UGENESISI 41 - IsiNdebele 2012 Translation

UJosefa uhlathulula amabhudango kaFaro

¹ Kuthe bona kudlule iminyaka emibili poro, uFaro wabhudanga ajame emlanjeni iNayili.

² Kwathi vumbu iinkomo ezilikhomba ngemlanjenapho. Zazinone ziphazima, zakarula utjani eqadi komlambo.

³ Khonapho kwanyuka ezinye ezilikhomba egade zondile zimigorhu. Zafese zajama malungana negade zisedongeni lomlambo.

⁴ Iinkomo ezonde zimigorhwezo zaginya ezilikhomba ezinone ziphazima. Khonapho uFaro waphaphama.

⁵ Wabanjwa buthongo wabhudanga godu: Nanzi iinqwambi ezilikhomba zekoroyi, ezimabhombo nezinothileko zitlhurha emudzwini munye.

⁶ Ngemva kwazo kwavela ezinye iinqwambi ezilikhomba, zona bezimatsikani begodu zitjhwabiswe mumoya wepumalanga.

⁷ Iinqwambi ezimatsikani zarhiribidela ezimabhombo nezinothileko. Yeke uFaro waphaphama. Agu, bekulibhudango!

⁸ Ekuseni wavuka atshwenyekile. Wabiza boke abosomlingo nabosiyazi beGibhide. Wabatjela amabhudangwakhe, kodwana akakho owakghona ukumhlathululela wona.

⁹ Yeke ihloko yabaphathikapho yathi kuFaro: “Maye mina! Namhlanje ngikhumbula imitjhaphami.

¹⁰ UFaro wakhe wathukuthelela iinkhulu zakhe, ngalokho wangithatha ngikanye nehloko yababhagi wasifaka ngesikhungweni emzini womphathi wobuzimba.

¹¹ Omunye nomunye wethu waba nebhudango ngobusuku bunye. Ibhudango ngalinye belinehlathululwalo.

¹² Phakathi kwethu bekunesokana lomHebheru ebegade liyinceku yomphathi wobuzimba. Salitjela amabhudangwethu, lasihlathululela wona ngamunye ngamunye ngokwebhudango lakhe.

¹³ Ngambala kwenzeka poro njengombana lalihlathululile: Mina ngabuyiselwa esikhundleni sami kodwana indodenye leya yona yahlonywa esigodweni.”

¹⁴ Yeke uFaro wathumela bona kubizwe uJosefa. Msinyana wakhutjhwa ngesikhungweni, warhuna iindevu bewembatha ezinye izambatho, weza kuFaro.

¹⁵ UFaro wathi kuJosefa: “Ngibe nebhudango, kodwana akunamuntu ongalihlathululako. Yeke besele ngilunywe indlebe ngawe bonyana ngokuzwa nje ibhudango kwaphela, uyakwazi ukulihlathulula.”

¹⁶ UJosefa waphendula uFaro wathi: “Awa, akusikho kwami ukuhlathulula amabhudango, kodwana nguZimu ozakunikela ipendulo elungele kuFaro.”

¹⁷ UFaro wathi kuJosefa: “Ebhudangweni lami gade ngijame edongeni lomlambo iNayili.

¹⁸ Sekwathi vumbu iinkomo ezilikhomba ngemlanjenapho, zinone ziphazima. Zakarula utjani hlanu komlambo.

¹⁹ Khonapho kwavela ezinye iinkomo ezilikhomba ezonde zimigorhu. Azange khengibone imigorhwana yeenkomo ezonde kangaka kiyo yoke inarha yeGibhide le.

²⁰ Iinkomo ezonde zimigorhwezo zaginya zokuthoma ezilikhomba ezinonileko.

²¹ Kodwana ngitjho nangemva kokobana seziziginyile azange kubonakale bona zingenile eziswini zazo ngombana zase zaqaleka zizimbi zimigorhu njalo. Yeke ngaphaphama.

²² “Kwelinye ibhudango ngabona iinqwambi zekoroyi ezilikhomba ezinothileko nezimabhombo, zitlhurha emudzwini munye.

²³ Kwavela nezinye iinqwambi zekoroyi ezilikhomba zinganalitho, zimatsikani begodu zitjhwabiswe mumoya wepumalanga.

²⁴ Nje-ke iinqwambi ezimatsikanezo zarhiribidela ezimabhombo. “Manje, amabhudango la ngiwazise abosomlingo, kodwana akukho noyedwa wabo owakhe wakghona ukungihlathululela wona.”

²⁵ UJosefa wathi kuFaro: “Womabili amabhudango la atjho into eyodwa. UZimu ubonise uFaro into azoyenza.

²⁶ Iinkomo ezilikhomba ezinonileko minyaka elikhomba begodu neenqwambi ezimabhombo ezilikhomba zekoroyi minyaka elikhomba, koke njalo kutjho ibhudango linye.

²⁷ Iinkomo ezilikhomba ezonde zimigorhu ezivele muva kwezinye minyaka elikhomba, kanjalo neenqwambi ezilikhomba ezimatsikani, ezitjhwabiswe mumoya wepumalanga: Kuzokuba neminyaka elikhomba yendlala.

²⁸ “Sekunjengombana ngitjele uFaro, uZimu ubonise uFaro lokho azokwenza.

²⁹ Kuzokuba khona inala ekulu kiyo yoke inarha yeGibhide iminyaka elikhomba.

