UHEZEKIYELI 12 - IsiNdebele 2012 Translation

Ukuthunjwa kuyamenyezelwa

¹ Ilizwi lakaSomnini lafika kimi lathi:

² “Ndodana yomuntu, uhlala phakathi kwendlu ehlubukako okubabantu abanamehlo wokubona kodwana akaboni, baneendlebe zokuzwa kodwana azizwa, mbala bayindlu ehlubukako.

³ “Ngalokho wena ndodana yomuntu, zilungiselele umthwalo womthunjwa, uphume bakuqalile emini libalele. Ukhambe njengomthunjwa usuke lapha ukhona uye kwenye indawo bakuqalile. Mhlumbe lokho bazakuzwisisa nanyana bayindlu ehlubukako nje.

⁴ Uzakukhupha umthwalwakho njengowomthunjwa emini bakuqalile. Kuthi ntambama bakuqalile wena uphume njengabathunjwa nabaya ekuthunjweni.

⁵ Kuzakuthi basakuqalile, uphundluse umthangala bese uphuma nomthwalwakho ngentunja leyo.

⁶ Khona emehlwenabapho utjathe umthwalwakho, uphume nawo ngamarhwaqela. Sitha ubuso bakho ukuze ungaboni inarha ngombana ngikwenza isibonakaliso endlini yakwa-Israyeli.”

⁷ Nje-ke ngenza njengombana ngiyaliwe. Ngakhupha umthwalami emini libalele, kwaba inga mthwalo wokuthunjwa. Kwathi ntambama ngaphundlusa umthangala ngezandla zami. Ngaphuma ngamarhwaqela ngitjathe umthwalwami bangiqalile.

⁸ Kwathi ekuseni kwafika kimi ilizwi lakaSomnini lathi:

⁹ “Ndodana yomuntu, angithi indlu ehlubukako yakwa-Israyeli yathi kuwe, ‘Wenzani na?’

¹⁰ Ngalokho yithi kiyo, ‘Nakhu okutjhiwo nguSomnini uSomandla: Isimemezelwesi simalungana nekosana engeJerusalema nayo yoke indlu yakwa-Israyeli ekanye nayo.’

¹¹ Yewuthi kubathunjwa, ‘Ngisibonakaliso kini: Njengombana ngenzile, kuzakuba njalo ekosaneni leyo nakilabo abakiyo. Bazokuya ekuthunjweni, iye, ekudingisweni.’

¹² Nekosana ephakathi kwabo izakutjatha umthwalo ngamarhwaqela irhotjhe. Iye, bazakuphundlusa umthangala kobana bakhokhobise imithwalo ngentunja. Ikosana izakusitha ubuso bayo ngombana yona ngokwayo angeze yabona inarha ngelihlo layo godu.

¹³ Ngizokweneka inedami phezu kwayo, iye, izakubanjwa ngesifwini sami. Ngizayiletha eBhabheli enarheni yamaKasidi, kodwana yona angeze yakubona lokho begodu izakuhlongakalela lapho.

¹⁴ Boke abayizombelezileko ekubasizi bayo okutjho loke ibutho layo ngizobahlakazela emikhakheni yoke. Ngizobalandela ngirhwatjhe isabula ngemva kwabo.

¹⁵ Bazakwazi bonyana nginguSomnini lokha nangibasabalalisa hlangana nezizwe, ngibahlakazele emazweni.

¹⁶ Kodwana idlanzana labo ngizolisindisa esabuleni, endlaleni nezifweni ukuze bavume zoke iinkghabhudlo zabo hlangana nezizwe abaye kizo. Nje-ke bazakwazi bonyana nginguSomnini.”

¹⁷ Ilizwi lakaSomnini lafika kimi lathi:

¹⁸ “Ndodana yomuntu, yidla ukudla kwakho ngokuthuthumela, usele amanzi ngokuqhaqhazela nangokuminya

¹⁹ bese uthi ebantwini benarheni le, ‘Nakhu okutjhiwo nguSomnini uSomandla mayelana nabahlali beJerusalema enarheni yakwa-Israyeli: Bazokudla ukudla kwabo ngokuminya basele amanzabo ngokuzibamba ngombana isifunda seJerusalema sizokwemukwa koke esinakho ngenca yenturhu yalabo abahlala kiso.

²⁰ Imizi neendawo zokuhlala kuzakuba marubhi, nenarha izokuba libhudu. Nje-ke nizakwazi bonyana nginguSomnini.’ ”

²¹ Ilizwi lakaSomnini lafika kimi lathi:

²² “Ndodana yomuntu, sitjho ukuthini isaga eninasweso enarheni yakwa-Israyel, esithi, ‘amalanga ayadlula nemibono yoke iba lilize’ na?

²³ Ngalokho batjele bonyana nakhu okutjhiwo nguSomnini uSomandla, ‘Isagesi ngizosiphelisa, yeke, angeze basasisebenzisa njengesaga kwa-Israyeli.’ Kodwana yewuthi kibo, ‘Amalanga afikile nokuphetheka komunye nomunye umbono kuseduze.’

²⁴ Mbala, angeze kusabakhona umbono wamanga namkha ukuphengula okukhohlisako endlini yakwa-Israyeli

²⁵ ngombana mina Somnini, ngizokukhuluma. Lokho engizakumemezela kuzakwenzeka. Angeze kusariyadiswa godu; iye emalangenenu, nina ndlu ehlubukako, ngizokumemezela ilizwi bengilenze.” Kutjho uSomnini uSomandla.

²⁶ Godu ilizwi lakaSomnini lafika kimi lathi:

²⁷ “Ndodana yomuntu, qala, indlu yakwa-Israyeli ithi, ‘Imibono umphorofidi lo ayibonako ingeyeminyaka eminengi ezako; iye, iimphorofidwezo zingezesikhathi esikude.’

²⁸ Ngalokho yithi kiyo, ‘Nakhu okutjhiwo nguSomnini uSomandla: Alikho nalinye lamezwami elizakuriyadiswa godu; ilizwi engilimemezeleko lizokwenzeka.’ ” Kutjho uSomnini uSomandla.