UGENESISI 43 - IsiNdebele 2012 Translation

UBhenjamini uya eGibhide nabanakwabo

¹ Indlala beyisabhokile enarheni yeKanana.

² Kwathi bona bagome yoke ikoroyi abayithatha eGibhide, uyise wathi kibo: “Buyelani niyosithengela ukudlana godu.”

³ Kodwana uJuda wathi kuyise: “Umuntu loya wasidosa ngendlebe wathi akafuni nokusibona nakube asizi nomfowethu.

⁴ Nayibe sikhamba nomfowethu, khona kulungile sizakwehla siyokuthengela ubaba ukudla.

⁵ Kodwana nakube akakhambi nathi, angeze sikghone ukwehla ngombana umuntu loya wasidosa ngendlebe wathi akafuni nokusibona nakube asizi nomfowethu.”

⁶ U-Israyeli wabuza wathi: “Kubayini ningilethele amatlhuwo anje ngokutjela indoda leyo bonyana ninomfowenu omncani.”

⁷ Baphendula bathi: “Indoda leya isifake esifuthweni semibuzo ngathi nomndenethu. Yabuza bonyana ubaba usaphila na. Godu yasibuza bona sinomfowethu omunye na. Sesaphendula imibuzwayo kwaphela. Besizakwazi njani bonyana uzakuthi kithi size nomfowethu loyo kuye?”

⁸ UJuda wathi kuyise u-Israyeli: “Ngithuma nomsana lo, sizakhamba khona nje ukuze mina nobaba nabantwana bekhayaba siphile singafi.

⁹ Mina ngizamgada ngepilwami. Ubaba akambize esandleni sami. Nakube angimbuyisi ngimbeke phambi kwakababa aphila, khona-ke angibe mlandu kubaba ipilwami yoke.

¹⁰ Nangathana azange siriyade ngasele sibuya eGibhide kabili.”

¹¹ Yeke uyisabo u-Israyeli wathi kibo: “Nakube kunjalo, khona-ke yenzani lokhu: Thathani imikhiqizo ephambili yenarha le niyifake emithwalwenenu nehle nayo nifese niyiphe indoda leyo. Ninghwathe kancani imihlobohlobo yeenthako zokwenza amakha, iliju, amapistatjhiyo kanye nama-alimondi.

¹² Thathani inani elibuyelelweko lesiliva ngombana kumele nibuyisele isiliva eyafakwa emilonyeni yeentjhuba zenu. Mhlambe kwaba yiphoso.

¹³ Khambani nomfowenu-ke nibuyele emuntwini loyo khona nje.

¹⁴ Kwanga uZimu oSabekako anganenzela umusa phambi komuntu loyo ukuze abuyise umfowenu loya noBhenjamini. Akusenani, nakumele ngilahlekelwe bantwana nakhona sekulungile.”

¹⁵ Yeke amadoda athatha izipho, abuyelela inani lesiliva abe akhamba noBhenjamini, arhaba ehlela eGibhide bona aziveze kuJosefa.

¹⁶ Kwathi lokha uJosefa nakabona uBhenjamini akanye nawo, wathi kumphathimuzakhe: “Thatha amadoda la uwase kwami, uhlabe isilwana bese uyalungisa bona agome nami ukudla kwemini.”

¹⁷ Umphathimuzakhe wenza njengombana uJosefa amtjelile, wathatha amadoda wawasa kwaJosefa.

¹⁸ Kwathi lokha amadoda lawo nakabona bonyana asiwa kwaJosefa, akhuluma wodwa athi: “Silethwe lapha ngebanga lesiliva leya eyafakwa emilonyeni yeentjhuba zethu nasithoma ukuza lapha. Yeke ufuna ukusibhudungela asihlule bese usenza amakhobokakhe asithathele abodumbana bethu.”

¹⁹ Nje-ke anqomba kumphathimuzi kaJosefa akhuluma naye esangweni lesirhodlo,

²⁰ athi: “Siyakukhombela nomzana akhe usilalele. Kuliqiniso bona seza lapha sazokuthenga ukudla phambilini.

²¹ Kodwana kuthe lokha nasifika endaweni esahlwelwa kiyo, sathi nasithi sivula iintjhuba zethu, qala isiliva yomunye nomunye gade isemlonyeni wesitjhuba sakhe. Isiliva leyo beyilingana poro nesithenge ngayo. Yeke nasi siyiphethe, sithe asiyibuyise.

²² Ngaphezu kwalokho size nesiliva enye kobana sizokuthenga ukudla. Asazi bonyana ngubani owafaka isiliva leya ngeentjhubeni zethu.”

²³ Umphathimuzi wathi kiwo: “Ngiyanizwa; ningesabi! UZimenu nonguZimu waboyihlomkhulu uninikele umnono ngeentjhubeni zenu. Ngayifumana isilivenu.” Ngemva kwalokho wawalethela uSimiyoni.

²⁴ Umphathimuzi wawangenisa kwaJosefa, wawanikela amanzi wokusula iinyawo zawo bewapha nabodumbana bawo ilusereni.

²⁵ Wona alungisa isibiko sawo bona azosipha uJosefa lokha nakafikako ngemva kwemini ngombana besele ezwile bonyana ayokugomela lapho.

²⁶ Kwathi lokha uJosefa nakafika ekhaya, amadoda lawo angenisa isibiko agade eze naso, aguqa ahloma iinhloko phasi amnikela sona.

²⁷ Wawabuza amavuko wabuye wathi: “Unjani uyihlo osele aluphele enangitjela ngaye? Usaphila na?”

²⁸ Aphendula athi: “Ubaba incekwakho usaphile kuhle.” Aguqa godu ahloma iinhloko phasi.

²⁹ Wathi nakaqalako wabona umfowabo uBhenjamini, indodana kanina, wabuza wathi: “Nguye umfowenu obuphetjhani ebeningitjela ngaye lo na?” Yeke wathi kuBhenjamini: “UZimu abe nomusa kuwe ndodanami.”

³⁰ UJosefa wasikima msinyana wafuna indawana yokulila ngombana watlhuwa nakabona umfowabo. Yeke wangena ngelawini lakhe walilela khona.

³¹ Kuthe bonyana asule ubuso bakhe, waphuma, waziqinisa wathi: “Phakululani ukudlokho.”

³² Bamphakela yedwa, baphakela abanakwabo bodwa namaGibhide wodwa. AmaGibhide gade angagomi namaHebheru ngombana bekazila ukwenza njalo.

³³ Amadoda lawa gade ahlaliswe ngaphambi kwakaJosefa ngokulamana kwawo ukusuka komkhulu ukuya komncani. Arhedlulana ararekile.

³⁴ Aphiwa ukudla etafuleni lakaJosefa, uBhenjamini yena waphiwa okubuyelelwe kahlanu kunabanakwabo. Basela, badakwa phambi kwakaJosefa.