UGENESISI 47 - IsiNdebele 2012 Translation

¹ UJosefa wakhamba wabikela uFaro wathi: “Ubaba nabafowethu basukile eKanana sele baseGotjheni kanye nemihlambi yezimvu, yeembuzi, neenkomo nayo yoke ifuyo abanayo.”

² Phakathi kwabafowabo boke wathatha abahlanu wabethula kuFaro.

³ UFaro wabuza abafowabo wathi: “Nazi msebenzi bani?” Baphendula bathi: “Iinceku zakho zibelusi, zifuze aboyise.”

⁴ Godu bathi kuye: “Size bonyana sizokhonza enarhenapha ngombana indlala iyaphodlha eKanana le, kanti nemihlambi yeenceku zakho beyingasenamadlelo. Nje-ke sithe asibawe bonyana uvumele iinceku zakho zihlale eGotjhenapha.”

⁵ UFaro wathi kuJosefa: “Njengombana uyihlo nabafowenu beze kuwe nje,

⁶ qeda wena bonyana ungababeka kuphi. Bahlalise endaweni eyazisako yeGibhidapha. Ungase ubahlalise eGotjheni. Nange kukhona phakathi kwabo abanekghono elikhethekileko, babeke babe baphathi babelusi befuywami.”

⁷ UJosefa waletha uyise uJakopo wamethula kuFaro. UJakopo walotjhisa uFaro bewambusisa.

⁸ UFaro wambuza wathi: “Uneminyaka emingaki?”

⁹ UJakopo wathi kuFaro: “Ngineminyaka elikhulu namatjhumi amathathu woke ngisikhonzi ephasinapha. Iminyaka yokuphila kwami mincani begodu ibudisi, ayilingani neminyaka yabobaba.”

¹⁰ UJakopo wabusisa uFaro wamlayelisa, wakhamba.

¹¹ Yeke uJosefa wahlalisa uyise nabafowabo eGibhide, wabapha indawo okungeyabo. Bekuyindawo eyazisako, isesifundeni seRamasese njengokutjho kwakaFaro.

¹² UJosefa wondla uyise nabafowabo kanye nawo woke umndeni kayise ukuya ngokwesidingo sawo.

Ukuphatha kwakaJosefa ngesikhathi sendlala

¹³ Soke isifunda besinganakudla ngombana indlala beyibhokile. Abantu beGibhide nebeKanana bebaphodlhekile ngebanga lendlala.

¹⁴ UJosefa wabuthelela loke isiliva elafumaneka eGibhide neKanana ngokuthengisa ikoroyi, waliletha esigodlweni sakaFaro.

¹⁵ Kuthe bona abantu beGibhide nebeKanana baphelelwe lisiliva, yoke iGibhide yeza kuJosefa yathi: “Sipha ukudla. Kubayini usiliselele sibulawe yindlala usiqalile? Qala sesidududu asisenasiliva.”

¹⁶ UJosefa wathi: “Nakube anisenasiliva, lethani ifuywenu. Ngizanipha ukudla ngokuninanela ngayo.”

¹⁷ Yeke baletha ifuywabo kuJosefa, wabapha ukudla ngeenjomani, imihlambi yezimvu, yeembuzi, neyeenkomo kanye nabodumbana babo. Umnyaka lowo wabatjheja ngokudla, bona bathenga ngefuywabo yoke.

¹⁸ Kuthe nakuphela umnyaka lowo babe bangasenalitho. Ngomnyaka olandelako beza kuJosefa bathi: “Amala akasizi, asisenalitho. Ifuywethu seyaba ngeyakho, sitlhoga nesiliva. Asinanto esingayinikela ikosethu ngaphandle kwemizimbethu namasimethu.

¹⁹ Kubayini usiliselele sibulawe yindlala usiqalile, thina namasimethu? Thenga thina namasimethu ngokudla ukuze sibe ngebakaFaro. Godu usiphe imbewu ukuze siphile singafi, namasimu angabi mrhula.”

²⁰ Yeke uJosefa wathengela uFaro woke amasimu weGibhide. AmaGibhide woke athengisa amasimawo ngombana indlala beyibhoke khulu. Inarha yaba ngeyakaFaro.

²¹ Kiyo yoke imikhawulo yeGibhide uJosefa wafudusa abantu bonyana baye emadorbheni.

²² Kwaba masimu wabaphristi kwaphela angazange awathenge ngombana bona bebafunyana isondlo kuFaro. Isondlweso besibanele, kungebangelo bangazange bathengise amasimabo.

²³ UJosefa wathi ebantwini: “Njengombana nginithenge bona nibe ngebakaFaro nina namasimenu nje, nasi-ke imbewu, tjalani amasimu la.

²⁴ Kodwana lokha nanivunako, yenzani isivuno senu sibe ziingcenye ezihlanu. Thathani ingcenye eyodwa niyinikele uFaro. Okuseleko nikugcine kube yimbewu enizayitjala, nokudla kwenu nemindenenu nabantwabenu.”

²⁵ Bathi kuye: “Ikosethu isindise ipilwethu yeke nayifuna bonyana sisebenzele uFaro, sizakwenza njalo.”

²⁶ UJosefa wakwenza kwaba mthetho wenarha yeGibhide osalandelwako nagadesi ukobana isivuno esiyingcenye eyodwa kezihlanu isisabelo sakaFaro. Masimu wabaphristi kwaphela angazange abe ngewakaFaro.

UJosefa uthembisa ukubulunga uJakopo eKanana

²⁷ Ama-Israyeli gade sele ahlala eGibhide esifundeni seGotjheni. Azuza ipahla lapho, abeletha, anda khulu ngesibalo.

²⁸ UJakopo wahlala eGibhide iminyaka elitjhumi namikhomba, yena waphila iminyaka elikhulu namatjhumi amane namikhomba.

²⁹ Kuthe nakufika isikhathi sokobana ahlongakale, wabiza indodanakhe uJosefa wathi kiyo: “Nange ngifumana umusa kuwe, faka isandla sakho ngaphasi kwenyongami bese uyangithembisa ngeqiniso nangokwethembeka bonyana awuzungibulungela eGibhidapha,

³⁰ kodwana nangihlongakalako, ngisusa lapha, ungithwale uyongibeka kibobamkhulu.” UJosefa wathi: “Ngizakwenza njengombana ubaba asitjho.”

³¹ UJakopo wathi: “Funga phambi kwami.” Yeke uJosefa wafunga-ke. U-Israyeli wakhothama wathandaza eenhloko zombhedakhe.