UGENESISI 7 - IsiNdebele 2012 Translation

¹ USomnini wabuya wathi kuNowa: “Ngena ngemkhunjini wena nomzakho woke ngombana ngikufunyene ungolungileko esizukulwanenesi.

² Kiwo woke umhlobo weenlwana ezihlambulukileko, thatha ngazimbili zibe likhomba, eduna nesikazayo, kodwana kwezingakahlambuluki uthathe ngazimbili kube ngesiduna nesisikazi.

³ Godu nemihlobeni yazo zoke iinyoni, thatha zibe likhomba eziduna nalikhomba ezisikazi ukuqinisekisa bonyana zihlala zikhona ephasini mazombe.

⁴ Iye, emalangeni alikhomba kusukela nje, ngizokuthumela izulu ephasini elizakuna amalanga amatjhumi amane, imini nobusuku. Ngizokuthanyela ebusweni bephasi koke okuphilako engikubumbileko.”

⁵ UNowa wenza koke uSomnini amyala ngakho.

⁶ UNowa gade aneminyaka emakhulu asithandathu lokha umthwalela nawufika ephasini.

⁷ Yena nomkakhe, amadodanakhe kanye nabomalokazana bakhe bangena ngemkhunjini kobana basinde emanzini womthwalela.

⁸ Ngakubili kweenlwana neembandana ezihlambulukileko nezingakahlambuluki, iinyoni kanye neembandana ezikhakhaba ehlabathini,

⁹ okuduna nokusikazi, kwangena noNowa ngemkhunjini kanjengombana uZimu gade ayale uNowa.

¹⁰ Kwathi emva kwamalanga alikhomba amanzi womthwalela afika ephasini.

¹¹ Kuthe ngomnyaka wamakhulu asithandathu wokuphila kwakaNowa, inyanga yesibili nayinamalanga alitjhumi nalikhomba, kwathumbuka mhlokho yoke imithombo yamanzi amanengi ngaphasi neentunja zemazulwini zatloroza amanzi.

¹² Kwawuluka ephasini izulu elathatha amatjhumi amane wamalanga nobusuku bakhona.

¹³ Kwaba kumhlokho-ke mhlana uNowa namadodanakhe, uTjhemu, uRhamu noJafethi, umkakhe nabomalukazana bakhe abathathu bangena ngemkhunjini.

¹⁴ Gade bangene neenyamazana zommango ngemihlobazo, yoke ifuyo ngemihlobayo, zoke iimbandana ezikhakhaba ehlabathini ngemihlobazo, neenyoni zomkayi ngemihlobazo kanye nazo zoke izinto ezinamaphiko.

¹⁵ Koke okudaliweko okunokuphila, kweza ngakubili kuNowa kwangena ngemkhunjini.

¹⁶ Zoke iimphili ebezingena ngemkhunjini bekungesiduna nesisikazi, kanjengombana uZimu agade ayale uNowa. USomnini wavalela uNowa ngaphakathi.

¹⁷ Umthwalela wembatha iphasi amalanga amatjhumi amane. Amanzi aya ngokwanda aphakamisa umkhumbi ehlabathini wazakama.

¹⁸ Aphakama, anda khulu ephasini, umkhumbi wathaya phezu kwawo.

¹⁹ Amanzi akhula khulu ephasini bekwathi zoke iintaba eziphakamileko ngaphasi kwezulu zavaleleka.

²⁰ Aya ngokwanda njalo aba ngehla kweentaba eziphakeme khulu pheze ngamamitha alikhomba.

²¹ Yoke into ephilako ekhambakhamba ephasini yabhubha: iinyoni, ifuyo, iinyamazana, zoke iimphili ezikhakhaba ephasini kanye nabantu boke.

²² Zafa zoke iimphili ebeziphila ehlabathini eyomileko.

²³ UZimu wathanyela yoke into egade iphila ebusweni bephasi: Ukusukela ebantwini ukuya eenlwaneni, koke okukhakhabako ngitjho neenyoni kwathanyeleka ephasini. Kwasala kwaphela uNowa nalabo agade anabo ngemkhunjini.

²⁴ Amanzi agubuzesa iphasi amalanga alikhulu namatjhumi amahlanu.