UGENESISI 39 - IsiNdebele 2012 Translation

UJosefa nomkaPothifara

¹ UJosefa gade asiwe eGibhide. Kwathi ama-Itjhimayeli nakafika lapho, uJosefa wathengiselwa uPothifara umGibhide ogade ayinduna ekulu kaFaro begodu amphathi wobuzimba.

² USomnini gade anoJosefa, ngalokho waphumelela. Wahlala emzini womphathakhe omGibhide.

³ Umphathakhe lokha nakabona bonyana uSomnini inoJosefa nokobana imnikele ukuphumelela kikho koke agade akwenza,

⁴ waba nomusa kuye bewamenza waba sisandla sakhe. UPothifara lo, wabeka uJosefa bonyana abe mtjheji womzakhe, wabeka koke anakho emahlombakhe.

⁵ Ukusuka ngesikhathi umphathi abeka ngaso uJosefa bonyana amqalele endlinakhe nakho koke anakho, uSomnini wabusisa woke umndeni womGibhide ngebanga lakaJosefa. Isibusiso sakaSomnini sehlela phezu kwakho koke uPothifara agade anakho, ngekumbeni nemasimini.

⁶ Watjhiya koke agade anakho ezandleni zakaJosefa ngombana nakusaphethe yena uPothifara bekangazitshwenyi ngalitho ngaphandle kokudla agade akugoma. UJosefa bekanejamo begodu ahlamazana.

⁷ Emva kwesikhathi esithize umfazi womphathakhe wathatheka ngoJosefa lo wathi kuye: “Yewize ulale nami!”

⁸ Kodwana uJosefa wala, wathi kuye: “Njengombana ngiphethe lapha nje, umphathami akazitshwenyi ngalitho ngokungendlini. Koke anakho ukubeke ezandleni zami.

⁹ Ungenze ngalingana naye emzinakhapha, yeke akukho nokuncani angidime khona ngaphandle kwakho ngombana wena umkakhe. Alo-ke ngingakwenza njani ukukhohlakala okungako ngone kuZimu na?”

¹⁰ Nanyana gade asomasoma uJosefa imihla namalanga, uJosefa wala ukulala naye namkha ukutjhidela hlanu kwakhe.

¹¹ Ngelinye ilanga wangena ngekumbeni kobana ayokwenza imisebenzakhe, gade kungekho namunye weensebenzi zangekumbenapho ngaphakathi.

¹² Yeke umkaPothifara wamtjhubelela ngesambatho sakhe wathi: “Ngiyakubawa hle, lala nami!” Kodwana uJosefa waphunyurha, watjhiya isambatho sakhe ezandleni zomfazi loyo, waphumela ngaphandle.

¹³ Kuthe umkaPothifara nakabona bonyana uJosefa utjhiye isambatho sakhe bewaphumela ngaphandle,

¹⁴ wabiza iinsebenzi zangekumbenakhe wathi: “Akhese nithi niyaqala, umHebheru lo ulethwe kithapha bonyana azosiphuphela! Khona nje ungene lapha bonyana azokulala nami kodwana ngarhuwelela.

¹⁵ Uthe lokha nangizwa ngirhuwelela, weqa bewatjhiya nesambatho sakhe hlanu kwami, waphumela ngaphandle.”

¹⁶ Umfazi lo wabeka isambatho sakaJosefa hlanu kwakhe bekwafika umphathakhe.

¹⁷ Wamtjela indaba leyo wathi: “Ikhoboka lomHebheru owasilethela loneli, lize kimi lazongiphuphela.

¹⁸ Kodwana kuthe lokha nangirhuwelelako, leqa belatjhiya isambatho salo hlanu kwami labalekela ngaphandle.”

¹⁹ Kwathi lokha uPothifara nakezwa amagama womkakhe wokuthi, “Lingiwunawune njalo-ke ikhobokanyana lakhwelo,” wabhoka ngobukhali.

²⁰ Wathatha uJosefa wamphosela ngejele lapha kubotjhwe khona iimbotjhwa zesigodlo. UJosefa gade asejele,

Umphathikapho nombhagi

²¹ kodwana uSomnini gade anaye. Waba nesisa kuye bewamenzela umusa phambi komphathijele.

²² Umphathijele wabeka uJosefa bona abe yinduna phezu kwazo zoke iimbotjhwa. Wabekwa bonyana atjheje koke okwenziwa ngapho.

²³ Umphathijele azange azitshwenye ngokutjhejisisa nanyana yini ebe ingaphasi kwelihlo lakaJosefa ngombana uSomnini gade anoJosefa begodu amphumelelisa kinanyana yini agade ayenza.