnini uSomandla.