³⁰ Ngemva kwalokho kuzokuba khona indlala iminyaka elikhomba. Koke ukusutha kuzakulitjalwa eGibhide ngombana indlala izakukhothulula inarha.

³¹ Iye, ukusutha angeze bekusakhunjulwa enarheni ngombana indlala leyo iza ngamandla.

³² Isizathu sokobana uFaro anikelwe ibhudango ngeendlela ezimbili kukobana indaba le uZimu uyiqinisekisile begodu uzayenza msinyazana.

³³ “Nje-ke uFaro akakhethe indoda enelihlo nehlakaniphileko ayibeke bonyana yengamele inarha yeGibhide.

³⁴ UFaro akabone bonyana ubeka iinduna enarheni yoke kobana zithathe ingcenye eyodwa kezihlanu yesivuno seGibhide eminyakeni elikhomba yenala.

³⁵ Kumele zibuthelele koke ukudlokho eminyakeni yenala ezako le. Azibulunge isivuno ngaphasi kwelawulo lakaFaro emadorobheni beziseluse.

³⁶ Ukudla enizokubulungokho kufuze kugcinelwe abantu benarha kobana kusetjenziswe eminyakeni elikhomba yendlala ezakwehlela iGibhide ukuze inarha ingabhujiswa yindlala.”

UJosefa uba sisandla sakaFaro eGibhide

³⁷ Iqhingeli laba lihle kuFaro nakizo zoke iinkhulu zakhe.

³⁸ UFaro wakhuluma neenkhulu zakhe wathi: “Singamthathaphi umuntu onjengendoda le, umuntu onommoya kaZimu?”

³⁹ Nje-ke wathi kuJosefa: “Njengombana uZimu akwambulele koke lokhu nje, kuyakhanya bonyana akakho omunye onelihlo nohlakaniphe njengawe.

⁴⁰ Nguwe ozakuphatha isigodlo sami. Nje-ke boke abantu bami kumele balalele wena. Mina ngizakuba mkhulu kuwe ngesigodlo kwaphela.”

⁴¹ Yeke uFaro wathi kuJosefa: “Ngalokho ngikubeka bona wengamele yoke inarha yeGibhide.”

⁴² Wakhupha idzilamnwanakhe yokutlikitla emnweni wayifaka kewakaJosefa. Wamembathisa isambatho esimhlope selineni, wamfaka umncamo wegolide entanyeni.

⁴³ Wamkhweza ekaraneni esezingeni lesibili keyakhe, abantu barhuwelela phambi kwakhe bathi: “Khothamani!” Ngaleyondlela wamenza umengameli wenarha yoke yeGibhide.

⁴⁴ UFaro wathi kuJosefa: “NginguFaro, kodwana ngaphandle kwelizwi lakho akunamuntu ozakusikinyeka kilo loke leGibhide.”

⁴⁵ Wathiya uJosefa ibizo lesiGibhide wathi nguTsafenati-Paneyarha, bewamupha u-Asenathi indodakazi kaPothi-Fera umphristi we-Oni bona abe mkakhe. Njalo-ke idumo lakaJosefa lasabalala nenarha yeGibhide.

⁴⁶ UJosefa gade aneminyaka ematjhumi amathathu lokha nakangena esikhundleni somsebenzi kaFaro ikosi yeGibhide. Kwathi lokha nakasuka phambi kwakaFaro wakhambela yoke inarha yeGibhide.

⁴⁷ Eminyakeni elikhomba yenala inarha yathela isivuno esinengi.

⁴⁸ UJosefa wabuthelela koke ukudla okukhiqizwe eminyakeni elikhomba leyo yenala eGibhide wakulondoloza emadorobheni. Kelinye nelinye idorobho walondoloza ukudla okuvunwe emasimini walapho.

⁴⁹ Walondoloza isivuno esinengi kwanga yihlabathi yelwandle. Sasisinengi kangangobana walisa ukubala ngombana sasingasabaleki.

⁵⁰ Ngaphambi kokufika kweminyaka yendlala, u-Asenathi indodakazi kaPothi-Fera umphristi we-Oni wabelethela uJosefa amadodana amabili.

⁵¹ UJosefa wathiya izibulo bona nguManase wathi: “Kungebanga lokobana uZimu ungenze ngakhohlwa boke ubudisi bami kanye nawo woke umuzi kababa.”

⁵² Indodana yesibili wayithiya bona ngu-Efrayimu wathi: “Kungebanga lokobana uZimu ungiphumelelisile enarheni yokurhubutjhwa kwami.”

⁵³ Iminyaka elikhomba yenala yaphela eGibhide.

⁵⁴ Kwathoma iminyaka elikhomba yendlala kwaba njengokutjho kwakaJosefa. Kizo zoke iinarha ezinye kwaba nendlala kodwana yoke inarha yeGibhide yona yaba nokudla.

⁵⁵ Kwathi lokha indlala nayithoma ukusahlela neGibhide, abantu balila ngokudla kuFaro. Yena wathi kiwo woke amaGibhide: “Khambani niye kuJosefa nifese nenze koke athi nikwenze.”

⁵⁶ Indlala yabhoka eGibhide. Kwathi bona indlala leyo yembathe inarha yoke, uJosefa wavula zoke iinlulu lapha bekunesivuno khona wathengisela amaGibhide.

⁵⁷ Nephasi loke leza eGibhide ukuzokuthenga ukudla kuJosefa ngombana indlala besele ibhoke iphasi loke.