UGENESISI 42 - IsiNdebele 2012 Translation

Abanakwabo kaJosefa baya eGibhide

¹ Kuthe bona uJakopo ezwe bonyana kunekoroyi eGibhide, wathi emadodanenakhe: “Kubayini nihlalele ukuqalana ngemehlweni nje?

² Qalani, ngizwe bonyana kunekoroyi eGibhide. Yehlani niyosithengela ukuze siphile singafi.”

³ Kwaba ngabalitjhumi kwaphela abanakwabo kaJosefa abehla ukuyokuthenga ikoroyi eGibhide

⁴ ngombana uJakopo wathi uBhenjamini olama uJosefa asale, angakhambi nabanye. Gade esaba bonyana naye angahle ehlelwe yingozi.

⁵ Ngaleyondlela amadodana ka-Israyeli gade akhambisana nalabo ebebayokuthenga ikoroyi ngombana nenarheni yeKanana indlala beyiphodlha.

⁶ UJosefa gade ambusi wenarha yeGibhide, athengisela abantu ikoroyi. Nje-ke kuthe lokha abanakwabo nabafikako, baguqa bahloma iinhloko phasi phambi kwakhe.

⁷ Kuthe bonyana uJosefa abone abafowabo, wabazi kodwana wenza ngathi akabazi. Wabakhulumisa ngokubakgharameja wathi: “Nibuyaphi nina?” Baphendula bathi: “Sibuya eKanana sizokuthenga ukudla.”

⁸ Nanyana uJosefa wabazi abanakwabo, kodwana bona akhange bamazi.

⁹ Wakhumbula amabhudangwakhe ngabo. Wathi kibo: “Sukanapha, niziinhloli nina! Nizele ukuzokuhlola bonyana kukuphi lapha inarha yekhethu le ingakavikeleki khona.”

¹⁰ Bamphendula bathi: “Awa kosi, iinceku zakho zizele ukuzokuthenga ukudla.

¹¹ Nasinje siziinlamani zendoda yinye. Iinceku zakho zimadoda athembekileko, asisizo iinhloli.”

¹² UJosefa wathi kibo: “Sukelani le! Nizele ukuzokuhlola bonyana kukuphi lapha inarha yekhethu le ingakavikeleki khona.”

¹³ Kodwana baphendula bathi: “Emanyeni iinceku zakho gade zibabafo abalitjhumi nambili, amadodana wendoda yinye ehlala enarheni yeKanana. Ubuphetjhani gadesi nje busele nobaba, kanti omunye akasekho.”

¹⁴ UJosefa wathi kibo: “Ngisatjho bonyana niziinhloli nina!

¹⁵ Nasi-ke indlela enizakuhlolwa ngayo: Ngifunga uFaro ngithi anizukukhamba enarhenapha kungakalethwa umfowenu omncani.

¹⁶ Thumelani omunye phakathi kwenu ayomthatha, nina abanye nizakuhlala ngesikhungwenapha. Ngaleyondlela amezwi wenu azabe azizinywa ukubona bonyana nineqiniso kangangani. Nakungasinjalo, ngimfunge uFaro, ngithi niziinhloli nina!”

¹⁷ Ngambala wababeka boke ngesikhungweni amalanga amathathu.

¹⁸ Elangeni lesithathu uJosefa wathi kibo: “Yenzani lokhu nizakuphila ngombana mina ngimumuntu owesaba uZimu:

¹⁹ Nakube nimadoda athembekileko akuthi omunye wenu asale esikhungwenapha khibe abanye benu nithatha ikoroyi nibuyele emindeninenu elambileko.

²⁰ Kodwana kumele nilethe umfowenu omncani kimapha ukuze kuqinisekiswe amezwi wenu nokobana ningafi.” Mbala benza njalo.

