UGENESISI 6 - IsiNdebele 2012 Translation

Ukwanda kobukhohlakali

¹ Lokha abantu nasele banda ephasini namadodakazi andile,

² amadodana kaZimu abona bonyana amadodakazi wabantu mahle, azithathela abafazi abathandekako kiwo.

³ Yeke uSomnini wathi: “Ummoya engawuphefumulela emuntwini awusoze wahlala ebantwinaba isiphelani ngombana umuntu uyinyama nje. Yeke ipilo yomuntu ayisoze yadlula eminyakeni elikhulu namatjhumi amabili.”

⁴ Ngeenkhathezo nangemuva kwalokho bekukhona iintsitsirimba ephasini ngombana amadodana kaZimu alalana namadodakazi wabantu abelethelwa abantwana. Labo-ke bekuziingorho zeenkhathi zakade, okubabantu abanedumo.

⁵ Lokha uSomnini nakabona bonyana ubukhohlakali bomuntu bukhulu ephasini nokobana imizindlo yehliziywakhe isophe okumbi ngesikhathi soke,

⁶ wazisola bewanyama bona umenzeleni umuntu ephasini.

⁷ Yeke uSomnini wathi: “Umuntu engimenzileko ngizomthanyela ebusweni bephasi. Ngizokuthanyela kusukela emuntwini ukuya eenlwaneni, iimphili zoke ezikhakhaba ehlabathini kanye neenyoni zomkayi ngombana ngiyazisola bona ngikudalile koke lokhu.”

⁸ Kodwana uNowa wafunyana umusa emehlweni kaSomnini.

Umthwalela

⁹ Naku-ke umlando kaNowa: UNowa gade ayindoda elungileko, angasoleki ebantwini besikhathi aphila kiso begodu gade atjhidelene noZimu.

¹⁰ UNowa gade anamadodana amathathu, uTjhemu, uRhamu noJafethi.

¹¹ Iphasi belonakele phambi kwakaZimu begodu ligcwele umguruguru.

¹² Lokha uZimu nakahlola iphasi, ngambala lalonakele. Iye, boke abantu ebusweni bephasi bebaziphethe ngameswe.

¹³ Nje-ke uZimu wathi kuNowa: “Sengiqunte bona ngibaphelise bokanyana nje ngombana iphasi ligcwele umguruguru ngenca yabo. Yelela-ke, ngiqinisile ngizobaphelisa kanye nephasi.

¹⁴ Yeke yewuzenzele umkhumbi ngesigodo segofere, uwenze ube namalawana bese uwusinda ngesikontiri ngaphakathi nangaphandle.

¹⁵ Nasi indlela ozowakha ngayo: Umkhumbi kufuze ube mamitha alikhulu namatjhumi amathathu nahlanu ubude, amamitha amatjhumi amabili nambili nesiquntu ububanzi namamitha alitjhumi nantathu nesiquntu ukuphakama.

¹⁶ Wenzele isivalo ngaphezulu sibe siquntu semitha ukusuka emqoqweni. Umnyangwawo ube ngeqadi bese kuba nemigangadelo emithathu, ongenzasi, ophakathi nongehla.

¹⁷ Mina ngizakunisa umthwalela ephasini bona ngiphelise yoke ipilo engaphasi kwezulu, okuziimbunjwa zoke ezinomphefumulo phezu kwephasi. Koke okusephasini kuzakubhujiswa.

¹⁸ Kodwana ngenza nawe isivumelwano: Wena nomkakho, amadodanakho kanye nabomalukazana bakho kuzakufanela bona ningene emkhunjini.

¹⁹ Kufuze ungenise ngemkhunjini ngakubili kwazo zoke iindalwa eziphilako, kube ngokuduna nokusikazi bonyana kuphile kanye nawe kuphephile.

²⁰ Iinyoni ngemihlobazo, iinlwana ngemihlobazo kanye neembandana ezikhakhaba phasi ngemihlobazo, koke lokhu akube ngakubili ukwenzela bonyana kusinde kanye nawe.

²¹ Yeke wena thatha loke ihlobo lokudla ungene nalo bona kube kukudla kwenu nekwazo.”

²² UNowa wenza koke uZimu agade amyale ngakho. Iye, wakwenza koke.