UHAGAYI 2 - IsiNdebele 2012 Translation

¹ elangeni lamatjhumi amabili nanye, ngenyanga yekhomba, ilizwi lakaSomnini lafika ngomphorofidi uHagayi lathi:

² “Khuluma noZerubhabheli umsa kaTjheyaltiyeli, umbusi wakwaJuda, noJotjhuwa umsa kaJehozadaki, umphristi omkhulu kanye nebantwini boke abimisalela, uthi:

³ ‘Ngubani kinapha oseleko owabona indlu le isesekazimulwenayo yaphambilini? Naniyiqalako niyibona injani-ke kwanjesi? Ayinifaneli nelize lakolize na?

⁴ Nje-ke qina amandla, Zerubhabheli,’ kutjho uSomnini. ‘Qina amandla nawe, Jotjhuwa, umsa kaJehozadaki umphristi omkhulu. Qinani amandla nani noke bantu benarha le,’ kutjho uSomnini. ‘Sebenzani ngombana nginani,’ kutjho uSomnini uMninimandlawoke.

⁵ ‘Ngikhokhu engakubopha nani lokha naniphuma eGibhide. UMoyami unani njalo, yeke ningesabi.’

⁶ “Ngambala, lokhu ngokwatjhiwo nguSomnini uMninimandlawoke, ‘Kuzakuthi msinyazana ngisikinye amazulu nephasi, nelwandle kanye nenarha eyomileko.

⁷ Ngizakusikinya zoke izizwe bese kuvela amagugu wezizwe zoke, yeke ngizalise indlu le ngephazimulo,’ kutjho uSomnini uMninimandlawoke.

⁸ ‘Isiliva ngelami, negolide ngelami,’ kutjho uSomnini uMninimandlawoke.

⁹ ‘Iphazimulo yendlu yagadesi le izakuba yikulu kuneyendlu yaphambilini,’ kutjho uSomnini uMninimandlawoke. ‘Begodu ngizanipha ukuthula endaweni le,’ kutjho uSomnini uMninimandlawoke.”

Iimbusiso zakaSomnini

¹⁰ Ngelanga lamatjhumi amabili nane lenyanga yethoba, emnyakeni wesibili wakaDariyasi, ilizwi lakaSomnini lafika kumphorofidi uHagayi lathi:

¹¹ “Nakhu okwatjhiwo nguSomnini uMninimandlawoke, ‘Akhe ubuze abaphristi bonyana umyalwabo uthini:

¹² Nangabe umuntu utjhubelela inyama ecwengisiweko ngengubakhe bese ingubo leyo ikghwatha isikwa namkha isitjulu, iwayini, amafutha we-oliva nanyana okhunye nje ukudla, inyama leyo isacwengile nayinjalo na?’ ” Abaphristi bamphendula bathi: “Awa”.

¹³ Yeke uHagayi wathi: “Lokha umuntu osilaphazwe kuthintana nesidumbu, nathinta enye yezintwezi, nayo iyasilaphala na?” Abaphristi bamphendula bathi: “Iye, iyasilaphala.”

¹⁴ Yeke uHagayi waphetha ngokuthi: “ ‘Banjalo-ke nabantwaba, nesizwe esiphambi kwamesi,’ kutjho uSomnini. ‘Unjalo-ke nomsebenzi wezandla zabo, nalokho abanikela ngakho lapho kusilaphazekile.

¹⁵ “ ‘Nje-ke, yelelani iindlela zenu kusukela namhlanje, ngomuso nanini, nizibuze bonyana izinto bezikhamba njani nakungakabi ukwakhiwa iboda lethempeleni lakaSomnini.

¹⁶ Bekuthi nanyana ngubani ofika equbini lekoroyi, nakalindele ukufunyana imigodla ematjhumi amabili, afunyane elitjhumi kwaphela. Nanyana ngubani oya ebutlhodlhelweni athi uyokukha iinlinganiso ezimatjhumi amahlanu zewayini, afunyane ezimatjhumi amabili.

¹⁷ Ngarhadla soke isivuno senu ngobori, ngokukghora nangesinanja, kodwana azange niphendukele kimi,’ kutjho uSomnini.

¹⁸ ‘Yelelani iindlela zenu kusuka namhlanjesi, ngomuso nanini, nizibuze bona izinto bezikhamba njani, kusukela elangeni lamatjhumi amabili nane enyangeni yethoba mhlana kukghenywa isisekelo sethempeli lakaSomnini. Yelelani:

¹⁹ Kusese nembewu eseleko ngesilulwini na? Isidiribe, amakhiwani, amarharinada nanyana imithi ye-oliva ehlomileko. Kodwana kusukela namhlanje, ngizanibusisa.’ ”

Isithembiso sakaZimu kuZerubhabheli

²⁰ Ilizwi lakaSomnini lafika kuHagayi kwesibili elangeni lamatjhumi amabili nane lenyanga lathi:

²¹ “Tjela uZerubhabheli, umbusi wakwaJuda: ngizokusikinya amazulu nephasi.

²² Ngizokuketula iinhlalo zobukhosi bengibhidlize namandla weengodlo zezizwe. Ngizakuketula iinkarana nabatjhayeli bazo; iinjomani nabakhweli bazo bazakurhadleka phasi, omunye nomunye arhadlwe yisabula yomfowabo.

²³ “ ‘Mhlokho,’ kutjho uSomnini uMninimandlawoke, ‘ngizakuthatha wena Zerubhabheli, msa kaTjhelitiyeli, njengencekwami,’ kutjho uSomnini, ‘ngizakwenza ube njengedzilamnwanami, ngombana ngikukhethile,’ kutjho uSomnini uMninimandlawoke.”