UHEZEKIYELI 13 - IsiNdebele 2012 Translation

Abaphorofidi bamanga bayakhalinywa

¹ Ilizwi lakaSomnini lafika kimi lathi:

² “Ndodana yomuntu, phorofida ngokujamelana nabaphorofidi bakwa-Israyeli abaphorofidako; iye, labo abaphorofida ngokwemicabangwabo bathi ‘lalelani ilizwi lakaSomnini!’.

³ Yewuthi kibo, ‘Nakhu okutjhiwo nguSomnini uSomandla: Maye kizo iindlhayela zabaphorofidi ezilandela ummoya weenhliziyo zazo zingakaboni ilitho!’

⁴ Abaphorofidi benu, nina Israyeli, babe njengeempungutjha ezikhwabitha phakathi kwefuhlufuhlu.

⁵ Akhange benyukele esikhaleni ukuyokuvuselela umthangala wendlu yakwa-Israyeli kobana bajamele ipi ngelanga lakaSomnini.

⁶ Babone imibono yamanga, baphengula ikohliso bathi ‘uSomnini uthi’, khisibe uSomnini akhange abathume, kuthi kunjalo nje balindele ukuzaliseka kwelizwi labo.

⁷ Angitjho nibone imibono yamanga nabese niphorofida benaphengula ngekohliso nathi ‘kutjho uSomnini’, khisibe mina akhange ngitjho ilitho.

⁸ “Ngalokho nakhu okutjhiwo nguSomnini uSomandla kubaphorofidi, ‘Qalani, ngijamelene nani ngombana nikhulume ikohliso benabona imibono yamanga.’ Kutjho uSomnini uSomandla.

⁹ Iye, isandla sami sizokujamelana nabaphorofidi ababona imibono yamanga nabaphengula ikohliso. Angeze babe sebandleni labantu bami namabizwabo angeze atloliswe encwadini yamabizo yendlu yakwa-Israyeli begodu angeze bangene enarheni yakwa-Israyeli. Nje-ke nizakwazi bonyana nginguSomnini uSomandla.

¹⁰ “Ngebanga lokobana badurhise abantu bami baseze bathi ‘ukuthula’, khisibe ukuthula akukho begodu ngebanga lokobana lokha abantu bami nabakha umthangala ngaphandle kwedaka abaphorofidaba bawusinda ngekaligi,

¹¹ ngalokho, tjela labo abawusinda ngekaligi bonyana uzokuwa umthangala lowo! Kuzokuwuluka izulu, iye ngizokwehlisa isinanja esikhulu, kuvuke isiwuruwuru sommoya.

¹² Lokha umthangala nawuwako abantu bazanibuza bathi, ‘Kuphi ukusinda enisinde ngakho na?’

¹³ “Nakhu okutjhiwo nguSomnini uSomandla, ‘Ngobukhali bami ngizokuvusa isiwuruwuru sommoya, ngelaka lami kuwuluke izulu elikhulu, iye, ngobukhali bami kuzakuba nesinanja esikhulu esibhubhisako.

¹⁴ Ngizokubhuruza umthangala eniwusinde ngekaligi. Ngizowuwisela phasi kobana iinsekelo zawo zibe semtarini. Iye, idorobho lizakuwa, nina baphorofidi nibhubhele ngaphakathi kwalo! Nje-ke nizakwazi bonyana nginguSomnini.

¹⁵ Ngendlela leyo ngizokuvuthela ilaka lami phezu komthangala naphezu kwalabo abawusindileko. Nje-ke ngizakuthi kini, “Umthangala awusekho nabawusindileko banyamalele,

¹⁶ okutjho abaphorofidi bakwa-Israyeli abaphorofide mayelana neJerusalema bebabona nemibono yokuthula ngalo, khisibe bekunganakuthula.” ’ ” Kutjho uSomnini uSomandla.

¹⁷ “Nje-ke wena ndodana yomuntu, beka ubuso bakho emadodakazini wabantu bekhenu, aphorofida ngokwemicabangwawo; iye, phorofida ngokujamelana nawo.

¹⁸ Atjele bonyana nakhu okutjhiwo nguSomnini uSomandla, ‘Maye ebafazini abathunga iinthukulo zemilingo kiwo woke amaqakala, benze neendugu ezilingana iinhloko zabantu ngokuhlukahlukana kwabo ukuze bakhunge imiphefumulo. Nizakukhunga imiphefumulo yabantu bami kobana nondle ipilwenu na?

¹⁹ Nisilaphaze ibizo lami ebantwini bami ngekereketjhana yebhali nangeenquqwana zesikwa. Nibulala imiphefumulo engakafaneli ukufa, nibabalela ekufuze ingaphili ngokukhuluma amanga ebantwini bami abalalela amangenu.’

²⁰ Ngalokho nakhu okutjhiwo nguSomnini uSomandla: Qalani ngiphambene neenthukulo zemilingo enikhunga ngazo abantu eJerusalemapho ukuze baphumelele. Ngizozidabula iinthukulo zemilingo lezo emaqakalenenu, ngithukulule abantu enibakhungileko ukuze baphumelele.

²¹ Neendugu zenu ngizozidabula, ngitjhaphulule abantu bami ezandleni zenu, bangasabi bongazimbi ezandleni zenu. Nje-ke nizakwazi bonyana nginguSomnini.

²² Ngamanga nibangele abalungileko iinhlungu ehliziyweni, iye, abantu ebengingafuni bona bezwe ubuhlungu. Nikhuthaze abakhohlakeleko kobana bangaphenduki eendleleni zabo zobukhohlakali ngokusindisa ipilwabo.

²³ Ngalokho angeze nisabona imibono yekohliso namkha niphengule. Abantu bami ngizobatjhaphulula esandleni senu. Nje-ke nizakwazi bonyana nginguSomnini.”