UGENESISI 35 - IsiNdebele 2012 Translation

UZimu ubusisa uJakopo eBhethe-Eli

¹ UZimu wathi kuJakopo: “Yenyuka uyokuhlala eBhethe-Eli. Nawufika lapho wakhe i-aldari lakaZimu owazibonakalisa kuwe lokha nawubalekela umfowenu u-Esewu.”

² UJakopo wathi emndeninakhe nakibo boke egade banaye: “Lahlani abosingazimu abaphakathi kwenu, nizihlambulule nembathe izambatho ezinye.

³ Yizani sikhuphukele eBhethe-Eli lapha ngizafese ngakhele khona uZimu i-aldari, yena owangiphendula mhlana ngitshwenyekileko nobesoloko anami lapha bengikhamba khona.”

⁴ Yeke banikela uJakopo boke abosingazimu ebegade baphakathi kwabo, bamnikela namancinabo. UJakopo wakuthatha koke lokho wakufihla ngaphasi komuthi we-owuku eTjhekemu.

⁵ Kwathi lokha nabafudukako ukwesaba okuvela kuZimu kwehlela imizi ebabhodileko kangangobana akunamuntu owalinga ukugijimisa amadodana kaJakopo.

⁶ UJakopo nabantu boke egade bakhamba naye bafika eLuzi, okutjho iBhethe-Eli, esenarheni yeKanana.

⁷ Wakha i-aldara lapho wathiya indawo leyo bona inguZimu eBhethe-Eli ngombana kukulapha uZimu azibonakalisa kuye khona lokha nakabalekela umnakwabo.

⁸ Eduze neBhethe-Eli kunendawo okuthiwa yi-Owuku yesiLilo ngombana uDebhora imbelesi kaRabega wahlongakalela khona, wabulungwa lapho ngaphasi komuthi we-owuku.

⁹ Godu uZimu wazibonakalisa kuJakopo lokha nakabuya ePadana-Aramu. Wambusisela eBhethe-Eli,

¹⁰ wathi kuye: “Ibizo lakho unguJakopo, kodwana awusazokubizwa njalo, kuzakuthiwa ungu-Israyeli.” Nje-ke uZimu wamthiya ibizo bona ngu-Israyeli.

¹¹ UZimu wathi kuye: “NginguZimu oSabekako. Yanda ngembeleko ukuze kuvele iinkoro ngeenkoro kuwe, ubelethe namakhosi.

¹² Wena ngizakupha inarha engayipha u-Abrahamu no-Isaka, kuthi ngemva kwakho ngiyinikele iinzukulwana zakho.”

¹³ Yeke uZimu wenyuka wamtjhiya lapha agade akhuluma naye khona.

¹⁴ UJakopo wajamisa ilitje lesikhumbuzo lapha uZimu akhulume naye khona, wathululela umnikelo wokuselwako kilo, godu walizesa ngamafutha.

¹⁵ Wathiya indawo leyo bona yiBhethe-Eli ngombana uZimu wakhuluma naye lapho.

Ukuhlongakala kwakaRarheli no-Isaka

¹⁶ UJakopo banomndenakhe bafuduka eBhethe-Eli. Kwathi kusese mumangwana ukuya e-Efrata, uRarheli wathoma ukubeletha kodwana waphatheka khulu.

¹⁷ Kuthe asese seenhlungwini zokubeletha njalo, umbelethisi wathi kuye: “Ungesabi ngombana sele unomunye godu umsanyana.”

¹⁸ Wadosa umphefumulo kokugcina ngombana gade sele ahlongakala wathiya umsanakhe bona nguBhen-Oni. Kodwana uyise wamthiya bona nguBhenjamini.

¹⁹ Yeke uRarheli wahlongakala bewabulungwa endleleni eya e-Efrata okutjho iBhethe-Lehema namhlanje.

²⁰ UJakopo wajamisa ilitje lesikhumbuzo ngehla kwethuna lakhe; ilitjelo lisikhumbuzo sethuna lakaRarheli bekube gadesi.

²¹ U-Israyeli wahlabela phambili, wahloma itende ngaphetjheya kweMigidali-Ederi.

²² Kwathi u-Israyeli asahlezi kilesosifunda, uRubeni wangenela uBilirha ikhohlo lakayise, walala naye. U-Israyeli wakuzwa lokho. UJakopo gade anamadodana alitjhumi nambili:

²³ Amadodana kaLeya bekunguRubeni, izibulo lakaJakopo, uSimiyoni, uLevi, uJuda, u-Isakari noZebuloni.

²⁴ Amadodana wakaRarheli bekunguJosefa noBhenjamini.

²⁵ Amadodana wencekukazi kaRarheli, okutjho uBhilirha, bekunguDani noNafitali.

²⁶ Amadodana wencekukazi kaLeya, okutjho uZilipha, bekunguGadi no-Atjheri. Lawo-ke madodana kaJakopo abelethelwa wona ePadana-Aramu.

²⁷ UJakopo wabuyela kuyise u-Isaka eMamre eduze neKhiriyathi-Araba okutjho iRhebroni namhlanje, lapha bekukhonze khona u-Abrahamu no-Isaka.

²⁸ U-Isaka waphila iminyaka elikhulu namatjhumi abunane.

²⁹ Gade sele aluphele khulu lokha nakakhohlela kokugcina, wahlongakala aliqhegu begodu anelisekile ngepilo. Amadodanakhe u-Esewu noJakopo ambulunga.