UGENESISI 48 - IsiNdebele 2012 Translation

UJakopo ubusisa amadodana kaJosefa

¹ Isikhatjhana ngemva kwalokho uJosefa wabikelwa bonyana uyise uyagula. Wakhamba namadodanakhe uManase no-Efrayimu bayokubona uyise.

² Lokha uJakopo nakatjelwa bonyana indodanakhe uJosefa ize ukuzombona, waziqinisa, wavuka wahlala embhedeni.

³ UJakopo wathi kuJosefa: “UZimu oSabekako waziveza kimi eLuzi enarheni yeKanana, wangibusisa

⁴ wathi kimi, ‘Ngizokwenza ubelethe ngikwandise kuvele iinkoro ngeenkoro kuwe. Ngizokupha iinzukulwana zakho emva kwakho inarha le kube lilifa lazo lanini nanini.’

⁵ Nje-ke amadodanakho owabelethele eGibhidapha ngaphambi kobana ngize kuwe azakuthathwa bonyana ngewami. U-Efrayimu noManase bazakuba madodanami njengombana uRubeni noSimiyoni bangebami.

⁶ Abanye-ke abantwana ababelethwe ngemva kwabo ngibo abazakuba ngebakho kodwana bazakudla ilifa kanye nabantwana baka-Efrayimu noManase.

⁷ Bengithanda bonyana kube njalo ngombana unyoko uRarheli ngambulunga eKanana. Ngehlelwa lisizi lokha nakangitjhiya ngisendleleni kudanyana ne-Efrata. Ngambeka khonapho eqadi kwendlela eya e-Efrata.” (I-Efrata namhlanje kuthiwa yiBhethe-Lehema.)

⁸ Yeke u-Israyeli wabuza uJosefa wathi: “Bobani-ke okhamba nababa?” Watjho lokho ngombana waphosa amehlwakhe emadodaneni kaJosefa.

⁹ UJosefa wathi kuyise: “Madodanami uZimu angiphe wona enarheni le.” U-Israyeli wathi: “Balethapha ngibabusise.”

¹⁰ U-Israyeli bekangasaboni ngombana amehlwakhe gade sele afiphele ngebanga lokuluphala. UJosefa wabandameza amadodanakhe kuyise, yena wawancwanga emhlathini wawagona.

¹¹ U-Israyeli wathi kuJosefa: “Besele ngahloboka bonyana ngingabuye ngikubone godu. Nokho uZimu ungivumele bonyana ngibone nabantwabakho.”

¹² UJosefa wasusa amadodanakhe egade ajame emadolweni kayise, wahloma ihloko phasi phambi kwakhe.

¹³ Wawathatha womabili, u-Efrayimu waba ngesidleni sakhe bonyana abe ngesinceleni saka-Israyeli, kwathi uManase waba ngesinceleni sakhe bonyana abe ngesidleni saka-Israyeli. Wawatjhideza ku-Israyeli ngaleyondlela.

¹⁴ Kodwana u-Israyeli welula isandla sakhe sokudla wasibeka ehloko ka-Efrayimu phezu kobana gade angomncani, waphambanisa izandla zakhe wabeka sekhohlo ehloko kaManase phezu kobana uManase bekalizibulo.

^15-16 Wabusisa uJosefa wathi: “Abobaba u-Abrahamu no-Isaka gade batjhidelene noZimu. UZimu waba ngumelusami ipilwami yoke bekube gadesi nengilozakhe yangisindisa kizo zoke iingozi. Inga uZimethu angabusisa abasanaba ukuze ngabo kungakhohlwakali ibizo lami namabizo wabobaba u-Abrahamu no-Isaka, godu bande khulu ephasinapha.”

¹⁷ Lokha uJosefa nakabona uyise abeka isandla sakhe sokudla ehloko ka-Efrayimu wadana. Wabamba isandla sakayise ukuze asisuse ehloko ka-Efrayimu asise kweyakaManase.

¹⁸ Wathi kuyise: “Awa baba, olizibulo ngilo; ubaba akabeke isandla sakhe sokudla ehlokwakhe.”

¹⁹ Kodwana uyise wala wathi: “Ngiyazi ndodanami, ngikwazi kuhle lokho. Naye uzakuba sisizwe. Nokho umfowabo omncani uzakuba ngaphezu kwakhe, neenzukulwana zakhe zizakuba zizizwe ezinengi.”

²⁰ Wababusisa mhlokho wathi: “Ngani u-Israyeli uzakutjho amezwi lawa nakabusisako athi, ‘Inga uZimu angakwenza ube njengo-Efrayimu noManase.’ ” Ngaleyondlela wabeka u-Efrayimu ngaphambi kwakaManase.

²¹ U-Israyeli wathi kuJosefa: “Sengiyahlongakala, kodwana uZimu uzakuba nani anibuyisele enarheni yaboyihlomkhulu.

²² Wena-ke Josefa, mina ngikunikela okukhethekileko nokungehla kokwabafowenu okulihlangothi elilodwa lentaba engayithatha kuma-Amori ngesabula nangomsebe wami.”