UHAGAYI 1 - IsiNdebele 2012 Translation

Isimemo sokuvuselela ithempeli lakaSomnini

¹ Ngomnyaka wesibili wekosi uDariyasi, elangeni lokuthoma lenyanga yesithandathu, ilizwi lakaSomnini lafika kuZerubhabheli umsa kaTjheyaltiyeli, umbusi wakwaJuda, nakuJotjhuwa umsa kaJehozadaki, umphristi omkhulu, ngomphorofidi uHagayi lathi:

² Nakhu okwatjhiwo nguSomnini uMninimandlawoke: “Abantwaba bathi, ‘Isikhathi sokobana kwakhiwe indlu kaSomnini asakafiki.’ ”

³ Yeke ilizwi lakaSomnini lafika ngomphorofidi uHagayi lathi:

⁴ “Kusikhathi sokobana nina nihlale eendlini zakanokutjho, khibe indlu le yona ilokhu ilirubhi njalo na?”

⁵ Nakhu okutjhiwo nguSomnini uMninimandlawoke: “Yelelani iindlela zenu.

⁶ Nitjele khulu, kodwana nivuna kancani. Niyagoma, kodwana anisuthi. Niyasela kodwana anikholwa. Niyembatha, kodwana anifuthumali. Niyarhola bese nifaka umrholo ngembadeni evuzako.”

⁷ Nakhu okwatjhiwo nguSomnini uMninimandlawoke: “Yelelani iindlela zenu.

⁸ Nyukelani eentabeni bese newuka neengodo nakhe indlu ukuze ngizithabise ngayo bengidunyiswe.” kutjho uSomnini.

⁹ “Benirhuluphele okunengi, kodwana qalani kujike kwaba yitupurujwana. Lokho ebenithi nikuletha ekhaya, ngakukhafulela. Ngebanga lani-ke?” Kutjho uSomnini uMninimandlawoke. “Ngebanga lendlwami, esolo yajama ilirubhi, ngapha khibe nina omunye nomunye wenu uzithabisa ngendlwakhe.

¹⁰ Nje-ke, ngebanga lenu, amazulu agugudlhele izulu lawo, nephasi lagugudlhela isivuno salo.

¹¹ Ngehlisele isomiso emasimini neentabeni, phezu kwesivuno samabele, sewayini elitjha, emafutheni we-oliva naphezu kwananyana yini esimila, phezu kwabantu naphezu kwefuyo, naphezu kwemisebenzi yezandla zenu.”

¹² Yeke uZerubhabheli umsa kaTjheyaltiyeli, uJotjhuwa umsa kaJehozadaki, umphristi omkhulu, nayo yoke imisalela yabantu balalela ilizwi lakaSomnini uZimabo kanye nomlayezo womphorofidi uHagayi ngombana ubagade athunywe nguSomnini uZimabo. Nje-ke abantu besaba uSomnini.

¹³ Yeke uHagayi, isithunywa sakaSomnini, wathula umlayezo kaSomnini ebantwini wathi: “Nginani, kutjho uSomnini.”

¹⁴ Nje-ke uSomnini watlhotlholoja ummoya kaZerubhabheli umsa kaTjheyaltiyeli, umbusi wakwaJuda, nommoya kaJotjhuwa umsa kaJehozadaki, umphristi omkhulu, kanye nommoya wabo boke abantu abimisalela. Bafika bebathoma ukusebenza endlini kaSomnini uMninimandlawoke, uZimabo,

¹⁵ elangeni lamatjhumi amabili nane ngenyanga yesithandathu. Ngomnyaka wesibili wekosi uDariyasi,