UHEZEKIYELI 11 - IsiNdebele 2012 Translation

Ukugwetjwa kwabarholi bakwa-Israyeli

¹ UMoya wangiphakamisa wangiletha ngesangweni elingepumalanga lethempeli lakaSomnini eliqale ngepumalanga. Qala, ebungenweni besango bekujame amadoda amatjhumi amabili namahlanu. Phakathi kwawo ngabona noJazaniya umsa ka-Azuri noPelathiyahu umsa kaBhenaya ebekuziinkhulu zabantu.

² UMoya wathi kimi: “Ndodana yomuntu, la ngiwo amadoda aphehla ubumbi nakeluleka ngekohlakalo ngedorobheneli

³ begodu athi, ‘Isikhathi sokwakha izindlu sisesekude. Idorobheli liyimbiza, thina siyinyama!’

⁴ “Ngalokho phorofida ngokujamelana namadoda lawo, iye, phorofida wena ndodana yomuntu.”

⁵ UMoya kaSomnini wehlela phezu kwami, wathi kimi: “Yithi, nakhu okutjhiwo nguSomnini, ‘Nitjho njalo nina ndlu yakwa-Israyeli, ngitjho nalokho enikucabangako, mina ngiyakwazi.

⁶ Ababuleweko benu nibandisile edorobheneli, iye, ababuleweko bagcwele iindledlana zalo.’

⁷ Ngalokho nakhu okutjhiwo nguSomnini: Ababuleweko benu enababeka phakathi kwalo, ngibo abayinyama! Idorobheli liyimbiza kodwana nina ngizonikhupha ngaphakathi kwalo.

⁸ Isabula eniyesabako, kuyisabula engizoyiletha phezu kwenu. Kutjho uSomnini uSomandla.

⁹ Ngizonikhupha ngaphakathi kwalo, ngininikele ezandleni zamaphandle bengehlisele iingwebo phakathi kwenu.

¹⁰ Nizokuwa ngesabula, ngizanigweba ngemikhawulweni yakwa-Israyeli. Nje-ke nizakwazi bonyana nginguSomnini.

¹¹ Idorobho angeze libe yimbiza kini namkha nibe yinyama ngaphakathi kwayo. Ngizonigweba ngemikhawulweni yakwa-Israyeli.

¹² Ngalokho nizakwazi bonyana nginguSomnini. Iye azange nikhambe ngeemiso zami namkha nilandele imithethwami, kodwana nikhambe ngemithetho yabezizwe abanizombelezileko.”

¹³ Kwathi ngisaphorofida njalo, uPelathiyahu umsa kaBhenaya wahlongakala. Nje-ke ngawa ngobuso ngarhuwelela ngelizwi elikhulu ngathi: “Awu Somnini, Somandla, ingabe uzokuphelisa imisalela yakwa-Israyeli na?”

¹⁴ Nje-ke lizwi lakaSomnini lafika kimi lathi:

¹⁵ “Ndodana yomuntu, abafowenu, iye, abafowenu bangendlini, ngitjho nendlu yoke yakwa-Israyeli, boke njalo kungilabo abahlali beJerusalema abathe ngabo, ‘Basukile, bakude noSomnini, nakungithi inarha le inikelwe thina njengelifa.’

¹⁶ Ngalokho yewuthi, ‘Nakhu okutjhiwo nguSomnini uSomandla: Nanyana ngibasuse ngabasa kude hlangana nezizwe godu nanyana ngibahlakazele eenarheni, nokho ngibe yindawo ecwengileko kibo kwesikhatjhana eenarheni abaye kizwezo.’

¹⁷ Yeke yewuthi, ‘Nakhu okutjhiwo nguSomnini uSomandla: Ngizonibutha hlangana nezizwe, nginikghuthe eenarheni lapha benihlakazelwe khona, ngininikele inarha yakwa-Israyeli.’

¹⁸ Kuzakuthi nabafika lapho basuse zoke iinyenyiso nazo zoke iinkghabhudlho kiyo.

¹⁹ Ngizabapha ihliziyo eyodwa, iye, ngifake kibo ummoya omutjha. Ngizakukhupha ihliziyo yelitje phakathi kwabo bese ngibapha ihliziyo ethambileko

²⁰ ukuze bakhambe ngeemiso zami bebalonde imithethwami bayenze. Bazakuba babantu bami mina ngibe nguZimabo.

²¹ Kodwana nakungilabo abaneenhliziyo ezilandelelana neenyenyiso neenkghabhudlho zabo, ngizobabetha ngeentonga zabo.” Kutjho uSomnini uSomandla.

²² Nje-ke amakerubhi aphakamisa iimpiko zawo kanye namavili angemaqadi kwawo khibe iphazimulo kaZimu ka-Israyeli beyiphezu kwawo.

²³ Iphazimulo kaSomnini yaphakama phakathi kwedorobho, yafese yajama phezu kwentaba engepumalanga yedorobho.

²⁴ UMoya wangiphakamisa wangiletha ebathunjweni ngenarheni yamaKasidi, ngisembonweni ngoMoya kaZimu. Nje-ke umbono ebe ngiwubonileko wenyuka wasuka kimi.

²⁵ Manje ngatjela abathunjwa zoke izinto uSomnini agade angibonise zona.