UHEZEKIYELI 16 - IsiNdebele 2012 Translation

Ukungathembeki kweJerusalema

¹ Godu ilizwi lakaSomnini lafika kimi lathi:

² “Ndodana yomuntu, yazisa iJerusalema ngeenkghabhudlho zalo

³ uthi, ‘Nakhu okutjhiwo nguSomnini uSomandla eJerusalema: Indabuko nekaba yakho gade isenarheni yeKanana; uyihlo bekangumAmori nonyoko angumRhithi.

⁴ Nakukubelethwa kwakho, mhlana uvelako, inongwakho beyingakasikwa namkha uhlanjwe ngamanzi kobana uhlanzeke namkha uhlikihlwe ngetswayi nanyana usongwe ngetjhila.

⁵ Akunalihlo elakubabalelako namkha elaba nezwelo ukwenza izintwezo kuwe. Kunalokho walahlelwa ngaphandle emmangweni ngombana ngelanga owavela ngalo bewusinyenyiso.

⁶ “ ‘Kwathi lokha nangidlula ngakuwe, ngakubona urarhararha eengazini zakho ngathi kuwe useengazinapho: Phila! Iye, ngathi kuwe useengazinapho: Phila!

⁷ Wakhula njengesitjalo sommango. Iye, wakhula wadlondlobala ukufikela lapha uba khona mumuntu okarisako. Wathoma ukuphuhla, wamila amatjhitjhi kodwana bewusese bulanzi, iye, ubhunubhunu.

⁸ “ ‘Kwathi lokha nangidlula ngakuwe godu, ngakubona, qala, bewusesigabeni sokuqoma. Nje-ke ngathabululela ingutjanami phezu kwakho kobana ngigubuzese ubuze bakho. Iye, ngakunikela isifungo, ngenza isivumelwano nawe. Ngalokho waba ngowami.’ Kutjho uSomnini uSomandla.

⁹ ‘Ngakuhlambisa ngamanzi ngasusa iingazi ebezikghamathele kuwe, ngakuzesa ngamafutha.

¹⁰ Godu ngakwembathisa amatjhila alukiweko wemibalabala bengakufaka amapatlagwana wesikhumba esitjhukiweko. Ngakusonga ngelineni elimhlophe bengakwembesa ngetjhila elikhethekileko.

¹¹ Ngakufaka imikghabiso bengakufaka neenkhono emikhonweni nonongoro entanyeni.

¹² Ngakufaka incina epumulweni, amancina eendlebeni nesihlohlo esihle ehloko.

¹³ Iye, bewuhlotjiswe ngegolide nesiliva. Isambatho sakho besinelineni elimhlophe netjhila elikhethekileko kanye namatjhila alukiweko wemibalabala. Wadla umdoko wekoroyi esiliweko, iliju namafutha we-oliva. Yeke waba simomondiya, bewaba njengendlovukazi.

¹⁴ Idumo lakho lafikelela ezizweni ngebanga lobuhle bakho ngombana ijamo ebengikuthwese lona beliphelele ngenca yobuphaziphazi obukuwe.’ Kutjho uSomnini uSomandla.

¹⁵ “ ‘Kodwana wathembela ebuhleni bakho, waba yingwadla ngebanga ledumo lakho. Wakhamba utjhemulela woke odlula ngendlela, wazineka kuye.

¹⁶ Wathatha ezinye zezambatho zakho, wangwadlela phezu kwazo eendundumeni ezimibalabala ozenzela zona, okumhlolo ongazange khewenzeke nongasoze wenzeka.

¹⁷ Wabuya godu wathatha nobuphaziphazi begolide nesiliva lami engakunikela khona, wazenzela iinthombe zemifanekiso yabantu, wazilotjha.

¹⁸ Wathatha nezambatho zamatjhilakho alukiweko wemibalabala wembesa iinthombezo bewabeka namafuthami we-oliva netjhwalo lami phambi kwazo.

¹⁹ Nokudla kwami engakupha khona bengakondla ngakho, iye, umdoko wekoroyi esiliweko, amafutha we-oliva neliju, wakubeka phambi kwazo, kobana kube mnikelo okhethekileko kizo.’ Kutjho uSomnini uSomandla.

²⁰ “ ‘Wabuya wathatha amadodana namadodakazakho owangibelethela wona, wenzela ngawo iinthombezo umhlabelo ngokuwatjhisa emlilweni. Kanti ubungwadla bakho bebungakeneli

²¹ kobana ungabeze ubulale abantwabami, ubanikele eenthombenezo ngokubadabulisa emlilweni na?

