UGENESISI 4 - IsiNdebele 2012 Translation

UKhayini no-Abela

¹ Indoda yeyama umkayo, wazithwala, wabeletha uKhayini wathi: “Ngiveze indoda ngokusizwa nguSomnini.”

² Godu wabeletha u-Abela umfowabo. Nje-ke u-Abela waba ngumelusi wezimvu neembuzi kwathi uKhayini waba mlimi wehlabathi.

³ Ngokukhamba kwesikhathi uKhayini waletha ezinye zeenthelo zehlabathi zaba mnikelwakhe kuSomnini.

⁴ U-Abela naye waletha umnikelo kuSomnini, okutjho umhlwehlwe wamazibulo womhlambakhe. USomnini uZimu wayelela u-Abela nomnikelwakhe,

⁵ kodwana akhange ayelele uKhayini nomnikelwakhe. Ngebangelo uKhayini wasilingeka khulu nobuso bakhe banyukubala.

⁶ Nje-ke uSomnini wathi kuKhayini: “Usilingwe yini? Kubayini ubuso bakho bunyukubele nje?

⁷ Kanti nawenza okuhle azakhe umomotheke na? Nawenza okungakalungi, yelela isono sikulindile nawusuka lapha. Sikhanukela ukukubinda kodwana wena kufuze uqine kunaso.”

⁸ Nje-ke uKhayini wathi ku-Abela umfowabo: “Namba khesiye emmangweni.” Kwathi basese semmangwenapho, uKhayini wadumela umfowabo u-Abela wambulala.

⁹ USomnini wathi kuKhayini: “Uphi umfowenu u-Abela?” Yena waphendula wathi: “Awa, mina angimazi. Kanti sengingumelusi womfowethu na?”

¹⁰ USomnini wathi: “Yintobani oyenzileko le? Lalela bona iingazi zomfowenu zingililela kangangani ehlabathini!

¹¹ Unikelelwe wena! Sekufanele uqotjhwe ehlabathini ovule umlomayo bona yamukele iingazi zomfowenu ngezandla zakho.

¹² Lokha nawulima ihlabathi, ayisazukuvezela iinthelo zayo. Sewuzakundinda nephasi.”

¹³ UKhayini wathi kuSomnini: “Isibetho sami singaphezu kwamandlami.

¹⁴ Namhlanje ungiqotjhile ehlabathini begodu angisazukuba sebukhoneni bakho. Sengizokuba ngondindako ephasini, nanyana ngubani ongifunyanako uzongibulala.”

¹⁵ Kodwana uSomnini wathi: “Akusinjalo! Nakukhona obulala uKhayini, kuzakubuyiselelwa emuntwini loyo ngokubulawa kwabalikhomba bakhe.” Yeke uSomnini watshwaya uKhayini ukuze kungabikhona noyedwa ozakuthi namfunyanako ambulale.

¹⁶ Nje-ke uKhayini wasuka phambi kwakaSomnini wayokwakha enarheni yeNodi, ngepumalanga ye-Edeni.

¹⁷ UKhayini weyama umkakhe, wazithwala bewabeletha u-Inogo. UKhayini wakha idorobho walithiyelela ngendodanakhe u-Inogo.

¹⁸ U-Inogo wabelethelwa u-Iradi; u-Iradi wabeletha uMerhiyayeli, uMerhiyayeli wabeletha uMetutjhayeli owabeletha uLemeki.

¹⁹ ULemeki wathatha abafazi ababili, omunye abizwa bona ngu-Ada omunye kuthiwa nguTsila.

²⁰ U-Ada wabeletha uJabali. UJabali lo, gade anguyise wabomahlala etendeni nabafuyi.

²¹ Ibizo lomfowabo bekunguJubali. UJubali yena gade anguyise wabo boke abancinzi bamaharibha namanghwani.

²² UTsila naye wabeletha indodana okuthiwa nguTubali-Khayini. Yena gade amkhandi noyise walabo abasebenza ngekoporo nesimbi. Udadwabo lakaTubali-Khayini bekunguNama.

²³ ULemeki wathi ebafazini bakhe: “Ada nawe Tsila, lalelani mina; bafazi bami lalelani amezwami: Indoda elimaza mina, ngizoyibulala nya, kuzakuba njalo nesokaneni elingiphobolako.

²⁴ Iye, uKhayini uzakubuyiselelwa kalikhomba kodwana uLemeki yena kuzakuba kamatjhumi alikhomba nalikhomba!”

²⁵ U-Adamu weyama umkakhe godu wabeletha indodana wayithiya bona nguSethi ngombana wathi: “UZimu ungiphe omunye umntwana esikhundleni saka-Abela obulewe nguKhayini.”

²⁶ USethi naye wabeletha indodana wayithiya bona ngu-Enotjhi. Ngesikhatheso abantu bathoma ukubiza ibizo lakaSomnini.