UGENESISI 45 - IsiNdebele 2012 Translation

UJosefa uziveza kubafowabo

¹ UJosefa azange asakghona ukuzibamba phambi kweensebenzi zakhe, warhuwelela wathi: “Phumani noke nje ngekumbenapha!” Nje-ke gade kunganamuntu lokha uJosefa nakaziveza kubafowabo.

² Warhahlawula kangangobana amaGibhide amuzwa, kwezwakala ngitjho nesigodlweni sakaFaro.

³ UJosefa wathi kubafowabo: “NginguJosefa! Ubaba usaphila na?” Kodwana abafowabo azange bakghone ukumphendula ngombana bakhungatheka phambi kwakhe.

⁴ Yeke uJosefa wathi kibo: “Tjhidelani kimapha.” Kuthe bona benze njalo, wathi: “Ngimi umfowenu uJosefa, enamthengisa eGibhide!

⁵ Nje-ke ningatshwenyeki begodu ningazithukutheleli ngebanga lokungithengisa kwenu ngombana nguZimu owangithumela ngaphambi kwenu kobana ngisindise ipilwenu.

⁶ Sele kuminyaka emibili kunendlala enarheni, kanti-ke kusazokuthatha iminyaka emihlanu ezako kungalinywa begodu kungavunwa.

⁷ Kodwana uZimu ungithume ngaphambili kwenu kobana nginibulungele imisalela ephasini begodu ngisindise ipilwenu ngetjhaphuluko ekulu.

⁸ Ngalokho-ke akusini enangithumela lapha, kodwana nguZimu. Ungenze ngaba mluleki kaFaro, umphathi womzakhe woke nombusi weGibhide yoke.

⁹ Nje-ke rhabani niye kubaba nithi kuye, ‘Nakhu okutjhiwo nguJosefa indodanakho: UZimu ungenze ngaba mphathi weGibhide yoke. Ubaba akehle eze kimi, angariyadi.

¹⁰ Uzakuhlala esifundeni seGotjheni abe seduze nami: ubaba, abantwabakhe neenzukulwana zakhe, izimvu zakhe nemihlambakhe nakho koke anakho.

¹¹ Ubaba ngizamondla alapho ngombana kuseza iminyaka emihlanu yendlala. Nakungasinjalo ubaba nomndenakhe nabo boke abanaye bazakuswela.’ ”

¹² UJosefa waraga wathi: “Nani niyabona ngitjho noBhenjamini uyangibona bonyana ngimi okhuluma nani.

¹³ Tjelani ubaba ngakho koke ukuhlonitjhwa kwami eGibhidapha nangakho koke enikubonileko. Nirhabe nize naye kimapha!”

¹⁴ Wagona umntanabo uBhenjamini bewathoma watlhuwa walila, noBhenjamini naye wamgona, walila.

¹⁵ Wasuka lapho wancwanga boke abafowabo emhlathini alokhu alila njalo. Ngemva kwalokho abafowabo bacoca naye.

¹⁶ Kuthe iindabezi nazifika esigodlweni sakaFaro kobanyana uJosefa uthekelwe bafowabo, uFaro nazo zoke iinkhulu zakhe bajabula.

¹⁷ UFaro wathi kuJosefa: “Tjela abafowenu bona bakhweze imithwalo kibodumbana babo babuyele eKanana,

¹⁸ bafese bakhuphuke noyihlo nemindenabo beze kimapha. Ngizabasikela kelinonileko eGibhidapha bese bazinikelela ngamanoni wenarha le.

¹⁹ Wena Josefa bona ukuqeda bonyana bathathela abantwana abancani nabafazi babo iinkoloyana eGibhidapha. Bakhweze noyihlo beze naye.

²⁰ Bangatshwenyeki ngepahla yomizabo ngombana koke okuhle kweGibhide kuzakuba ngokwabo.”

²¹ Yeke amadodana ka-Israyeli enza njalo. UJosefa wawanikela iinkoloyana njengombana kutjho uFaro, godu wawapha nomphako.

²² Wanikela omunye nomunye wawo izambatho ezitja, kodwana uBhenjamini yena wamupha amakhilogremu amathathu nesiquntu wesiliva kanye nezambatho ezihlanu.

²³ Khonokho wathumela uyise abodumbana abalitjhumi abalayitjhe izinto zeGibhide eziphambili, nabodumbana abalitjhumi abasikazi abalayitjhe ikoroyi nezikwa kanye nomphako.

²⁴ Walayelisa abafowabo nabakhambako wathi kibo: “Ningesabi litho endleleni!”

²⁵ Basuka eGibhide bakhamba babuyela kuyise uJakopo enarheni yeKanana.

²⁶ Bafese bamtjela bona uJosefa usaphila. Kodwana kuthe lokha nabathi uJosefa umbusi weGibhide yoke, wakhena, azange abakholwe.

²⁷ Kwathi nabamtjela koke uJosefa akukhulume kibo, nalokha nakabona iinkoloyana uJosefa azithumele bona zizomthatha, ummoyakhe wahlambuluka.

²⁸ Nje-ke u-Israyeli wathi: “Sengiyakholwa-ke! Indodanami uJosefa isaphila! Yeke bengikhamba khona nje ngiyombona ngaphambi kobana ngife.”