²² Phezu kwazo zoke iinkghabhudlo zakho nobungwadla bakho akhange bewukhumbule amalanga wobutjha bakho, iye, lokha usese bulanzi, ubhunubhunu, urarhararha eengazini zakho.’

²³ “USomnini uSomandla uthi, ‘Maye! Iye maye kuwe ngombana emva kwabo boke ubukhohlakali bakho

²⁴ uzakhele imibundu, iye, wazenzela iindunduma kiwo woke amacabazi.

²⁵ Mbala, kenye nenye ipambanandlela wakhe indundumakho warhubutjha khona ubuhle bakho, ukhamba utjhemulela omunye nomunye odlula ngendlela ngokwandisa ubungwadla bakho.

²⁶ Ungwadle namaGibhide, okubomakhelwana bakho bekanuko. Iye, wandise ubungwadla bakho kobana ungivusele ilaka.

²⁷ Qala-ke, ngelule isandla sami ngokujamelana nawe begodu ngiphungule isabelo sakho. Ngikunikelele eenkanukweni zabakuzondako okumadodakazi wamaFilista aneenhloni ngokuziphatha kwakho ngameswe.

²⁸ Godu ungwadle nama-Asiriya ngombana bewusoloko ungakadeli. Iye, ungwadlile nawo kodwana nalapho akhange waneliswe.

²⁹ Nje-ke wandisa ubungwadla bakho nenarha yabarhwebi, okutjho inarha yamaKasidi, nalapho akhange bewaneliswe.’

³⁰ “USomnini uSomandla uthi, ‘Usihlolabani sengwadla kobana ungenza zoke izintwezi! Bekuzizenzo zengwadla edazukileko

³¹ lokha nawakha imibundu kenye nenye ipambanandlela, wenza khona iindunduma kiwo woke amacabazi. Nokho bewungafani nengwadla mbala ngombana unyefule ukukhokhelwa kwengwadla.

³² Ngitjho wena sihlobongi somfazi ndina, esiphakululela imiqhamuka ije sinendoda!

³³ Amadoda avamisa ukukhokhela iingwadla, kodwana wena uvuza zoke iinthandwa zakho ngokuzifumbathisa kobana zize kuwe mahlangothi woke ngebanga lobungwadla bakho.

³⁴ Wena wehlukile kabanye abafazi: Ekungwadleni kwakho amadoda akasakulandeleli, sese kunguwe okhokhelwa ukungwadlwa khisibe wona akasakhokhi ilitho. Iye, wehlukile kabanye abafazi.

³⁵ “ ‘Ngalokho wena ngwadla ndina, yizwa ilizwi lakaSomnini,

³⁶ iye, nakhu okutjhiwo nguSomnini uSomandla: Njengombana weneke igwayana lakho nobubhunubhunu bakho bebembukile ebungwadleni bakho neenthandani zakho nawo woke amanyalakho aziinkghabhudlho nangebanga leengazi zabantwana bakho ozinikele eenthombenezo;

³⁷ ngalokho qala-ke, ngizokubutha zoke iinthandani zakho ozithabisakwezo, iye, zoke ebegade uzithanda nazo zoke ebegade uzizonda. Mbala, ngizozibutha mahlangothi woke bona zijamelane nawe. Ngizokwembula ubuze bakho kizo ukuze zibone boke ububhunubhunu bakho.

³⁸ Ngizokugweba ngeengwebo zeenhlobongikazi nezabathulula iingazi: Ngizokwehlisela phezu kwakho iingazi ezibangwa lilaka nesikhwele.

³⁹ Ngizokunikela ezandleni zabomakhwapheni bakho; bazokudiliza imibundu, batjhabalalise neendawo zakho eziphakamileko. Bazokuhlubulisa izambatho zakho, bathathe nobuphaziphazi bakho, bakutjhiye ubulanzi, iye, ubhunubhunu.

⁴⁰ Bazokuthelekela ngebutho, bakukhande ngamatje bebakubulale ngeensabula zabo.

⁴¹ Bazokutjhisela izindlu zakho, baphelelise isigwebo phambi kwabafazi abanengi. Ngizokuphelisa ubungwadla bakho begodu angeze usakhokhela ukungwadlwa.

⁴² Nje-ke ilaka lami lizakubohlela phezu kwakho ukuze isikhwele sami sisuke kuwe. Ngizakubohla, angeze ngisasilingeka.

⁴³ Njengombana ungakhange ukhumbule imihla yobutjha bakho, kodwana wangivusela ilaka ngazo zoke izintwezi, ngalokho qala-ke, mina ngizokubetha ngeentonga zakho.’ Kutjho uSomnini uSomandla. “ ‘Phezu kwazo zoke iinkghabhudlho zakho, ubuye waziphatha ngameswe.