²¹ Bathi omunye komunye: “Iye, sihlunguphazwa ngebanga lalokho esakwenza kumfowethu. Sambona bonyana gade akhathazeke kangangani lokha nasirabhelako, kodwana azange simlalele. Ngikho-nje iinkathazwezi zehlele phezu kwethu.”

²² URubeni wathi kibo: “Angithi nganitjela bona ningenzi ubumbi emsaneni? Kodwana nanghanghabala! Gadesi-ke sekumele sithwale umlandu ngeengazi zakhe.”

²³ Azange batjheje bonyana uJosefa uyabezwa ngombana gade asebenzisa umrhumutjhi lokha nakhuluma nabo.

²⁴ UJosefa wabasukela, wathoma ukulila. Kwathi nakabuyela kibo, wakhuluma nabo bewathatha uSimiyoni wambopha phambi kwabo.

²⁵ UJosefa wayaleza bona imithwalo yabo izaliswe ikoroyi, enye nenye indoda ibuyiselwe isilivayo ifakwe ngesikhwameni sayo bebanikelwe umphako. Mbala benzelwa njalo.

Abanakwabo kaJosefa babuyela eKanana

²⁶ Yeke abanakwabo kaJosefa bakhweza ikoroyabo kibodumbana bangena indlela.

²⁷ Kuthe lokha omunye wabo nakavula isikhwama sakhe kobana adlise udumbanakhe lapha bahlwelwa khona, qala naso isilivakhe emlonyeni wesitjhuba sekoroyi!

²⁸ Wabiza abafowabo wathi: “Ngibuyiselwe isilivami! Qalani, nasi ingesitjhubeni sami!” Bakhungatheka, bangenwa kukwesaba babuzana bathi: “Yini esiyenziwa nguZimu le?”

²⁹ Kuthe nabafika kuyise uJakopo enarheni yeKanana, bambikela koke okwenzekileko kibo,

³⁰ bathi: “Umuntu ombusi weGibhide usitjhobolile, wasiphatha njengeenhloli enarhenakhe.

³¹ Sabathe siyamtjela bonyana asisizo iinhloli kodwana simadoda athembekileko,

³² nokobana besiziinlamani ezilitjhumi nambili, amadodana kababa. Samtjela nokobana omunye wethu sele asitjhiya, kanti obuphetjhani yena usele nobaba eKanana.

³³ Kodwna umuntu ombusi wenarha loyo wathi kithi, ‘Nayibe sithembekile ngizakubona ngalokhu: Munye wenu uzakusala nami bese abanye benu bathathela emindenenu elambileko ukudla, barhatjheke.

³⁴ Nilethe ubuphetjhani bekhenu kimi, ngalokho ngizakholwa bonyana anisizo iinhloli kodwana nimadoda athembekileko. Nanenza njalo ngizanibuyisela umfowenu bese nikhamba enarheni ngokutjhaphuluka.’ ”

³⁵ Kuthe lokha nabathulula iinkhwama zabo ebebazikhweze kibodumbana, omunye nomunye wafumana imbadanakhe yesiliva ebe ingesikhwameni. Uyise kanye nabo bangenelwa kukwesaba lokha nababona iimbadana zesilivezo.

³⁶ UJakopo uyisabo wathi kibo: “Ningemuke abantwabami. UJosefa akasekho, uSimiyoni naye uthethwe. Gadesi sele nifuna ukungithathela uBhenjamini! Maye mina, iphasi lingijikele!”

³⁷ URubeni wathi kuyise: “Nakube angimbuyiseli kuwe uBhenjamini, ungabulala amadodanami womabili. Mbeke ngaphasi kwesandla sami, ngizambuyisa.”

³⁸ Kodwana uJakopo wathi: “Indodanami ayikazokwehla nani. Umnakwabo uhlongakele, sekusele yona yedwa tere. Nakwenzeka yehlelwe yingozi ekhambeni lenu, nizabe ningibangele bona ngife ngamatlhuwiso sengimdala kangaka.”