UGENESISI 8 - IsiNdebele 2012 Translation

Ukubohla kwamanzi

¹ Nje-ke uZimu wakhumbula uNowa neenyamazana zommango kanye nefuyo yoke egade inaye ngemkhunjini. Wathumela ummoya ebusweni bephasi bonyana uvunguze ukuze amanzi athome ukubohla.

² Imithombo yamanzi amanengi ngaphasi neentunja zezulu kwavaleka, izulu lathula.

³ Amanzi aya ngokuya abohla ephasini. Emva kwamalanga alikhulu namatjhumi amahlanu amanzi gade sele ehlile.

⁴ Ngelanga lekhomba enyangeni yekhomba umkhumbi wahlala phezu kweentaba ze-Ararathi.

⁵ Amanzi aya njalo abohla bekwaba selangeni lokuthoma lenyanga yetjhumi lapha iinqongo zeentaba zathoma khona ukubonakala.

⁶ Emva kwamalanga amatjhumi amane uNowa wavula intunja yomkhumbi ebegade ayenze ephahleni.

⁷ Wathuma igubulu, laphapha kodwana langasabuyi; lazulazula amanzi abe arhobha ephasini.

⁸ Yeke wathumela izuba bonyana liyokuhlola nakube amanzi sele abohlile phezu kwehlabathi.

⁹ Kodwana izuba akhange lifunyane indawo yokuhlala ngombana amanzi gade asagubuzese yoke ihlabathi. Ngalokho labuyela kuNowa emkhunjini. Yena welula isandla sakhe walibamba walibuyisela kuye ngemkhunjini.

¹⁰ Walinda amalanga alikhomba, walikhupha izubelo ngemkhunjini, walithuma godu.

¹¹ Kuthe lokha nalibuyako izuba ntambama, qala, emlonyenalo bekunekari elilihlaza lomuthi we-oliva. Nje-ke uNowa walemuka bonyana amanzi sele abohlile ephasini.

¹² Walinda amanye amalanga alikhomba, wathuma izubelo godu. Kodwana kilelihlandla izuba lakhamba umlibe.

¹³ Kwathi ngomnyaka wamakhulu asithandathu nanye kaNowa, ngelanga lokuthoma enyangeni yokuthoma kwabe amanzi arhobhile ephasini. Yeke uNowa wavula umnyango womkhumbi, wabona bonyana ngambala seyomile ihlabathi.

¹⁴ Elangeni lamatjhumi amabili nalikhomba enyangeni yesibili iphasi besele lome kere.

¹⁵ Nje-ke uZimu wakhuluma noNowa wathi:

¹⁶ “Phuma ngemkhunjini wena nomkakho, amadodanakho kanye nabomalukazana bakho.

¹⁷ Zoke iimphili ezinawe, okutjho iinyoni, iinlwana neembandana zoke ezikhakhaba ehlabathini aziphume kanye nawe ukuze zizale iphasi lokhe zizalane zande ngesibalo phezu kwalo.”

¹⁸ Yeke uNowa waphuma yena nomkakhe, amadodanakhe kanye nabomalukazana bakhe.

¹⁹ Baphuma ngemkhunjini nazo zoke iinlwana neembandana ezikhakhaba ehlabathini kanye neenyoni zoke, koke okukhambakhamba ephasini ngemihlobo yakhona.

²⁰ Nje-ke uNowa wakhela uSomnini i-aldari, wathatha kizo zoke iinlwana neenyoni ezihlambulukileko, wanikela umhlabelo wokutjhiswa kilo.

²¹ USomnini wezwa umnuko omnandi wathi ehliziywenakhe: “Angisoze nganikelela ihlabathi ngenca yomuntu, nanyana imizindlo yomuntu imimbi kwasebuntwaneni bakhe. Angisoze godu ngabhubhisa iinlwana njengombana ngenzile.

²² “Qobe iphasi lisekhona, ukutjala nokuvuna, amakhaza nokutjhisa, ihlobo nobusika, imini nobusuku akusoze kwaphela.”