UGENESISI 5 - IsiNdebele 2012 Translation

Iinzukulwana ezinye zaka-Adamu

¹ Nanti irhelo leenzukulwana zaka-Adamu: Lokha uZimu nakadala umuntu amenza ngomfanekiso kaZimu,

² wabenza kwaba ngowembaji nowengubo, wababusisa. Mhlana abenzako wababiza bona babantu.

³ Kuthe lokha umuntu ongu-Adamu nasele aphile iminyaka elikhulu namatjhumi amathathu, wabeletha indodana emfanekiswakhe nefuze yena, wayithiya ibizo bona nguSethi.

⁴ Emva kokobana kubelethwe uSethi, u-Adamu waphila iminyaka emakhulu abunane. Wabeletha amadodana amanye kanye namadodakazi.

⁵ Yoke iminyaka u-Adamu ayiphilako imakhulu alithoba namatjhumi amathathu, emva kwalapho wahlongakala.

⁶ Kuthe lokha uSethi nasele aphile iminyaka elikhulu namihlanu, wabeletha u-Enotjhi.

⁷ Emva kokobana kubelethwe u-Enotjhi, uSethi waphila iminyaka emakhulu abunane nalikhomba. Wabeletha amadodana amanye namadodakazi.

⁸ Yoke iminyaka uSethi ayiphilako imakhulu alithoba netjhumi nambili, emva kwalapho wahlongakala.

⁹ Kuthe lokha u-Enotjhi nasele aphile iminyaka ematjhumi alithoba, wabeletha uKhenani.

¹⁰ Emva kokobana kubelethwe uKhenani, u-Enotjhi waphila iminyaka emakhulu abunane netjhumi namihlanu. Wabeletha amadodana amanye namadodakazi.

¹¹ Yoke iminyaka u-Enotjhi ayiphilako imakhulu alithoba namihlanu, emva kwalapho wahlongakala.

¹² Kuthe lokha uKhenani nasele aphile iminyaka ematjhumi alikhomba, wabeletha uMahalalela.

¹³ Emva kokobana kubelethwe uMahalalela, uKhenani waphila iminyaka emakhulu abunane namatjhumi amane. Wabeletha amadodana amanye namadodakazi.

¹⁴ Yoke iminyaka uKhenani ayiphilako imakhulu alithoba netjhumi, emva kwalapho wahlongakala.

¹⁵ Kuthe lokha uMahalalela nasele aphile iminyaka ematjhumi amathandathu nahlanu, wabeletha uJeredi.

¹⁶ Emva kokobana kubelethwe uJeredi, uMahalalela waphila iminyaka emakhulu abunane namatjhumi amathathu. Wabeletha amadodana amanye namadodakazi.

¹⁷ Yoke iminyaka uMahalalela ayiphilako imakhulu abunane namatjhumi alithoba namihlanu, emva kwalapho wahlongakala.

¹⁸ Kuthe lokha uJeredi nasele aphile iminyaka elikhulu namatjhumi asithandathu nambili, wabeletha u-Inogo.

¹⁹ Emva kokobana kubelethwe u-Inogo, uJeredi waphila iminyaka emakhulu abunane. Wabeletha amadodana amanye namadodakazi.

²⁰ Yoke iminyaka uJeredi ayiphilako imakhululu alithoba namatjhumi asithandathu nambili, emva kwalapho wahlongakala.

²¹ Kuthe lokha u-Inogo nasele aphile iminyaka ematjhumi amathandathu nahlanu, wabeletha uMetutjhelarhi.

²² Emva kokobana kubelethwe uMetutjhelarhi, u-Inogo waphila iminyaka emakhulu amathathu atjhidelene noZimu. Wabeletha amadodana amanye namadodakazi.

²³ Yoke iminyaka u-Inogo ayiphilako imakhulu amathathu namatjhumi asithandathu nahlanu.

²⁴ U-Inogo gade atjhidelene noZimu; akhange abe asabonwa ngombana uZimu wamhlwitha ebantwini.

²⁵ Kuthe lokha uMetutjhelarhi nasele aphile iminyaka elikhulu namatjhumi abunane nalikhomba, wabeletha uLemeki.

²⁶ Emva kokobana kubelethwe uLemeki, uMetutjhelarhi waphila iminyaka emakhulu alikhomba namatjhumi abunane nambili. Wabeletha amadodana amanye namadodakazi.

²⁷ Yoke iminyaka uMetutjhelarhi ayiphilako imakhulu alithoba namatjhumi asithandathu nethoba, emva kwalapho wahlongakala.

²⁸ Kuthe lokha uLemeki nasele aphile iminyaka elikhulu namatjhumi abunane nambili, wabeletha indodana.

²⁹ Wayithiya bona nguNowa, bewathi: “Yena uzasiduduza ekusebenzeni nzima nebuhlungwini bamatjhatjhazi wezandla zethu ngebanga lehlabathi eyanikelelwa nguZimu.”

³⁰ Emva kokobana kubelethwe uNowa, uLemeki waphila iminyaka emakhulu amahlanu namatjhumi alithoba namihlanu. Wabeletha amadodana amanye namadodakazi.

³¹ Yoke iminyaka uLemeki ayiphilako imakhulu alikhomba namatjhumi alikhomba nalikhomba, emva kwalapho wahlongakala.

³² Kuthe lokha uNowa nasele aphile iminyaka emakhulu amahlanu, wabeletha uTjhemu, uRhamu noJafethi.