UGENESISI 37 - IsiNdebele 2012 Translation

Amabhudango kaJosefa

¹ UJakopo wahlala enarheni lapha gade kukhonze khona uyise, inarha yeKanana.

² Lo mlando womndeni kaJakopo. UJosefa, isokana elineminyaka elitjhumi nekhomba, gade elusa imihlambi nabafowabo okumadodana kaBhilirha newakaZilipa abafazi bakayise. Wabaceba kuyise ngakho koke okumbi ebebakwenza.

³ U-Israyeli gade athanda uJosefa khulu ukudlula amanye amadodana ngombana wabelethelwa yena sele amdala. Wamenzela ijasana kanokutjho.

⁴ Kuthe bona abafowabo babone bonyana uyise umthanda khulu kunabo boke, bamfela umona begodu nokukhuluma kwakhe kuhle bebangasakuthathi.

⁵ UJosefa waba nebhudango, kwathi lokha nakatjela abafowabo, bamfela umona ukudlula.

⁶ Wathi kibo: “Akhese nilalele nanti ibhudango engibe nalo:

⁷ Uyazi gade sibopha iintjherefu zekoroyi esimini. Qalani khonapho isitjherefu sami savuka sajama rwe, nanziya zenu zizombeleza bezikhothamele sami.”

⁸ Abafowabo bathi kuye: “Eya, hi! Utjho bonyana wena uzoba yikosethu, usibuse na?” Bamhloya khulu ngebanga lebhudango lakhelo nalokho akutjhwileko.

⁹ UJosefa waba nelinye ibhudango, watjela abafowabo godu wathi: “Lalelani, ngibe nelinye ibhudango. Ngibone ilanga nenyezi neenkwekwezi ezilitjhumi nanye zingikhothamela.”

¹⁰ Kuthe lokha nakatjela uyise nabafowabo ngebhudangwelo, uyise wamthethisa wathi: “Libhudango bani lakhweli wena msana? Udlumbana bonyana mbala mina nonyoko nabafowenu sizakuza kuwe sihlome iinhloko phasi phambi kwakho na?”

¹¹ Abafowabo basilingeka ngaye, kodwana uyise wayidlela ngaphakathi indaba le.

UJosefa uthengiswa bafowabo

¹² Abanakwabo kaJosefa gade bayokwelusa imihlambi kayise eduze neTjhekemu,

¹³ u-Israyeli wathi kuJosefa: “Angithi uyazi bonyana abanakwenu belusele imihlambi eduze neTjhekemu? Yewize-ke ngikuthume kibo.” UJosefa waphendula wathi: “Kulungile baba.”

¹⁴ Uyise wathi kuye: “Khamba uyokuqala bonyana koke kusakhamba kuhle ngabafowenu nemihlambi na bese ungilethela ilizwi.” Nje-ke uyise wamthuma; wasuka emrhobeni weRhebroni, akhamba ngendlela eya eTjhekemu.

¹⁵ Umuntu othileko wafunyana uJosefa azulazula emmangweni alahlekile, wambuza wathi: “Uzulazula nje ufunani?”

¹⁶ UJosefa wamphendula wathi: “Ngifuna abanakwethu. Kghani ungangitlhadlhula bonyana beluselephi umhlambabo?”

¹⁷ Umuntu loyo wathi: “Sebasuka lapha. Ngabezwa basithi, ‘Asiyeni eDotani.’ ” Yeke uJosefa wabalandela wabafumana eDotani.

¹⁸ Bambona aseza kude. Kwathi angakafiki nokufika babesele bamenzele ubukhwebetjhana bokumbulala.

¹⁹ Bathi omunye komunye: “Qalani, nasiya isibhudangikazesiya sisiza!

²⁰ Nje-ke yizani sisibulale, sisiphosele ngakomunye wemigodi yomphathamanzi le bese sithi sekwavela isibandana sommango sasiqeda nya. Khesibone bonyana kuzakwenzakalani ngamabhudangwanaso lawo.”

²¹ URubeni wathi bona ezwe lokho, walinga ukuphephisa uJosefa ezandleni zabo ngombana wadlumbana wathi: “Singambulali.”

²² Yeke wathi kubafowabo: “Ningathululi iingazi. Mphoseleni ngemgodini womphathamanzi oserhalawumbeni lo, kodwana ningamusi isandla.” URubeni watjho lokhu ukuze amphephise ezandleni zabo kobana akghone ukumbuyisela kuyise.

²³ Kuthe lokha uJosefa nakafika kibomnakwabo, bamhlubulisa ijasanakhe agade ayembethe, okuyijasana kanokutjho.

²⁴ Bamthatha bamphosela ngemgodini womphathamanzi onganalitho.

²⁵ Kuthe nabahlala phasi bonyana bagome, bathi nabaphakamisa amehlo babona umlandelande wama-Itjhimayeli uvela eGiliyadi. Amakamelawo gade asiya eGibhide, athwele iinthako zokwenza amakha azithethe emihlobohlobeni yemithi.

²⁶ UJuda wathi kubafowabo: “Sizakuzuzani nasibulala umfowethu bese sidibizesa iingazi zakhe?

²⁷ Kubayini singamthengiseli ama-Itjhimayeli lawa? Ngalokho sizabe singakambeki isandla ngombana vele mfowethu, uziingazi nenyamethu.” Abanakwabo bavumelana naye.

²⁸ Yeke kuthe lokha abarhwebi bamaMidiyani nabadlulako, abanakwabo bakhupha uJosefa ngemgodini bamthengisela ama-Itjhimayeli ngeempaparwana ezimatjhumi amabili zesiliva. Wona akhamba naye eGibhide.

²⁹ Kuthe lokha uRubeni nabuyela emgodini womphathamanzi wafumana uJosefa angasekho lapho, warathula izambatho zakhe.

³⁰ Wabuyela kubafowabo wafese wathi kibo: “Umsana loya akasesekho lapha! Maye mina, ngizakuba yini?”

³¹ Yeke bahlaba imbuzi, bathatha ijasana kaJosefa bayenya eengazini zayo.

³² Bathumela ijasana kanokutjho leyo kuyise bathi: “Sithole lokhu. Kuqale bonyana akusi ngokwendodanakho na?”

³³ UJakopo wayibona wayazi wathi: “Maye mina, yijasana yomsanami le! Kutjho bonyana esinye seembandana ezinelaka simbulele! Ngambala uJosefa urathulwe waba ziinquqwana!”

³⁴ Yeke uJakopo wadabula izambatho zakhe, wembatha umgodla. Kwathi lokha nasoloko alilela indodanakhe isikhathi eside,

³⁵ boke abantwabakhe basikima beza kuye bamduduze, kodwana wala ukududuzwa wathi: “Ngizokulila bengehlele phasi ethuneni lapha kunendodanami khona.” Wamlilela njalo-ke uyise.

³⁶ AmaMidiyani wona athengisa uJosefa eGibhide kuPothifara oyinduna ekulu yakaFaro nomphathi wobuzimba.