UGENESISI 46 - IsiNdebele 2012 Translation

UJakopo ufudukela eGibhide nomndenakhe

¹ Yeke u-Israyeli wasuka wakhamba nakho koke kwakhe. Kwathi lokha nakafika eBheritjheba wenza imihlabelo kuZimu kayise u-Isaka.

² UZimu wakhuluma no-Israyeli ebusuku ngombono wathi: “Jakopo! Jakopo!” Yena wathi: “Ungubani?”

³ UZimu wathi: “NginguZimu, uZimu kayihlo. Ungasabi ukwehlela eGibhide ngombana ngizokwenza ube sisizwe esikhulu lapho.

⁴ Mina ngokwami ngizakwehlela nawe eGibhide bese ngiyakubuyisa godu. NguJosefa ngesandla sakhe ozakuvala amehlo nawuhlongakalako.”

⁵ Nje-ke uJakopo watjhiya iBheritjheba. Amadodanakhe amkhweza yena nabantwabawo nabafazi eenkoloyaneni uFaro azithumela bonyana athuthwe ngazo.

⁶ Godu athatha imihlambawo nefuywawo egade ayibuthelele enarheni yeKanana, aya eGibhide. Ngaleyondlela uJakopo neenzukulwana zakhe

⁷ waya eGibhide: yena, amadodanakhe, amadodakazakhe, abantwana babantwabakhe okutjho zoke iinzukulwana zakhe.

⁸ Naka amabizo wama-Israyeli akhamba noJakopo eGibhide kanye neezukulwana abelethelwa zona: URubeni izibulo lakaJakopo.

⁹ Amadodana kaRubeni: ngu-Inogo, uPalu, uRhetsironi noKarimi.

¹⁰ Amadodana kaSimiyoni: nguJemuweli, uJamini, u-Ohadi, uJakini, uTsorhari noSawula indodana yomfazi weKanana.

¹¹ Amadodana kaLevi: nguGeritjhoni, uKhehathi noMerari.

¹² Amadodana kaJuda: ngu-Eri, u-Onani, uTjhela, uPeretsi noZerarhi. (U-Eri no-Onani gade sebahlongakele lokha nakusukwa eKanana.) Amadodana kaPeretsi: nguRetsironi noRhamulu.

¹³ Amadodana ka-Isakari: nguTola, uPuwa, uJobho noTjhimroni.

¹⁴ Amadodana kaZebuloni: nguSeredi, u-Eloni noJarhiliyeli.

¹⁵ (Lawo bekumadodana uLeya awabelethela uJakopo ePadana-Aramu, ngaphandle kwendodakazakhe uDina. Zoke iinzukulwana zakhe ezimadodana namadodakazi bezimatjhumi amathathu nazintathu.)

¹⁶ Amadodana kaGadi: nguTsifiyoni, uRhagi, uTjhuni, u-Etsiboni, u-Eri, u-Arodi no-Areli.

¹⁷ Amadodana ka-Atjheri: nguJimina, uJitjhiva, uJitjhivi noBheriya. (Udadwabo gade kunguSerarhi.) Amadodana kaBheriya nguRhebere noMalikiyeli.

¹⁸ (Lezo bekuziinzukulwana zakaZilipha ezabelethelwa uJakopo. UZilipha bekuyincekukazi uLabani ayipha indodakazakhe uLeya. Zoke iinzukulwana zakhe bezilitjhumi nathandathu.)

¹⁹ Amadodana womkaJakopo uRarheli: nguJosefa noBhenjamini.

²⁰ (EGibhide kwabelethwa uManase no-Efrayimu. Bona bebabantwana bakaJosefa ababelethelwa ngu-Asenathi indodakazi kaPothi-Fera umphristi we-Oni.)

²¹ Iinzukulwana zakaBhenjamini: nguBhela, uBhekere, u-Atjhibeli, uGera, uNamani, u-Erhi, uRotjha, amaMupi, amaRhupi no-Aradi.

²² (Lezo bekuziinzukulwana zakaRarheli ezabelethelwa uJakopo. Zoke iinzukulwanezo bezilitjhumi nane.)

²³ Iinzukulwana zakaDani: maRhutjhi.

²⁴ Amadodana kaNafitali nguJarhitsiyeli, uGuni, uJetseri noTjhilemu.

²⁵ (Lezo bekuziinzukulwana zakaBhilirha ezabelethelwa uJakopo. UBhilirha bekuyincekukazi uLabani ayipha indodakazakhe uRarheli.)

²⁶ Boke abaya eGibhide noJakopo ebegade baziinzukulwana zakhe ngenyama, ngaphandle kwabomalukazana bakhe, bebamatjhumi asithandathu nabathandathu.

²⁷ Amadodana kaJosefa abelethelwa wona eGibhide gade amabili. Yeke woke umndeni kaJakopo owanzinza eGibhide gade umatjhumi alikhomba.

²⁸ UJakopo wathumela uJuda bona akhambe phambili ayokubuza indlela eya eGotjheni kuJosefa. Kuthe bona bafike esifundeni seGotjheneso,

²⁹ uJosefa wabophela ikaranakhe waya khona ukuyokuhlangabeza uyise u-Israyeli. UJosefa wathi nakabona uyise, waziphosa phezu kwakhe wamgona, walila isikhathi eside.

³⁰ U-Israyeli wathi kuJosefa: “Ngombana nakhu sele ngibone ubuso bakho, ngabona bonyana uyaphila, awa njekhona sengingafa-ke.”

³¹ UJosefa wathi kibomnakwabo nemndenini kayise: “Ngizakhuphuka ngiyonibika kuFaro ngithi kuye, ‘Abomnakwethu nomndeni woke wakababa ebegade bahlala enarheni yeKanana sebafikile kimi.

³² Amadoda wakhona abelusi. Iye, madoda afuyileko. Nje-ke eze nemihlambi yezimvu, yeembuzi, neenkomo nayo yoke ifuyo anayo.’

³³ Kuzakuthi lokha uFaro nanibizako anibuze bona nazi msebenzi bani,

³⁴ nithi kuye, ‘Iinceku zakho zimadoda afuyileko, ukusukela ebusaneni bekube namhlanje. Thina-ke sifuze abobaba.’ Ngaleyondlela nizakuvunyelwa bonyana nihlale esifundeni seGotjheni ngombana amaGibhide ayabanyenya abelusi.”