UGENESISI 38 - IsiNdebele 2012 Translation

UJuda noTamari

¹ Ngesikhatheso uJuda watjhiya abafowabo wehla wayokuhlala nomuntu we-Adulamu okuthiwa nguRhira.

² Lapho uJuda wafese wabona indodakazi yendoda yomKanana okuthiwa nguTjhuwa, wayithatha. Wayiyama,

³ yabeletha indodana, uJuda wayithiya ibizo bona ngu-Eri.

⁴ Yaba sidisi godu, yabeletha indodana, yayithiya ibizo bona ngu-Onani.

⁵ Yabeletha indodana godu yayithiya ibizo bona nguTjhela. Ngesikatheso uJuda gade aseKeziba.

⁶ UJuda wathathela u-Eri izibulo lakhe umfazi, ibizo lakhe bekunguTamari.

⁷ Kodwana u-Eri, izibulo lakaJuda gade akhohlakele phambi kwakaSomnini, ngalokho uSomnini wamliselela bona afe.

⁸ Yeke uJuda wathi ku-Onani: “Ngena umkamnakwenu, ugcine isiko kuye njengomrharibakho ubelethele umnakwenu abantwana.”

⁹ Kodwana u-Onani gade asazi bonyana nakuba nendodana angeze kwaba ngeyakhe, nje-ke bekuthi njalo lokha nayama umrharibakhe aphalazele imbewu phasi ukuze angabeletheli umnakwabo abantwana.

¹⁰ Isenzo sakheso saba simbi phambi kwakaSomnini, yeke wamliselela bona naye afe.

¹¹ UJuda wathi kumalukazanakhe uTamari: “Buyela ekhenu, uhlale umuhlolokazi bekukhule indodanami uTjhela.” Watjho njalo ngombana wadlumbana wathi: “Naye uzabe ahlongakale njengabafowabo.” Yeke uTamari wabuyela kwabo.

¹² Ngemva kwesikhathi eside umkaJuda, indodakazi kaTjhuwa wahlongakala. Kuthe bona uJuda aqede ukuzila, wakhuphukela eTimna emadodeni ebegade arhuna izimvu zakhe. Waphekelelwa mkhongakhe uRhira we-Adulamu.

¹³ Kwathi bona uTamari atjelwe bonyana usosokanakhe uya eTimna ukuyorhuna izimvu zakhe,

¹⁴ wahlubula izambatho zobuhlolokazi, waziphotjhonga bewazigubuzesa ngesiyaya. Wathithibala ejikeni le-Enayimu, endleleni eya eTimna. Lokhu wakwenza ngombana wabona bonyana nanyana uTjhela sele akhulile, akanikelwa yena bona abe mfazakhe.

¹⁵ Kuthe uJuda nakambonako, wadlumbana bona uyingwadla ngombana gade agubuzese ubuso bakhe.

¹⁶ Waphambukela kuye angamboni bonyana ngumalukazanakhe, wafese wathi kuye: “Kunjani ngamabhayi?” Yena wathi kuJuda: “Uzawahlawula ngani amabhayi lawo?”

¹⁷ UJuda wathi: “Mina ngizakuthumelela imbuzana emihlambinami.” Yena wathi: “Kulungile, kwaphela nange unganginikela isibambiso kufikela lapha uthumela khona imbuzana leyo.”

¹⁸ UJuda wathi: “Alo, sibambiso bani nje engingakunikela sona?” Yena wathi: “Umtiya onedzilamnwana yetshwayo lakho kanye nedondolo lakhwelo kwaphela.” Yeke uJuda wamnikela izintwezo, wamngena-ke, wamenza waba sidisi.

¹⁹ Nakasuka lapho uTamari, wanqomba ekhaya, wahlubula isiyaya sakhe, wembatha izambatho zobuhlolokazi godu.

²⁰ UJuda wathumela imbuzi ngomkhongakhe umAdulamu ukuze afunyane isibambiso sakhe emfazini lowaya. Kodwana nakafika lapho wafunyana ngesikhundla.

²¹ Wabuza abantu balapho wathi: “Siphi isitjhatjha ebegade siseqadi kwendlela e-Enayimu?” Bathi kuye: “Azange khekube nesitjhatjha lapha.”

²² Yeke wabuyela kuJuda wafese wathi: “Akhange ngimfumane. Nabantu balapho bathi akhange khekube nesitjhatjha lapho.”

²³ UJuda wathi: “Silise sizigcinele lokho esikuphetheko. Nasisoloko sifunana naso sizaziphendula isihlekiso. Angithi ngisithumelele imbuzi kodwana wangasifumana.”

²⁴ Bekungaba ziinyanga ezintathu ngemva kwalapho lokha uJuda nakabikelwa bona umalukazanakhe uTamari ufebile, nje-ke usebantwini. UJuda wathi: “Mkhupheleni ngaphandle komuzi nimtjhise abe afe!”

²⁵ Kuthe lokha nakakhutjhelwa ngaphandle wathumela umyalezo kusosokanakhe wathi: “Umuntu ongenze ngaba sidisi mnikazi wezintwezi. Bengithi akhe ufumane qangi bonyana idzilamnwana, umtiya nedondolweli ngezakabani.”

²⁶ UJuda wazazi izintwezo bewathi: “Yena umsulwa kunami ngombana ngiriyadile ukumnikela indodanami uTjhela.” Ukusuka lapho azange alale naye godu.

²⁷ Kuthe lokha nakufika isikhathi sakhe sokubeletha, kwabonakala bona mawele wabantwana.

²⁸ Kwathi nakasabelethako omunye wamawele lawo waveza isandla sakhe, umbelethisi wasibopha ngentanjana ebomvu wathi: “Lo ngowamantange.”

²⁹ Kodwana labuyisela isandla salo emva kwase kuvela umfowabo. Umbelethisi wathi: “Kungendlela ophundlukele ngayo-ke leyo!” Nje-ke wathiywa ibizo bona nguPeretsi.

³⁰ Yeke umfowabo ogade abotjhwe ngentanjana ebomvu esandleni wabelethwa, wathiywa ibizo bona nguTserarhi.