UGENESISI 50 - IsiNdebele 2012 Translation

¹ UJosefa waziphosa phezu kwakayise, wamlilela, wamncwanga emhlathini.

² Walayela amagedla amsebenzelako bonyana omise isidumbu sakayise ngeenhlahla. Yeke amagedla asomisa ngeenhlahla.

³ Kwawathatha amalanga amatjhumi amane ngombana leso bekusikhathi esibekelwe ukomisa isidumbu ngeenhlahla. AmaGibhide alilela uJakopo amalanga amatjhumi alikhomba.

⁴ Kuthe nasele kudlule amalanga wokulila uJosefa wathi ebaphathini besigodlo sakaFaro: “Nange ngifumene umusa emehlwenenu ngikhulumelani noFaro nimtjele bonyana

⁵ ubaba wangifungisa wathi, ‘Sele ngizokuhlongakala, ungibulunge ethuneni engazilungisela lona enarheni yeKanana.’ Nje-ke bengithi ngivumela ngikhambe ngiyokubulunga ubaba ngizakubuya.”

⁶ UFaro wathi: “Khuphuka uyokubulunga uyihlo njengombana akufungisa njalo.”

⁷ Yeke uJosefa wakhuphuka wayokubulunga uyise. Zoke iinkhulu zakaFaro zamphekelela: kwakuziintatanyiswa zesigodlo sakhe nazo zoke iintatanyiswa zeGibhide,

⁸ zazikhambisana nawo woke amalunga wekumba kaJosefa nabafowabo nebekumba kayise. Bantwababo nefuywabo kwaphela okwasala eGotjheni.

⁹ Abakhweli beenkarana bakhuphuka naye, kwaba siqubuthu esikhulu.

¹⁰ Lokha nabafika eGoreni-Hayathadi ngaphetjheya kweJordani bahlaba umkhosi omkhulu wesililo. Lapho uJosefa wadlulisa amalanga alikhomba wokuzilela uyise.

¹¹ Lokha amaKanana ahlala lapho nakabona isililo eGoreni-Hayathadi athi: “Lo, mkhosi omkhulu wesililo samaGibhide.” Kungebangelo indawo engaphetjheya kweJordani leyo yabizwa bonyana yi-Abela-Mitsirayimu.

¹² Ngaleyondlela amadodana kaJakopo aphetha ilizwi lakhe:

¹³ Amthwala, amngenisa enarheni yeKanana. Ambulunga ngerholweni lesimu yeMakaphela engepumalanga yeMamre. Lelo bekulirholo elisesimini eyathengwa ngu-Abrahamu ku-Efroni umRhithi bonyana kube yindawo yamathuna wasafuthi.

¹⁴ Ngemva kokubulungwa kwakayise, uJosefa wabuyela eGibhide kanye nabafowabo nabo boke ebegade bamphekelele.

Abafowabo kaJosefa bavuma umlandu

¹⁵ Kuthe bona abafowabo babone bonyana uyisabo uhlongakele bathi: “UJosefa usasibambele ivunda. Ngalokho uzozibuyiselela ngakho koke okumbi esamenza khona!”

¹⁶ Yeke bazisa uJosefa bathi: “Uyihlo watjhiya umyalezo naku nazakuhlongakala,

¹⁷ ‘Nakhu enizakutjho kuJosefa: Ngibawa bona ulibalele abafowenu imitjhapho nezono abakwenza zona ngokukuphatha makghwakghwa.’ Nje-ke sibawa uqolele imitjhapho yeenceku zakaZimu kayihlo.” UJosefa walila nakezwa amezwi lawo.

¹⁸ Abafowabo beza ngokwabo bazilahlela phambi kwakhe bathi: “Simakhobokakho.”

¹⁹ Kodwana uJosefa wathi: “Ningesabi. Angeze ngazibeka esikhundleni sakaZimu.

²⁰ Nina nanihlele ukungilimaza kodwana uZimu wakujika lokho kwaba ngokuhle ukuze asindise amaphilo wabanengi njengombana kunjalo namhlanje.

²¹ Yeke musani ukwesaba. Ngizanondla kanye nabantwabenu.” Wabaduduza, wakhuluma kuhle nabo.

Ukuhlongakala kwakaJosefa

²² UJosefa wahlala eGibhide kanye nomndeni kayise. Waphila iminyaka elikhulu netjhumi.

²³ Wabona abantwana bomntwana ka-Efrayimu. Wathatha abantwana bakaMakiri umsa kaManase njengebakhe.

²⁴ UJosefa wathi kubafowabo: “Sele ngizakuhlongakala. Kodwana yazini uZimu uzanikhumbula anikhuphe enarheni le niye enarheni ayithembisa ngesifungo ku-Abrahamu, u-Isaka noJakopo.”

²⁵ UJosefa wafungisa amadodana ka-Israyeli wathi: “Khambani namathambami nanisuka lapha lokha uZimu nakanikhumbulako.”

²⁶ UJosefa wahlongakala aneminyaka elikhulu netjhumi. Isidumbu sakhe somiswa ngeenhlahla safakwa ngekasini eGibhide.