UHEZEKIYELI 14 - IsiNdebele 2012 Translation

Iingwebo zakaZimu zilungile

¹ Kweza kimi abaphathi abathileko bakwa-Israyeli, bafese bahlala phambi kwami.

² Kwafika ilizwi lakaSomnini kimi lathi:

³ “Ndodana yomuntu, amadoda la asafake amanyalawo okubosingazimu eengqondweni zawo, iye asabeke iinkhubekiso ezibange icala labo eenhliziyweni. Alo, ngivume bonyana babuze kimi ije banje na?

⁴ Nje-ke yewukhulume nawo uthi kiwo, ‘Nakhu okutjhiwo nguSomnini uSomandla: Omunye nomunye wendlu yakwa-Israyeli osafake amanyalakhe okubosingazimu engqondwenakhe nosabeke iinkhubekiso ezibange icala lakhe ehliziywenakhe bese uza kumphorofidi, mina Somnini ngizomphendula ngokwami ngobunengi bamanyalakhe.

⁵ Lokho ngizakwenza ukuze ngibambe indlu yakwa-Israyeli ngehliziywayo, iye, boke labo esele bangifulathele ngebanga lamanyalabo.’

⁶ “Ngalokho yewuthi endlini yakwa-Israyeli, ‘Nakhu okutjhiwo nguSomnini uSomandla: Phendukani nisuke emanyalenenu okubosingazimu. Fulathezani ubuso benu kizo zoke iinkghabhudlho zenu

⁷ ngombana omunye nomunye wendlu yakwa-Israyeli namkha wakosozizwe okhonze kwa-Israyeli ongifulathelako, osafake amanyalakhe okubosingazimu engqondwenakhe nosabeke iinkhubekiso ezibange icala lakhe ehliziywenakhe, kuthi kunjalo eze kumphorofidi abuze kimi ngaye, mina Somnini ngizomphendula ngokwami.

⁸ Ngizokubeka ubuso bami bujamelane nomuntu loyo, ngimenze iphawu nesiga begodu ngimjube ebantwini bami. Nje-ke nizakwazi bonyana nginguSomnini.

⁹ Nakube umphorofidi uyayengeka anikele ipendulo, kungebanga lokobana mina Somnini ngimyengile umphorofidi loyo. Ngizokwelula isandla sami ngijamelane naye, ngibuye ngimbhubhise hlangana nabantu bami, u-Israyeli.

¹⁰ Bazakuthwala icala labo: isibetho somphorofidi sizakulingana nesibetho saloyo oze ukuzokubuza.

¹¹ Ngalokho indlu yakwa-Israyeli angeze isalahleka kimi; angeze basazisilaphaza ngazo zoke iimphambeko zabo godu. Bazakuba babantu bami nami ngibe nguZimabo.’ ” Kutjho uSomnini uSomandla.

¹² Ilizwi lakaSomnini lafika kimi lathi:

¹³ “Ndodana yomuntu, lokha inarha nayona kimi ngokungathembeki kwayo bese mina ngelule isandla sami ngokujamelana nayo, ngephule umphekgho wesikwa sayo, ngithumele indlala kiyo, ngiphelise kiyo umuntu nefuyo,

¹⁴ ngitjho nanyana amadoda amathathu la, uNowa, uDanyela noJobho, bebaphakathi kwayo, bebazakusindisa ipilwabo kwaphela ngokulunga kwabo.” Kutjho uSomnini uSomandla.

¹⁵ “Nakube ngenza iimbandana zommango kobana zidabule phakathi kwenarha, ziqede abantu ukuze inarha leyo isale ilibhudu, kungasadluleka kiyo ngebanga leembandanezo,

¹⁶ nanyana amadoda amathathu lawo bekaphakathi kwayo, ngiyafunga ngokuphila kwami bekangekhe asindise amadodana namkha amadodakazi kodwana bekuzokusinda wona kwaphela; inarha yona isale ilibhudu.” Kutjho uSomnini uSomandla.

¹⁷ “Nakube ngiletha isabula phezu kwenarha leyo ngithi ‘isabula ayidabule inarha’ bese ngiphelise kiyo umuntu nefuyo,

¹⁸ nanyana amadoda amathathu lawo bekaphakathi kwayo, ngiyafunga ngokuphila kwami bekangekhe asindise amadodana namkha amadodakazi, kodwana bekuzokusinda wona kwaphela.

¹⁹ “Nakube ngithumela izifo enarheni leyo, ngithululele ilaka lami phezu kwayo ngokuthulula iingazi, iye ngokuphelisa umuntu nefuyo,

²⁰ nanyana uNowa, uDanyela noJobho bebaphakathi kwayo, ngiyafunga ngokuphila kwami, bebangekhe basindise indodana namkha indodakazi, bebazokusindisa kwaphela ipilwabo ngokulunga kwabo.” Kutjho uSomnini uSomandla.

²¹ “Ngambala nakhu okutjhiwo nguSomnini uSomandla, ‘Kuzokuba kangangani-ke nangehlisela phezu kweJerusalema iingwebo zami ezine ezibhubhisako ngasikhathi sinye, okutjho isabula, indlala, iimbandana zommango nezifo, kobana ziphelise umuntu nefuyo na?

²² Nokho kuzakusala abasindileko edorobhenelo, amadodana namadodakazi akhutjhwe kilo. Qalani, azokuphuma eze kini eBhabheli; kuthi lokha nanilemuka iindlela nezenzo zawo, niduduzeke ngehlekelele engiyehlisele phezu kweJerusalema, iye, ngakho koke engikwehlisele phezu kwalo.

²³ Iye, azaniduduza, lokha nanilemuka iindlela nezenzo zawo. Nje-ke nizakwazi bonyana lokho engikwenzileko, angikakwenzi ngaphandle kwebanga.’ ” Kutjho uSomnini uSomandla.