UGENESISI 9 - IsiNdebele 2012 Translation

Isivumelwano sakaZimu noNowa

¹ Nje-ke uZimu wabusisa uNowa namadodanakhe, wathi kibo: “Belethani nande nizalise iphasi.

² Zoke iinlwana zephasi, iinyoni zomkayi neembandana zoke ezikhakhaba ehlabathini, iinhlambi zoke zelwandle zizakwethukwa zesabe ngani; zona-ke ngizinikele ezandleni zenu.

³ Yoke into ephilako nekhambako izakuba kukudla kwenu. Njengombana nganinikela iintjalo ezilihlaza, njenganje ngininikela koke.

⁴ “Kodwana akukameli nidle inyama eneengazi ngombana eengazini kunepilo.

⁵ Ngiqinisile, lokha iingazi nazithululwako, ngizazibiza kozithululako. Kungaba silwana namkha umuntu nakasusa ipilo yenu, kuzakuba mlandu. Iye, umuntu osusa ipilo yomfowabo ngizakubiza neengazi zomfowabo kuye.

⁶ “ ‘Othulula iingazi zomuntu uzakugwetjwa nezakhe iingazi zithululwe phambi kwabantu.’ “Lokhu kunjalo ngombana umuntu wenziwa ngomfanekiso kaZimu.

⁷ Nina-ke belethani nande; yandani ephasini nilizalise.”

⁸ Nje-ke uZimu wathi kuNowa namadodanakhe:

⁹ “Mina-ke ngenza nani isivumelwano sami nesizukulwana senu esizakunilandela.

¹⁰ Godu kuzakuba sivumelwano kanye neendalwa zoke ezikanye nani, okutjho iinyoni, ifuyo, neenlwana zoke ezaphuma nawe ngemkhunjini, okungesinye nesinye isidalwa esiphila ephasini.

¹¹ Ngijamisa isivumelwano sami nani: Angeze bekusenzeka bona kubhujiswe ipilo ngamanzi womthwalela. Iye, godu nomthwalela awusoze usabhubhisa iphasi.”

¹² UZimu wathi: “Nanti itshwayo lesivumelwano engisenza phakathi kwami nani naphakathi kweendalwa zoke ezinani, okusivumelwano seenzukulwana ngeenzukulwana:

¹³ Ngibeka izungu leKosi emafini, lizakuba litshwayo lesivumelwano phakathi kwami nephasi.

¹⁴ Ngaso soke isikhathi lokha nangiveza amafu wezulu phezu kwephasi bese kubonakala izungu leKosi

¹⁵ ngizakukhumbula isivumelwano sami nani neendalwa eziphilako zemihlobo yoke. Amanzi awasoze abe mthwalela wokubhubhisa zoke iimphili.

¹⁶ Lokha izungu leKosi nalibonakala emafini, ngizalibona bese ngikhumbula isivumelwano sanini nanini phakathi kwakaZimu neendalwa zomhlobo woke ophila ephasini.”

¹⁷ UZimu wathi kuNowa: “Leli litshwayo lesivumelwano engisijamise phakathi kwami nepilo yoke ephasini.”

Amadodana kaNowa

¹⁸ Amadodana kaNowa aphuma emkhunjini nguTjhemu, uRhamu noJafethi. URhamu gade anguyise kaKanana.

¹⁹ Lawo bekumadodana amathathu kaNowa, okwathi kiwo kwavela boke abasabalala nephasi.

²⁰ UNowa wathoma ukuba mlimi. Watjala isidiribe

²¹ bewasela iwayini laso. Wadakwa kangangobana walala ngetendeni lakhe abhunubhunu.

²² URhamu, uyise kaKanana, wabona ububhunubhunu bakayise, watjela abafowabo ababili ebebangaphandle.

²³ UTjhemu noJafethi bathatha ingubo bayiphakamisela emahlombabo; bakhamba sinyava bangena babhibha ububhunubhunu bakayisabo. Ubuso babo bebufulathele ukuze bangaboni ububhunubhunu bakayisabo.

²⁴ Kuthe lokha uNowa nakaqaquluka ewayinini lakhe nokufunyana bona yenzeni kuye indodanakhe encani,

²⁵ wathi: “Akanikelelwe uKanana! Uzakuba likhoboka lakokhoboka kibomnakwabo.”

²⁶ Godu wathi: “Akudunyiswe uSomnini uZimu kaTjhemu! UKanana uzakuba likhoboka lakaTjhemu.

²⁷ UZimu uzakwelula imikhawulo kaJafethi; abe sithekeli ematendeni kaTjhemu. UKanana uzakuba likhoboka lakaJafethi.”

²⁸ Emva komthwalela uNowa waphila iminyaka emakhulu amathathu namatjhumi amahlanu.

²⁹ Yoke iminyaka uNowa ayiphilako imakhulu alithoba namatjhumi amahlanu, emva kwalokho wahlongakala.