⁴⁴ Qala-ke, boke abadzubhula izaga bazokudzubhula nasi isaga ngawe bathi: Indodakazi ifuze unina.

⁴⁵ Wena uyindodakazi kanyoko, owanyaza umyenakhe nabantwabakhe. Iye, ungudade wabodadwenu abanyaza abayeni babo nabantwababo. Unyoko bekamRhithi, uyihlo amAmori.

⁴⁶ Udadwenu omkhulu liSamariya ebelihlala namadodakazalo ngetlhagwini kuwe; kuthi udadwenu omncani ongesewula kuwe kube liSodoma namadodakazalo.

⁴⁷ Khonapho akhange ulandele kwaphela iindlela zabo bewenze iinkghabhudlho zabo, kodwana esikhathini esincani nje besele wonakele khulu kunabo kizo zoke iindlela zakho.

⁴⁸ Ngiyafunga ngokuphila kwami udadwenu iSodoma namadodakazalo akhange benze okwenziwe nguwe namadodakazakho.’ Kutjho uSomnini uSomandla.

⁴⁹ ‘Nje-ke yelela, nanti icala lakadadwenu iSodoma: Yena namadodakazakhe bebaphakeme, bangasweli ukudla begodu bazigedlile kodwana akhange babonelele abachakileko nabadududu,

⁵⁰ bebazigqaja benza neenkghabhudlho phambi kwami. Ngalokho ngabathanyela nangibona lokho.

⁵¹ ISamariya azange lenze ngitjho ingcenye yezono zakho. Wena wenze iinkghabhudlho ukwedlula lona namadodakazalo. Mbala, ngazo zoke iinkghabhudlho zakho ozenzileko, wenze abodadwenu babonakale bamsulwa.

⁵² Nawe-ke kumele uthwale ihlazo lakho ngombana wenze kobana isigwebo sibe lula kibodadwenu: Ngezono zakho owenze ngazo iinkghabhudlho ukwedlula abodadwenu, bona-ke babonakala bamsulwa kunawe. Iye, nawe godu kumele ube neenhloni, uthwale ihlazo lakho ngokwenza abodadwenu babonakale bamsulwa ukukudlula.

⁵³ “ ‘Nokho ngizokutjhugulula ubujamo babo, iye ubujamo beSodoma namadodakazalo nebeSamariya namadodakazalo. Godu ngizakutjhugulula ubujamo bakho kanye nabo

⁵⁴ ukuze ukwazi ukuthwala ihlazo lakho bewuphoqeke ngakho koke okwenzileko, okutjho ukubakhuthaza kwakho.

⁵⁵ Abodadwenu, iSodoma namadodakazalo bazakubuyela ebujameni babo bokuthoma neSamariya namadodakazalo bazakubuyela ebujameni babo bokuthoma. Nawe-ke namadodakazakho nizakubuyela ebujameni benu bokuthoma.

⁵⁶ Elangeni lokuziphakamisa kwakho bewungaliphathi ibizo lakadadwenu uSodoma!

⁵⁷ Lokho bekungaphambi kokwembulwa kobukhohlakali bakho. Ngendlela enjalo kusikhathi seenhlamba zamadodakazi we-Aramu nabo boke abayizombelezileko nezamadodakazi wamaFilista akuhlabekisa mahlangothi woke.

⁵⁸ Wena uzokuthwala umphumela wokuziphatha kwakho ngameswe neenkghabhudlho zakho.’ Kutjho uSomnini.

⁵⁹ “Iye, nakhu okutjhiwo nguSomnini uSomandla, ‘Ngizokwenza kuwe njengombana wenzile, ngitjho wena odele isifungo ngokwephula isivumelwano.

⁶⁰ Nokho mina ngizasikhumbula isivumelwano sami engasenza nawe emihleni yobutjha bakho begodu ngizakujamisa isivumelwano esingapheliko nawe.

⁶¹ Nje-ke uzakukhumbula iindlela zakho bewuphoqeke lokha nawamukela abodadwenu abakhulu nabancani kuwe. Ngizokunikela bona njengamadodakazi nanyana lokho kungasi ngebanga lesivumelwano sami nawe.

⁶² Iye, mina ngizokujamisa isivumelwano sami nawe. Ngalokho uzakwazi bonyana nginguSomnini.

⁶³ Ngizokwenza lokho ukuze ukhumbule bewube neenhloni begodu ungasakhulumi ngehlazo lakho lokha nangikuthethelela ngakho koke okwenzileko.’ Kutjho uSomnini uSomandla.”