UGENESISI 40 - IsiNdebele 2012 Translation

¹ Emva kwesikhathi esithize, umphathikapho nombhagi wekosi yeGibhide bonela umphathabo oyikosi yeGibhide.

² UFaro wathukuthelela iinduna ezikulu zakhe ezimbili okutjho ihloko yabaphathikapho nehloko yababhagi,

³ beyazibeka ngesikhungweni emzini womphathi wobuzimba, hlanu kwejele lapha bekunoJosefa khona.

⁴ Umphathi wobuzimba wanikela uJosefa eendunenezo bona azitjheje. Ngemva kobana zihlezi ngesikhungweni isikhatjhana,

⁵ enye nenye yazo, umphathikapho nombhagi wekosi yeGibhide, zaba namabhudango busukubunye zingesikhungwenapho. Elinye nelinye ibhudango gade linehlathululwalo.

⁶ Lokha uJosefa nakafika kizo ekuseni wazifumana zinyamile.

⁷ Yeke wabuza iindunezo ebegade zinaye ngesikhungweni emzini womphathakhe wathi: “Kubayini ninyukubele nje namhlanjesi?”

⁸ Zamphendula zathi: “Sibe namabhudango, kodwana akunamuntu ongasihlathululela wona.” UJosefa wathi: “Angithi nguZimu okwazi ukuhlathulula amabhudango? Ningangitjela amabhudangwenu lawo-ke.”

⁹ Yeke ihloko yabaphathikapho yatjela uJosefa ibhudango layo yathi: “Ebhudangweni lami bekunesidiribe ngaphambi kwami,

¹⁰ sinamahlumela amathathu. Sekwathi sisahluma njalo, satjhatjhaza, khonokho sathela amatjatho wamadiribe avuthiweko.

¹¹ Ikapho kaFaro gade isesandleni sami, ngathatha amadiribe ngawaminyela ngekatjheni kaFaro leyo bengayibeka esandleni sakhe.”

¹² UJosefa wathi: “Nakhu okutjhiwo libhudangwelo: Amahlumela amathathu atjho amalanga amathathu.

¹³ Emalangeni amathathu la uFaro uzakugweba umlandwakho abe akubuyisele esikhundleni sakho. Wena uzakubeka ikapho kaFaro esandleni sakhe njengaphambilini lokha nawugade usesemphathikaphakhe.

¹⁴ Kodwana ungikhumbule-ke nasele izinto zikukhambela kuhle. Ungizamele ngokungibika kuFaro, angikhuphe ngejelapha.

¹⁵ Ungibona nginje, ngathathwa ngekani enarheni yamaHebheru. NeGibhidapha sengaphoselwa ngemgodinapha ngingakenzi litho elimbi.”

¹⁶ Kuthe bona ihloko yababhagi izwe bonyana uJosefa ukhulume ihlathululo ekarisako yebhudango yathi kuye: “Uyazi nami ngibhudangile. Ebhudangweni lami gade ngithwele iinqwebu ezintathu zesikwa esimhlophe.

¹⁷ Esiqwebini esingaphezulu bekunemifunda yoke yezikwa ezikhethekileko ezibhagelwe uFaro, kodwana iinyoni bezikugoma seze kusehlokwami njalo.”

¹⁸ UJosefa wayiphendula wathi: “Nakhu okutjhiwo libhudango lakhwelo: Iinqwebu ezintathu malanga amathathu.

¹⁹ Emalangeni amathathu la uFaro uzakugweba umlandwakho abe akuhlomele esigodweni, iinyoni zinqothule inyamakho.”

²⁰ Kwathi elangeni lesithathu okwakulilanga uFaro abelethwa ngalo, wenzela zoke iinkhulu zakhe umnyanya. Wagweba umlandu wehloko yabaphathikapho nowehloko yababhagi phambi kweenkhulu zakhe:

²¹ Wabuyisela ihloko yabaphathikapho esikhundleni sayo kobana ibuye godu ibeke ikapho esandleni sakaFaro,

²² kodwana wahlomela ihloko yababhagi esigodweni. Kwaba njengombana uJosefa gade azihlathululele.

²³ Ihloko yabaphathikapho azange ikhumbule uJosefa. Yamkhohlwa nya.