UHEZEKIYELI 10 - IsiNdebele 2012 Translation

Ukusuka kwephazimulo ethempelini

¹ Nje-ke ngaqala, ngabona phezu kwesigubuzeso ebesingehla kweenhloko zamakerubhi into efana nelitje lesafaya; nento enjengomfanekiso wesibumbeko sesihlalo sobukhosi yaba semtarini ngehla kwakho koke lokho.

² USomnini wathi emuntwini owembethe zelineni: “Ngena hlangana namavili ngaphasi kwamakerubhi. Zalisa izandla zakho ngamalahle avuthako owathethe phakathi kwamakerubhi, uwarhatjhe ngaphezu kwedorobho.” Nje-ke wangena ngimqalile.

³ Amakerubhi gade ajame ngesewula yethempeli lokha umuntu loyo nakangenako. Ilifu lazalisa isirhodlo esingaphakathi.

⁴ Iphazimulo kaSomnini yenyuka ngehla kwamakerubhi yaya embunjwaneni wethempeli. Ithempeli beligcwele ilifu, isirhodlo sizele ubuphaziphazi bephazimulo kaSomnini.

⁵ Kwezwakala itjhada leempiko zamakerubhi ukufikela esirhodlweni esingaphandle, kwaba njengephimbo loSabekako lokha nakhulumako.

⁶ Wayala umuntu owembhethe ilineni wathi: “Yokha umlilo hlangana namavili phakathi kwamakerubhi.” Nje-ke wangena, wafese wajama eqadi kwevili.

⁷ Elinye ikerubhi lelulela isandla salo phakathi kwamanye amakerubhi kobana lokhe umlilo liwubeke ezandleni ezikhongozeleko zowembethe zelineni, yena wawuthatha waphuma nawo.

⁸ Amakerubhi abonakala anesimo sesandla somuntu ngaphasi kweempiko zawo.

⁹ Nje-ke ngaqala, ngabona amavili amane ngeqadi kwamakerubhi, elinye nelinye ivili belingeqadi kwekerubhi. Amavili lawo bekaphazima njengelitje lebherili.

¹⁰ Umfanekiswawo bewunesibumbeko esifanako womane njalo, kubonakala ngathi kulivili ngaphakathi kwelinye.

¹¹ Lokha nakhambako gade anqomba nanyana ngakiliphi ihlangothi kilawo amane, ngaphandle kokujika. Iye, lapha ikerubhi elingaphambili linqomba khona, amavili bekalandela ngaphandle kokujika.

¹² Woke umzimba wamakerubhi, imihlanawo, izandla zawo neempiko zawo kanye namavili bekugcwele amehlo mazombe. Elinye nelinye belinevili lalo.

¹³ Mina ngazizwela ngeendlebe zami kuthiwa amavili abizwa bona “asiyingilizisi”.

¹⁴ Womane amakerubhi bekanobuso obune: bokuthoma bekububuso bekerubhi, besibili kungebomuntu, besithathu kungebebhubezi, kuthi besine kube ngebekhozi.

¹⁵ Nje-ke amakerubhi aphakama. Lezi bekuziimphili engazibona ngemlanjeni weKebari.

¹⁶ Kwathi lokha amakerubhi nakhambako, amavili nawo akhamba emaqadi kwawo. Lokha amakerubhi aphakamisa amaphikwawo kobana aphaphele phezulu ukusuka ephasini, amavili akhange ajike emaqadi kwawo.

¹⁷ Kuthi lokha amakerubhi najamako, namavili ajame. Kuthi lokha naphakamako, nawo aphakame ngombana ummoya bewulawula amavili.

¹⁸ Iphazimulo kaSomnini yaphuma embunjwaneni wethempeli yafese yajama phezu kwamakerubhi.

¹⁹ Nje-ke amakerubhi aphakamisa iimpiko zawo aphaphela phezulu asuka ephasini ngiwaqalile, amavili bekasemaqadi kwawo. Amakerubhi lawo afese ajama ebungenweni besango langepumalanga lethempeli lakaSomnini. Iphazimulo kaZimu wakwa-Israyeli beyiphezu kwawo.

²⁰ Lezo bekuziimphili engazibona ngaphasi kwakaZimu wakwa-Israyeli ngemlanjeni iKebari. Nje-ke bengazi bona zimakerubhi.

²¹ Esinye nesinye besinobuso obune neempiko ezine bese kuthi ngaphasi kweempiko kube nomfanekiso osasandla somuntu.

²² Mayelana nesibumbeko sobuso bazo: Lobo bekububuso engabubona emlanjeni weKebari, iye, umfanekiswazo lo bekungizo mbala. Esinye nesinye sanqomba ngqo phambili.