UHEZEKIYELI 1 - IsiNdebele 2012 Translation

Umbono weemphili nephazimulo kaSomnini

¹ Kwathi ngomnyaka wamatjhumi amathathu, inyanga yesine inamalanga amahlanu, ngangiphakathi kwabathunjwa emlanjeni iKebari, izulu lavuleka ngabona imibono kaZimu.

² Ngelanga lesihlanu lenyanga, emnyakeni wesihlanu wokuthunjwa kwekosi uJehoyakini,

³ ilizwi lakaSomnini mbala leza kimi, mina mphristi uHezekiyeli umsa kaBhuzi, enarheni yamaKasidi emlanjeni iKebari. Isandla sakaSomnini saba phezu kwami lapho.

⁴ Kwathi ngisaqalile njalo, kwavela isiwuruwuru ngetlhagwini. Bekulilifu elikhulu elinomlilo osoloko ubaneka njalo; mazombe kwalo bekunobuphaziphazi. Emlilweni lowo bekunento ephazima sasimbi.

⁵ Phakathi komlilo bekunesibumbeko seemphili ezine. Umfanekiso wazo bewungalendlela: Zinesibumbeko somuntu.

⁶ Esinye nesinye besinobuso obune neempiko ezine.

⁷ Imilenzazo eengogoriyaneni beyithabulukile, iinyawo zazo zifana nezeqatha lekonyana, ziphazima njengekoporo emanyako.

⁸ Emahlangothinazo amanye ngaphasi kwamaphikwazo bezinezandla zomuntu. Zozine bezinobuso neempiko ebezingalendlela:

⁹ Iimpiko zazo bezithintene elinye kwelinye. Elinye nelinye lanqomba ngqo laya phambili; ekukhambeni kwazo belingajiki.

¹⁰ Isibumbeko sobuso bazo besibubuso bomuntu ngaphambili, ngesidleni zinobuso bebhubezi, ngesinceleni zinobuso bekunzi begodu zozine njalo bezinobuso bekhozi ngemuva;

¹¹ iye, bebunjalo-ke ubuso bazo. Iimpiko zazo bezithabalalele phezulu. Isiphili esinye nesinye besineempiko ezimbili ezithinta iimpiko zesinye, kuthi ezinye ezimbili zivale umzimbazo.

¹² Esinye nesinye besikhamba siyaphambili; beziya ngapha kuya khona ummoya; ekukhambeni kwazo bezingajiki.

¹³ Isibumbeko seemphili godu besinje: Umfanekiso wazo bewunjengamalahle avuthako, iye, bewunjengeenhlothi ezivuthako. Hlangana neemphilapho bekumekeza umlilo. Umlilo lowo bewunomkhanyo begodu phakathi kwawo kwaphuma imibani.

¹⁴ Iimphili lezo zehla zenyuka njengombani omekezako.

¹⁵ Kwathi ngisaqale iimphili lezo, ngabona ivili elilodwa phasi ngakelinye nelinye ihlangothi kilawo amane wesiphili.

¹⁶ Umfanekiso wamavili nokwakheka kwawo bekunje: Bekaphazima njengebherili. Amavili womane bekanesibumbeko esifanako. Ukwakheka kwawo bekungathi kunevili ngaphakathi kwelinye.

¹⁷ Nakakhambako bekakwazi ukuya emahlangothini amane, ngaphandle kokujika.

¹⁸ Umphetho wamavili bewumkhulu wesabeka begodu yomine imiphetho leyo beyigcwele amehlo mazombe.

¹⁹ Lokha iimphili nazikhambako, amavili bekakhamba emaqadi kwazo. Kuthi lokha iimphili nazisikima phasi namavili aphakame.

²⁰ Lapho ummoya bewuya ngakhona, beziya kanye namavili ngemaqadi kwazo ngombana ummoya weemphili bewulawula amavili.

²¹ Lokha iimphili nazikhambako namavili bekakhamba; nazijamako namavili bekajama. Lokha iimphili nazisikimako namavili bekaphakama nazo; iye, ummoya weemphili bewulawula amavili.

²² Ngehla kweenhloko zeemphili bekunento efana nesigubuzeso, ikhanya njengesiboniboni esiphandlako. Beyindlaleke ngehla kweenhloko zazo.

²³ Ngaphasi kwesigubuzeso iimphili beziphurululele iimpiko zazo phezulu kobana iimpikwezo zithintane. Esinye nesinye isiphili besineempiko ezimbili ezivale umzimbaso.

²⁴ Lokha nazikhambako ngezwa itjhada leempiko elifana namanzi amanengi, iye, njengomdumo woSabekako nanjengomkhosi webutho. Nazijamako zehlisa iimpiko zazo.

²⁵ Nje-ke kwathi iimphili lezo nazijamako, zehlisa iimpiko zazo, kwaba nelizwi elivela ngaphezu kwesigubuzeso ebesingehla kweenhloko zazo.

²⁶ Nje-ke ngaphezu kwesigubuzeso ebesingehla kweenhloko zazo bekunomfanekiso wesafaya onesibumbeko sesihlalo sobukhosi. Ngaphezu kwesibumbeko sesihlalo sobukhoseso bekunesibumbeko esinomfanekiso womuntu.

²⁷ Umfanekiso lowo ngawubona uphazima sasimbi: Ukusuka edinini ukuya ehloko yomfanekiso bekumanyazela njengesimbi enga inomlilo ngaphakathi kwayo; ngenzasi kwedini ngabona kungathi mlilo onemisebe.

²⁸ Njengezungu leKosi ngelanga lezulu, beyinjalo koke iphazimulo mazombe. Lokhu bekukubonakala kwephazimulo kaSomnini. Lokha nangibona lokho, ngawa ngobuso ngezwa ilizwi likhuluma.