UGENESISI 44 - IsiNdebele 2012 Translation

UBhenjamini ufunyanwa amlandu

¹ UJosefa wayala umphathimuzakhe wathi: “Zalisa iintjhuba zamadoda lawa ngokudla kube ngendlela angathwala ngayo. Ufake isiliva yenye nenye indoda emlonyeni wesitjhuba sayo.

² Faka ikaphami yesiliva emlonyeni wesitjhuba sobuphetjhani kanye nesiliva athenge ngayo.” Umphathimuzi wenza njengombana uJosefa atjhwile.

³ Kuthe lokha nakusako amadoda lawa atjhatjhululwa kobana abuyele ekhabo nabodumbana bawo.

⁴ Gade angakakhambi ukuyaphi ukusuka edorobheni lokha uJosefa nakathi kumphathimuzakhe: “Rhaba ulandele amadoda lawaya! Nawuwafumanako uwabuze uthi, ‘Kubayini nibuyisela okuhle ngokumbi? Niyebeleni ikaphami yesiliva?

⁵ Akusiyikapho esela ngomphathami naziphengula ngayo na? Bukhohlakali into eniyenzileko le.’ ”

⁶ Ngambala kuthe lokha umphathimuzi nawawafumanako, watjho amezwi lawo.

⁷ Wona amphendula athi: “Kubayini unomzana akhulume njalo? Iinceku zakho angeze bezayenza into efana naleyo!

⁸ Kunalokho angithi uyazi bonyana nesiliva leya esayifumana ngeentjhubeni zethu nasiseKanana siyibuyisile? Alo, besizayebelani-ke isiliva namkha igolide ngekumbeni yomphathakho?

⁹ Nakube ingatholakala kinanyana ngiyiphi yeenceku zakhwezi, ayibulawe bese kuthi thina abanye sibe makhoboka wekosethu.”

¹⁰ Umphathimuzi wathi: “Kulungile, akube njengamagamenu: Nanyana ngubani ezakutholakala kuye uzakuba likhoboka lami bese kuthi nina abanye nibe msulwa, nitjhaphuluke.”

¹¹ Omunye nomunye wawo wehlisa msinyana isitjhuba sakhe kobana asivule.

¹² Wathoma-ke umphathimuzi wabhenyegula, wathoma ngomkhulu wehlela komncani. Ikapho yafunyanwa ngesitjhubeni sakaBhenjamini.

¹³ Amadoda lawo adabula izambatho zawo. Asuka lapho akhweza imithwalwawo kibodumbana abuyela ngedorobheni.

¹⁴ UJosefa gade asese ngekumbeni lokha uJuda nabafowabo nabangenako. Bafika baziphosela phasi phambi kwakhe.

¹⁵ UJosefa wathi kibo: “Yintobani eniyenzileko le? Anazi bonyana umuntu onjengami nje kufuze aziphengule na?”

¹⁶ UJuda waphendula wathi: “Yini esingayitjho ekosinami na? Sizivikele sithini? Singazihlanza njani? UZimu wembule umlandu weenceku zekosami. Nje-ke sele simakhoboka wekosami, thina ngokwethu kanye naloyo okufunyenwe kuye ikapho.”

¹⁷ Kodwana uJosefa wathi: “Awa, nokho angeze bengiyenze into efana naleyo! Umuntu okufunyenwe kuye ikaphami nguye kwaphela ozakuba likhoboka lami. Nina abanye buyelani kuyihlo ngokuthula.”

¹⁸ Yeke uJuda watjhidela kuJosefa wathi: “Ngiyakhombela kosami! Nanyana ikosami ilingana noFaro incekwakho beyibawa ukuba nelizwi nekosayo. Nokho bengithi ikosami ingapheleli incekwayo ihliziyo.

¹⁹ Ikosami yabuza iinceku zayo yathi, ‘Nisese nobaba namkha umfowenu na?’

²⁰ Sayiphendula sathi, ‘Iye, ubaba sele amdala, godu sathi sinomfowethu obelethwe ubaba sele aluphele. Umnakwabo lomsana loyo wahlongakala, nje-ke sese kusele yena yedwa tere ngakwabo. Ngalokho uyise umthanda khulu.’

²¹ Yeke ikosami yathi eencekweni zayo, ‘Mletheni kimapha ngizombona ngamehlwami la.’

²² Thina sathi ekosinami, ‘Umsana lo akakwazi ukusukela uyise. Nange angenza njalo, uyise angaqaleka bekabulungwe.’

²³ Yeke ikosami yathi, ‘Angifuni ukubona ubuso benu lapha nakube anizi naye.’

²⁴ “Sithe lokha nasibuyela ekhaya kubaba oyinceku yekosami, samtjela koke ikosami ekutjhwileko.

²⁵ Kwathi lokha ubaba nakathi kithi, ‘Buyelani niyosithengela ukudlana godu,’

²⁶ thina sathi kuye, ‘Angeze sakghona ukwehla nakube umfowethu obuphetjhani akakhambi nathi. Asikazukukghona ukubonana nonomzana loyo nakube asikezi naye.’

²⁷ Ubaba oyinceku yekosami wathi kithi, ‘Niyazi nani bonyana umkami oyintandokazi wangibelethela abesana ababili kwaphela.

²⁸ Omunye wanyamalala, ngamhloboka ngathi wadatjulwadatjulwa iinquqwana. Mbala solo kwalokho azange bengisambona.

²⁹ Nje-ke naningithathela nalo, naye bese wehlelwa yingozi, nizabe ningibangele bona ngife ngesihluku sengimdala kangaka.’

³⁰ Njengombana ipilo kababa inamathele emsaneni kangaka, nasibuyela kubaba ngaphandle kwakhe

³¹ bese uyabona bonyana umsana lo akakho, uzokuqaleka. Ngaleyondlela iinceku zekosami zizabe zibangele bona ubaba oyinceku yekosami ahlongakale ngamatlhuwiso sele amdala.

³² Mina ncekwakho ngiqinisekise ubaba bonyana ngizakugada umsana lo ngepilwami ngathi, ‘Nakube angimbuyisi kubaba, angibe mlandu phambi kwakababa ipilwami yoke!’

³³ “Nje-ke bengibawa bona ikosami ivumele incekwayo bonyana isale lapha ibe likhoboka lekosami esikhundleni somsana lo. Ikosami ivumele umsana lo aphenduke nabomnakwabo

³⁴ ngombana mina ngingaya njani kubaba khibe umsana lo akasinami? Angifuni ukubona amatlhuwiso azakwehlela ubaba!”